Istr (lidn)

Istr
Истра

Lidnanznam	Flag
Valdkund	Venäma
Eläjiden lugu (2024)	34,971 ristitud
Pind	17 km²
Telefonkod	+7−49 831-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Istr (ven.: И́стра) om Venäman lidn Moskvan agjan keskuzpalan päivlaskmas. Se om municipaližen Istr-ümbrikon (edel 2025. vot — lidnümbrikon, edel vn 2017 keväz'kud — Istran rajonan) administrativine keskuz, kaikiš suremb lidn kahtespäi i eländpunkt.

Istorii

Eländpunkt mainitase ezmäižen kerdan vl 1589 kuti Safatovo-žilo (ven.: Сафа́тово). Udesnimitihe sidä Voskresenskoje-žiloks vl 1636 Sündun Eläbzdusen (ven. Воскресение) jumalanpertin mödhe. Žilo sai makundan lidnan statusad Voskresensk-nimitusenke vl 1781. Oli muite lidnaks vspäi 1796 vhesai 1921, sid' makundan i rajonan keskuseks. Udesnimitihe nügüdläižikš vl 1930 jogen mödhe. Toižen mail'man sodan aigan lidn oli okkupiruidud nacistižen Germanijan sodavägil lühüdaks aigaks vn 1941 lopus (26. kül'mku — 10. tal'vku), no oli muretud läz täuzin. Lidnan päiv oigendase kezakun 12. päiväl.

Istr-lidn šingotase elektrotehnikan i elektromehanikan tedotegimištaluzkundoil (mašiništ üläkingitusiden täht, laivišton täht, elektrotermine, röntgenapparatad), metallanümbriradmižen tegimel, savičun tegimel, sömtegimištol (maidproduktad, söm lapsiden täht), zell'edheotandal («KRKA»), mebel'tegimel i omblendfabrikal, kurortižel industrijal.

Geografijan andmused

Municipaližen Istr-ümbrikon sijaduz agjas vn 2010 kartal

Istr-ümbrikon kart (2014)

Lidn sijadase lidnümbrikon keskuzpalan päivnouzmas, ühtennimižen jogen hural randal tobjimalaz (ven.: Истра 113 km pitte, Moskvan hura ližajogi), 165 m ü.m.t. keskmäižel korktusel.

Matkad Moskvhasai (Moskvan avtorengaztehesai) om koumekümne viž kilometrad päivnouzmha. Lähembaižed lidnad oma Dedovsk 15 km päivnouzmha orhal, avtotel vai raudtel, Zvenigorod kaks'kümne kilometrad suvhe orhal vai avtotedme, i Moskvan Zelenograd-rajon 20 km pohjoižpäivnouzmha orhal vai 25 km avtotedme.

Novojerusalimskai-raudtestancii (ven.: Новоиерусалимская, vspäi 1901, suvipäivlaskmas) i Istr-platform (suves) ratas lidnas «Moskv (Rigan päraudtestancii) — Volokolamsk»-keskustal, se keskust om lidnan suviröunaks. Moskvan agjan pen' avtorengaz (A107-trass) mäneb koumes kilometras päivnouzmha lidnaspäi.

Tobmuz

Istr oli lidnankundan keskuseks edel vn 2017 keväz'kud, sen pind oli 22,88 km².

Eläjad

Vl 1939 lidnan ristitišt oli 7 323 eläjad, vl 1959 — 6 982 eläjad. Vn 2010 Venäman rahvahanlugemižen mödhe lidnan eläjiden lugu oli 35 111 ristutud, vn 2021 — 37 474 ristitud. Kaik 34 790 eläjad oli lidnas vl 2017. Otab nelländest lidnümbrikon ristitištos. Kaikiš suremb lidnan ristitišt oli vl 2021, oli 35 800 eläjad vl 1992 i 35 139 eläjad vl 2014.

Rahvahad (ozutadud rahvahudenke vl 2010): venälaižed — 94,3 %, ukrainalaižed — 1,8 %, toižed rahvahad — 3,9 %.

Ortodoksižen hristanuskondan kaks'toštkümne pühäpertid oma kaičenus i saudud lidnas: Novojerusalimskii-mez'jumalankodi (vspäi 1656, sidä kesken Hristan Eläbzdusen päjumalanpert' (1658−1685), nell' jumalanpertid, kodijumalanpert' i kaks' časounäd), koume jumalanpertid da časoun'. Niiden ližaks Sündun Voznesenjan jumalanpert' i nell' časounäd ei ole kaičenus.

Openduz

Lapsiden opendusen aluzkundad oma ühesa nimitadud i nomeruidud päivkodid (nomer 19..21, 23, 24, 26, 47, 48, 52), koume keskškolad (nomer 1, 2, 3), licei (ende keskškol nomer 4), norišton keskuz kinoteatranke, čomamahtoiden škol V.A. Širšovan nimed, Istran sportškol N.L. Fedorovičun nimed.

Istran profkolledž i Krasnogorskan kolledžan Istran filial oma lidnan professionaližen opendusen aluzkundoikš.

Galerei

• 
  Lidnümbrikon tobmuden pert' (2010)
• 
  Novojerusalimskii-mez'jumalankodi, nägu vn 2018 tal'vkus
• 
  Joudan «Mir»-keskuz vl 2005
• 
  Novojerusalimskai-raudtestancii vl 2011
• 
  Lidnan avtostancii vl 2020

Irdkosketused

• Lidnümbrikon tobmuden sait (istra-adm.ru). (ven.)