Losino-Petrovskii

Losino-Petrovskii
Лосино-Петровский

Lidnanznam	Flag
Valdkund	Venäma
Eläjiden lugu (2024)	29,143 ristitud
Pind	9,16 km²
Telefonkod	+7−49 656-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Losino-Petrovskii (ven.: Лоси́но-Петро́вский) om Venäman lidn Moskvan agjan keskuzpalan päivnouzmas. Se om Losino-Petrovskii-lidnümbrikon administrativižeks keskuseks da üks'jäižeks lidnaks.

Istorii

Eländpunktan aluz om pandud vl 1708 kuti nahkoiden ümbriradmižen tegim Venäman armijan täht da žilo senno. Lähine carin pert'kuln Nikol'skoje-Sobakino-žilo ühtištui nahkan Losinai-manufakturan žilonke aigan mändes. Žilon oficialine nimituz oli Petrovskai ezilidnalaine slabad (ven.: Петровская подгородная слобода). Tekstiližed fabrikad radaškanziba slabadas ümbri 19. voz'sadan keskespäi, nevondkundaližen aigan ned oliba Mononon harjvillan kombinataks (ühesha tuhazesai radnikoid). Kätihe slabadad radnikžiloks nügüdläiženke nimenke vl 1928. Žilo sai lidnan statusad vn 1951 12. päiväl heinkud.

Losino-Petrovskii šingotase šuukkanghiden fabrikal i holitišiden sferal.

Geografijan andmused

Lidnümbrikon sijaduz agjas vn 2018 semendkun kartal

Losino-Petrovskii-lidnümbrikon kart (2021)

Lidn sijadase lidnümbrikon suvipäivnouzmas, Kläz'man oiktal randal, 140 m ü.m.t. keskmäižel korktusel.

Matkad Moskvhasai (Moskvan rengazavtotehesai) om kaks'kümne kahesa kilometrad päivlaskmha. Lähembaižed lidnad om Vanh Kupavn kudes kilometras suvhe i Ščolkovo kümnes kilometras päivlaskmha-lodeheze. Lähembaine raudtestancii om Monino koumes kilometras suvhe.

Tobmuz

Lidn oli Ščolkovon rajonan palaks vhesai 1996, sid' erine lidnümbrik-eländpunkt. Vl 2018 ližatihe 17 žilod da küläd lidnümbrikho Ščolkovon rajonaspäi.

Eläjad

Ph. Mikulai-čudonsädajan jumalanpert' (1822), vn 2012 nägu

Vl 1939 žilon ristitišt oli 8 454 eläjad, vl 1959 lidnan — 16 688 eläjad. Vn 2010 Venäman rahvahanlugemižen mödhe lidnan eläjiden lugu oli 22 550 ristutud, vn 2021 — 29 000 ristitud. Otab koumandest nügüdläižen lidnümbrikon ristitištos vspäi 2021, ende oti pol't. Kaik 25 730 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (ozutadud rahvahudenke vl 2010): venälaižed — 91,4 %, uzbekad — 1,7 %, ukrainalaižed — 1,4 %, armenijalaižed — 1,2 %, tadžikalaižed — 1,0 %, toižed rahvahad — 3,3 %.

Ortodoksižen hristanuskondan nell' pühäpertid oma kaičenus i saudud lidnas: koume jumalanpertid i časoun'.

Openduz

Lapsiden opendusen aluzkundad oma kuz' nimitadud i nomeruidud päivkodid (nomer 1..6), kaks' keskškolad (nomer 1 i 2), ümbrikon lapsiden sädamižen keskuz, ümbrikon čomamahtoiden škol I.F. Oblikinan nimed, ümbrikon «Olimp»-sportškol.

Ščolkovon kolledžan strukturine alajaguz nomer 7 om lidnan professionaližen opendusen aluzkundaks.

Irdkosketused

• Lidnümbrikon tobmuden aluzkundoiden oficialine sait (lospet.ru). (ven.)