Odincovo

Odincovo
Одинцово
Lidnanznam;	Flag;
Valdkund	Venäma
Eläjiden lugu (2024)	187,301 ristitud
Pind	19,6 km²
Telefonkod	+7−498-xxx-xx-xx,; +7−495-xxx-xx-xx
Avtokod	50, 90, 150, 190, 750
Aigvö	UTC+3 (MSK+0)

Odincovo (ven.: Одинцо́во) om Venäman lidn Moskvan agjan keskuzpalan päivlaskmas. Se om Moskvan päivlaskmaine ezilidn, om Odincovon lidnümbrikon (edel vn 2019 vilukud — rajonan) administrativižeks keskuseks da palaks. Agjan kahesanz' lidn i ümbrikon kaikiš suremb lidn eläjiden lugun mödhe nellän kesken.

Istorii

Eländpunkt mainitase ezmäižen kerdan vl 1470, no sen aluz om pandud aigemba. Žilo sai nimitust Andrei Odinec-bajarin mödhe, hän eli 14. voz'sadan kahtendes poles. Odincovad-heim valdoiči žilol, no Odinecan Fedosii-vunuk pahidoiči Vasilii II-ruhtinast (1415−1462) i pageni Litvanmaha.

Vl 1870 saudihe raudted žilonno, i uz' žilo raudtestancijanno nimitaškanzihe Odincovoks mugažo. Vll 1875−1895 saudihe koume savičtegint sihe i koume vanhaze Odincovo-žilho sijaližen saven löudmižsijanno. Kätihe radnikžiloks vl 1939. Anttihe lidnan statusad vn 1957 17. päiväl heinkud i ühtištuihe lähižidenke žiloidenke. Vspäi 1965 endevanh Odincovo-žilo om lidnan palaks.

Odincovo šingotase sauvondmaterialiden pästandal (sauvondmujud, lämoinvastaižed tegesed, metalližed konstrukcijad, pumaterialad), metropolitenan sauvondan kompanijal, mašinansauvomižen i kosmetikan edheotandoil, avtokohenduztegim radab. Äjad eläjad ajeltas radonnoks Moskvha.

Geografijan andmused

Lidn sijadase lidnümbrikon päivnouzmas, Moskv-jogen oiktal randpolel, 190 m ü.m.t. keskmäižel korktusel. Samarink-jogi (ven.: Сама́ринка (Переде́лка, Ба́ковка) viž kilometrad pitte, Setunin hura ližajogi) zavodiše stancijan uitoišpäi, jokseb avoinudes vagos päpaloin.

Matkad Moskvan rengazavtotehesai om nell' kilometrad päivnouzmha. Uden Moskvan rajonad levitasoiš ani suvhe. Toižed lähembaižed lidnad oma Golicino i Krasnoznamensk 15..20 km suvipäivlaskmha, Krasnogorsk 15 km pohjoižhe. Innovacine Skolkovo-keskuz om olmas kahtes kilometras pohjoižpäivnouzmha lidnaspäi.

Odincovo-raudtestancii radab lidnan keskuzpalas «Moskv (Vaugedvenäman päraudtestancii) — Smolensk»-keskustal vspäi 1870. Kaks' raudteplatformad: Otradnoje (päivlaskmas) i Bakovk (päivnouzmas). «Vaugedvenäma»-avtote (M1-trass) om lidnan suviröunaks, sen maksline dublör om lidnan lodehližeks i pohjoižeks röunaks. Možaiskan mante läbitab kaiked lidnad. Rahvahidenkeskeine Vnukovo-lendimport (VKO / ven. ВНК) radab kudes kilometras suvhe lidnaspäi. Aeroekspress ühtenzoitab Šeremetjevo-lendimportanke.

Tobmuz

Lidn jagase nomeruidud (1..9) mikrorajonaks, om severt-se nimitadud lidnanlaptoid i tehmištzonoid.

Odincovon territorialižen ohjanduzkundan Administracii radab lidnas. Alištunuden sen tobmudele territorijan pind om 62 nellikkilometrad.

