Sibai

Sibai
Сибай (ven. i bašk.)

Lidnanznam	Flag
Valdkund	Venäma
Eläjiden lugu (2021)	56,514 ristitud
Pämez'	Rustem Afzalov (kül'mku 2017—)
Telefonkod	+7−34 775-xx-xxx
Avtokod	02, 102
Aigvö	UTC+5 (MSK+2)

Sibai (bašk. i tot.: Сибай, ven.: Сиба́й) om Venäman lidn da lidnümbrik Baškortostanan Tazovaldkundan suvipäivnouzmas.

Istorii

Eländpunktan aluz om pandud vl 1913 tedoidamha raudkivendon löudmižsijad. Vl 1938 avaitihe vas'ken da cinkan löudmižsijad Sibain ümbrištos, kätihe küläd radnikžiloks. Vn 1955 21. päiväspäi kül'mkud Sibai om lidnan statusanke, alištub tazovaldkundan tobmudele oikti.

Sibai šingotase Učalin küllästamižfabrikan filialal, kaivuziden tehmižen edheotandal, kaivuzmašiništon paloiden pästandal, mecan ümbriradmižel i leibän pästandal. Lidnan kar'jer om pol'kilometrad süvütte. Uralantagaine LEK (17,4 MVt) radab londuseližel gazal vspäi 2004.

Geografijan andmused

Lidnümbrikon sijaduz tazovaldkundas vn 2020 kartal

Lidn sijadase Suviuralan päivnouzmaižil pautkil, Ural-jogen oiktal randpolel, 360 m ü.m.t. keskmäižel korktusel.

Matkad Čeläbinskan agjan röunhasai om nell' kilometrad päivnouzmha, Ural-jogehesai — kümne kilometrad päivnouzmha, Ufahasai om 285 km lodeheze orhal vai 425 km avtotedme. Lähembaine järed lidn om Magnitogorsk (Čeläbinskan agj) 80 km pohjoižhe orhal vai sada kilometrad avtotedme.

Tobmuz

Sibain lidnümbrik om ümbärtud Baimakan rajonan territorijal kaikiš polišpäi. Tujaläs-žilo (1013 rist. vl 2017) mülüb lidnümbrikho Sibain ližaks. Lidnümbrikon pind — 157,4 km².

Lidnümbrikon tobmuden pämez' om sen Administracijan pämez'.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 62 763 ristitud, lidnümbrikon — 63 838 ristitud, vn 2021 lidnan — 56 514 ristitud. Kaik 61 054 eläjad oli lidnas vl 2017. Kaikiš suremb lidnan ristitišt oli 67 224 eläjad vl 2009.

Rahvahad (enamba 1 % vl 2010, ozutadud rahvahudenke): baškiralaižed — 53,0 %, venälaižed — 35,6 %, totarlaižed — 8,3 %, toižed rahvahad — 3,1 %.

Islaman «At-Takva»-pämečet' i medrese senno oma avaitud lidnas, kaks' tošt pühäpertid om lähižiš žiloiš. Ortodoksižen hristanuskondan Jumalanmaman «Ilo da tüništuz»-jumalaižen pühäpert' om saudud.

Lapsiden opendusen aluzkundad oma 12 päivkodid, keskškolad. Professionaližen opendusen aluzkundad oma Baškirijan valdkundaližen universitetan Sibain institut i viž Sibain kolledžad: äiprofil'ne professionaline, sauvondan da servisan, pedagogine, medicinine, čomamahtoiden.

Galerei

• 
  «At-Takva»-pämečet', vn 2022 nägu
• 
  Baškirijan valdkundaližen universitetan Sibain institut (2022)
• 
  Sibain valdkundaline filarmonii (2014. voz' vai sen aigemba)
• 
  «Irandik»-jäpert'kulu (2014)
• 
  Sibai-päraudtestancijan sauvuz vl 2012

Irdkosketused

• Lidnümbrikon tobmuden aluzkundoiden oficialine sait (sibay.bashkortostan.ru). (ven.)
• Lidnan Nevondkundan oficialine sait (sovetsibay.ru). (ven.) (bašk.)