Puškino

Puškino
Пушкино

Lidnanznam	Flag
Valdkund	Venäma
Eläjiden lugu (2024)	111,580 ristitud
Pind	60,33 km²
Telefonkod	+7−496−53x-xx-xx. +7−496−58x-xx-xx
Avtokod	50, 90, 150, 190, 750
Aigvö	UTC+3 (MSK+0)

Puškino (ven.: Пу́шкино) om Venäman lidn Moskvan agjan keskuzpalan pohjoižpäivnouzmas. Se om Puškinon lidnümbrikon administrativine keskuz da kaikiš suremb lidn koumespäi, agjan 17..19nz' lidn eläjiden lugun mödhe, Moskvan pohjoižpäivnouzmaine ezilidn.

Istorii

Eländpunkt mainitase vspäi 1499 kuti Pučkino- vai Puškino-žilo torguindtenno Pereslavl'-Zalesskijannoks. Nimitihe Puč-jogen (ven.: Пуча), Puškinad-rodun vai juraižimiden tehmižen mödhe (ven. пушка). Vl 1771 kaik žilon eläjad koliba mustmoraspäi. Aigan mändes žilo kändihe tegimiden keskuseks: vatken manufaktur, sobiden sišpäi edheotand, vas'ktegim. Vl 1862 raudte radaškanzi Sergijev Posadannoks, i saudihe Puškino-raudtestancijad koumes kilometras žilospäi. Kezaküläpertiden Puškino-žilo stancijanno oli tetab vspäi 1867. Ühtenzoittud radnikžilo sai lidnan statusad vn 1925 17. päiväl elokud. Oli rajonan keskuseks vspäi 1929. Mülütihe lidnha lähižid žiloid vll 2002−2003.

Puškino šingotase sauvondmaterialiden pästandal (turušknitud, iknad), sömtegimištol (jauh i leibänproduktad, likörvintegim, lihan edheotand), tekstilin i kengiden tehmižel, elektromehanižel tegimel, tehnižvoiden, fil'triden, kertehpakuitesen, avtotesauvondan i logistikan edheotandoil. Mecan i mecmašinansauvomižen tedoiduzkeskused ratas lidnas mugažo.

Geografijan andmused

Puškinon lidnümbrikon sijaduz agjas vn 2021 kartal

Lidnümbrikon tobjan palan kart (2021)

Lidn sijadase lidnümbrikon suviröunal, Učanjogen molembil randoil (ven.: Уча́ 42 km pitte, Kläz'man hura ližajogi), 160 m ü.m.t. keskmäižel korktusel. Učan vezivaradim (19,3 km²) om ani päivlaskmha-lodeheze lidnaspäi, ottas sen vet Moskvan varatoitandan täht. Serebränk-jogi (padoseinänke) läbitab lidnan pohjoižpäivnouzmad i lankteb Učha huralpäi.

Matkad Moskvhasai (Moskvan rengazavtotehesai) om seičemetoštkümne kilometrad suvipäivlaskmha. Toižed lähembaižed lidnad (orhal) oma Ivantejevk ani päivnouzmha i suvipäivnouzmha, Fräzino 10 km päivnouzmha, Ščolkovo kahesa kilometrad suvipäivnouzmha, Korolöv koume kilometrad suvhe, Mitišči kahtes kilometras suvipäivlaskmha.

Raudte jagab lidnan poleti. Puškino-raudtestancii radab lidnan keskuzpalas «Moskv — Jaroslavl'»-keskustal vspäi 1862, elektrojonused tuldas Moskvan Jaroslavlin päraudtestancijaspäi. Toine platform om Il'jičan Zavetoičendad lidnan pohjoižes. «Holmogori»-mante (M8-trass) om lidnan päivnouzmaižeks röunaks, Jaroslavlin šosse sarakoičese sišpäi i läbitab lidnan päivnouzmad.

Lidnan mikrorajonad: Dzeržinec, Serebränk, I. Armandan nimed, Mamontovk, Zvägino, Kläz'm, Kudrink, Uz' Derüun, Il'jičan Zavetoičendad, Kavezino, Jogidenkeskeine. Om kezaküliden kooperativid.

Eläjad

Vl 1939 lidnan ristitišt oli 21 081 eläjad, vl 1959 — 30 035 eläjad. Vn 2010 Venäman rahvahanlugemižen mödhe lidnan eläjiden lugu oli 102 874 ristutud, rajonan (nüg. lidnümbrik) koume videndest, vn 2021 — 110 868 ristitud. Kaik 106 577 eläjad oli lidnas vl 2017. Kaikiš suremb lidnan ristitišt oli 111 738 eläjad vl 2023.

Rahvahad (ozutadud rahvahudenke vl 2010): venälaižed — 93,1 %, ukrainalaižed — 1,8 %, totarlaižed — 1,0 %, toižed rahvahad — 4,1 %.

Ortodoksižen hristanuskondan kümne pühäpertid oma saudud lidnas: kahesa jumalanpertid i kaks' časounäd.

Openduz

Lapsiden opendusen aluzkundad oma ühesatoštkümne nimitadud i nomeruidud päivkodid (nomer 1..5, 7..10, 17, 18, 22, 53, 54, 60, 61, 64, 70, 99), augotižškol-päivkodi nomer 63, augotižškol nomer 16, kaks'toštkümne keskškolad (nomer 1..3, 5..9, 11, 12, 14, 15), kaks' gimnazijad (nomer 4 i 10), ehtal'ne škol, škol-internat openikoiden täht tervhuden röunatud voimusidenke, lapsiden sädamižen keskuz, čomamahtoiden škol (ende muzikškol), čomamahtoine škol, ümbrikon sportškol.

Moskvan agjan medkolledžan Puškinon filial (ende Moskvan agjan medkolledž nomer 4) i Moskvan agjan muzikkolledž oma lidnan professionaližen opendusen aluzkundoikš.

Galerei

• 
  Kaiken Venäman mecmašinansauvomižen tedoinstituten pätulend kesked dendrarijad (kül'mku 2010)
• 
  Ortodoksižen hristanuskondan jumalanpertiden Nikolo-Bogolübskii kompleks, vn 2016 nägu
• 
  Lapsiden čomamahtoine škol (2018, makundan škol istorižešti)
• 
  «Pobeda»-kinoteatr («Vägestuz», vn 2011 vai sen aigemba olend)
• 
  Puškino-päraudtestancii vl 2011
• 
  Lidnanznam vll 1975−2002

Kacu mugažo

• Puškin (Piterin lidn)

Irdkosketused

• Lidnümbrikon tobmuden sait (adm-pushkino.ru). (ven.)