Eläjad

Vl 1939 žilon ristitišt oli 12 548 eläjad, vl 1959 lidnan — 20 337 eläjad. Vn 2010 Venäman rahvahanlugemižen mödhe lidnan eläjiden lugu oli 138 930 ristutud, rajonan (nüg. lidnümbrik) kaks' videndest, vn 2021 — 180 530 ristitud. Kaik 141 493 eläjad oli lidnas vl 2017. Kaikiš suremb lidnan ristitišt om nügüd'.

Rahvahad (ozutadud rahvahudenke vl 2010): venälaižed — 91,7 %, ukrainalaižed — 2,5 %, armenijalaižed — 1,4 %, toižed rahvahad — 4,4 %.

Ortodoksižen hristanuskondan ühesa pühäpertid^[1] oma saudud lidnas: kuz' jumalanpertid, kodijumalanpert' i kaks' časounäd.

Openduz

Lapsiden opendusen aluzkundad oma kaks'kümne kuz' nomeruidud päivkodid (nomer 1, 4, 5, 10, 11, 13..15, 18, 21, 23, 35, 39, 40, 54, 55, 57, 59, 65, 71, 72, 77, 79, 80, 82, 83), seičeme keskškolad (nomer 1, 3, 5, 8, 9, 12, 17), kuz' gimnazijad (nomer 4, 7, 11, 13, 14, lingvistine), koume liceid (nomer 2, 6, 10), Nadežda-škol openikoiden täht tervhuden röunatud voimusidenke, muzikškol, čomamahtoiden Klassika-škol, kaks' sportškolad (muite i üks'borcuindoiden).

Professionaližen opendusen aluzkundad oma Odincovon tehnikum^[2] i MGIMO:n filial^[3].

Galerei

Lidnümbrikon tobmuden pert' (2012)
Jumalanmaman Grebnövon jumalaižen pühäpertid, vn 2015 nägu
Jäpert'kulu (2012)
Voleibolan Iskra-keskuz («Kibin'», 2009)
Torg avto- i raudtestancijoidenno vl 2019

Homaičendad

↑ Odincovon pühäpertid sobory.ru-saital. (ven.)
↑ Odincovon tehnikuman sait (ie-teh.ru). (ven.) (+äikel'ne avtomatine känduz)
↑ MGIMO:n Odincovon filialan sait (odin.mgimo.ru). (ven.)

Irdkosketused

Odincovo Vikiaitas

	Moskvan agjan lidnad
	Aprelevk \| Balaših \| Beloozörskii \| Bronnici \| Čehov \| Černogolovk \| Dedovsk \| Dmitrov \| Dolgoprudnii \| Domodedovo \| Drezn \| Dzeržinskii \| Dubn \| Elektrogorsk \| Elektrostal' \| Elektrougli \| Fräzino \| Golicino \| Himki \| Hot'kovo \| Istr \| Ivantejevk \| Jahrom \| Jegor'jevsk \| Kašir \| Klin \| Kolomn \| Korolöv \| Kotel'niki \| Krasnoarmeisk \| Krasnogorsk \| Krasnozavodsk \| Krasnoznamensk \| Kubink \| Kurovskoje \| Likino-Dulövo \| Litkarino \| Lobn' \| Losino-Petrovskii \| Luhovici \| Lüberci \| Mitišči \| Možaisk \| Naro-Fominsk \| Noginsk \| Odincovo \| Orehovo-Zujevo \| Ozöri \| Pavlovskii Posad \| Peresvet \| Podol'sk \| Protvino \| Puščino \| Puškino \| Ramenskoje \| Reutov \| Rošal' \| Ruz \| Sergijev Posad \| Serpuhov \| Solnečnogorsk \| Stupino \| Šatur \| Ščolkovo \| Zaraisk \| Zvenigorod \| Žukovskii \| Taldom \| Vanh Kupavn \| Verei \| Vidnoje \| Visokovsk \| Volokolamsk \| Voskresensk

[1] Odincovon pühäpertid sobory.ru-saital. (ven.)

[2] Odincovon tehnikuman sait (ie-teh.ru). (ven.) (+äikel'ne avtomatine känduz)

[3] MGIMO:n Odincovon filialan sait (odin.mgimo.ru). (ven.)

[1]

[2]

[3]