Aprelevk

Aprelevk
Апрелевка

Lidnanznam	Flag
Valdkund	Venäma
Eläjiden lugu (2024)	38,483 ristitud
Pind	29 km²
Telefonkod	+7−496−345-xx-xx
Avtokod	50, 90, 150, 190, 750
Aigvö	UTC+3 (MSK+0)

Aprelevk (ven.: Апре́левка) om Venäman lidn Moskvan agjan keskuzpalan suvipäivlaskmas. Mülüb Naro-Fominskan lidnümbrikho (edel vn 2017 kezakud — rajon), sen kahtenz' surtte lidn koumespäi.

Istorii

Eländpunktan aluz om pandud vl 1899 kuti žilo udenno Aprelevk-raudtestancijanno. Raudtestancii sai nimitust lähižen usadiban mödhe, saudihe usadibad Oprelovk-jogen randal (ven.: Опреловка vai Апреловка). Vl 1899 panihe savičuntegimen alust, vl 1910 — grammofonan platoiden tegint (vspäi 2002 eile rados). Kätihe radnikžiloks vl 1935. Žilo sai lidnan statusad vl 1961.

Aprelevk šingotase sauvondmaterialiden pästandal (lämuzizoläcii), röntgentehnikan i märičendladimiden tehmižel, hokkeiforman i čulkoiden edheotandoil. Küläsauvondan tedoinstitut.

Geografijan andmused

Naro-Fominskan lidnümbrikon sijaduz agjas vn 2010 kartal

Aprelevkan lidnankundan (oli vll 2005−2017) sijaduz rajonas vn 2008 kartal

Lidn sijadase lidnümbrikon pohjoižpäivnouzmaiženno röunanno, Desn-jogen hural randal (ven.: Десна́ 88 km pitte, Moskvan oigedpol'ne bassein), 190 m ü.m.t. keskmäižel korktusel. Desn om lidnan suvipäivlaskmaižeks röunaks.

Matkad Moskvhasai om läz üht kilometrad suvipäivnouzmha (Uden Moskvan Novomoskovskii i Troickan ümbrikoiden röun), Moskvan rengazavtotehesai — 30 km pohjoižpäivnouzmha. Toižed lähembaižed lidnad oma Krasnoznamensk kahtes kilometras pohjoižhe i Golicino kudes kilometras lodeheze orhal, lidnümbrikon Naro-Fominsk-keskuz 28 km suvipäivlaskmha teidme.

Aprelevk-raudtestancii radab lidnan keskuzpalas vspäi 1899 «Moskv (Kijevan päraudtestancii) — Obninsk»-keskustal, matkad päraudtestancijhasai om 42 km. Kaks' platformad oma sen ližaks: Pobed pohjoižpäivnouzmas («Vägestuz») i Dačnai päivlaskmas («Kezakülä»). «Ukrain»-avtote (M3-trass) om lidnan suviröunaks.

Eläjad

Vl 1939 žilon ristitišt oli 5 742 eläjad, vl 1959 — 14 936 eläjad. Vn 2010 Venäman rahvahanlugemižen mödhe lidnan eläjiden lugu oli 18 349 ristutud, lidnümbrikon kümnendez, vn 2021 — 35 514 ristutud. Kaik 26 610 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (ozutadud rahvahudenke vl 2010): venälaižed — 94,1 %, ukrainalaižed — 1,5 %, armenijalaižed — 1,1 %, toižed rahvahad — 3,3 %.

Ortodoksižen hristanuskondan ph. Ill'a-endustajan jumalanpert' om saudud lidnas vodele 2002.

Openduz

Lapsiden opendusen aluzkundad oma kuz' nimitadud i nomeruidud päivkodid (nomer 4, 15, 16, 22, 43, 60), koume školanedelišt palakundad keskškolanno nomer 1, koume keskškolad (nomer 1, 3, 4), čomamahtoiden škol.

Professionaližen opendusen aluzkundad ratas lähembaižiš lidnoiš.

Galerei

• 
  Ph. Illija-endustajan jumalanpert', vn 2008 nägu
• 
  Enččen grammofonan platoiden tegimen sauvuz vl 2006
• 
  Lidnan kul'turkeskuz (2022)
• 
  «Melodii»-sportpert'kulu vn 2008 vilukus
• 
  Aprelevk-raudtestancii vl 2010

Irdkosketused

• Naro-Fominskan lidnümbrikon tobmuden aluzkundoiden oficialine sait (nfreg.ru). (ven.)