Davlekanovo

Davlekanovo
Давлеканово (ven.)
Дәүләкән (bašk.)
	Lidnanznam;
Valdkund	Venäma
Eläjiden lugu (2021)	21,834 ristitud
Pind	40,97 km²
Pämez'	Väčeslav Gaponenko; (eloku 2017 — eloku 2022,; keväz'ku 2023—)
Telefonkod	+7−34 768-xx-xxx
Avtokod	02, 102
Aigvö	UTC+5 (MSK+2)

Mečet' (bašk.: *Дәүләкән йәмиғ мәсете*), vn 2021 nägu

Davlekanovo (ven.: Давлека́ново, bašk. i tot.: Дәүләкән) om Venäman lidn da lidnankund Baškortostanan Tazovaldkundan keskuzpalan päivlaskmas. Se om Davlekanovon rajonan administrativine keskuz (vspäi 1930).

Istorii

Eländpunktan aluz om pandud küläks vozil 1730..1750, nimitihe Davlekan Sirtlanov-manpidajan nimen mödhe. Saudihe «Samar — Zlatoust»-raudtekeskust külän ümbrištos vl 1888, i Davlekanovskii-žilo libui Davlekanovskai-raudtestancijanno (ven.: Давлекановская), nügüdläine Davlekanovo-raudtestancii. Ühtištadihe žilod, Davlekanovo-küläd i Itkulovo-küläd (oli tetab vspäi 1797), kätihe ühteks eländpunktaks. Maižanduzrajonan keskuz šingotaškanzihe villän vendpunktaks. Vozil 1917−1924 Davlekanovo oli lidnan statusanke, no kadoti sidä ižandusen krizisan i ristitišton polendusen tagut. Vl 1928 kätihe radnikžiloks. Vspäi 1942 Davlekanovo om lidnan statusanke tošti.

Davlekanovo šingotase mašiništonsauvomižel (mašiništ vaumičemha kivivoid samižen jäl'ghe^[1], lämbitimed, päčid i poltimed, avtomatizacijan sistemad, elektrolaudad, transformatorad), sömtegimištol (jauh, sagud), sauvondmaterialiden tehmižel (torviden tegim, bazal'tlämuzizoläcii, vändoiden lavuded lapsiden täht), kengiden edheotandal, rahvahanpramozloil (kourad, punleiktand, kumisan tehmine).

Geografijan andmused

Lidn sijadase Döm-jogen keskjoksmusen hural randal (bašk.: Дим vai Күгиҙел 535 km pitte, Vaugedjogen hura ližajogi), 110 m ü.m.t. keskmäižel korktusel.

Matkad Ufhasai om 82 km pohjoižpäivnouzmha orhal, 106 km avtotedme vai raudtedme. Toižed lähembaižed lidnad oma Belebei 61 km päivlaskmha orhal vai 96 km avtotedme i Sterlitamak 87 km suvipäivnouzmha orhal vai 110 km avtol.

Klimat om ven kontinentaline. Voden keskmäine lämuz om +3,8 C°, kezakun-elokun +18,0..+20,6 C°, tal'vkun-uhokun −11,1..−11,7 C°.

Tobmuz

Davlekanovo om lidnankundan üks'jäižeks eländpunktaks.

Damir Biktimirov tegi lidnan Administracijan pämehen velgusidme vn 2022 elokuspäi vn 2023 keväz'kuhusai. Lidnan Nevondkundan ezimez' om Lev Afanasjev vn 2020 redukuspäi. Edeline Nevondkundan ezimez' om Nikolai Kibovskii (kül'mku 2016 — reduku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 24 073 ristitud, rajonan koume videndest, vn 2021 — 21 834 ristitud. Kaik 23 774 eläjad oli lidnas vl 2017. Vspäi 1996 lidnan ristitišt om 23..24 tuhad eläjid, kaikiš suremb oli 24 900 eläjad vozil 2000−2001.

Rahvahad (enamba 1 % vl 2010, ozutadud rahvahudenke): venälaižed — 47,1 %, baškiralaižed — 26,0 %, totarlaižed — 17,9 %, ukrainalaižed — 4,4 %, čuvašalaižed — 1,3 %, toižed rahvahad — 3,3 %.

Islaman kaks' pühäpertid oma avaitud. Ortodoksižen hristanuskondan Jumalanmaman Počajevan jumalaižen jumalanpert'^[2] om letud.

Lapsiden opendusen aluzkundad oma seičeme päivkodid, kaks' keskškolad (nomer 1, 7), kaks' gimnazijad (baškiran nomer 3 internatanke, nomer 5), licei-internat, čomamahtoiden škol, «Sambo-75»-sportškol. Professionaližen opendusen neniden aluzkundoiden koume filialad ratas lidnas: Belebein mehanizacijan da elektrifikacijan kolledž, Baškiran arhitekturan, sauvondan i kommunaližen ižandusen kolledž^[3], Ufan tehnologine tehnikum.

Homaičendad

Irdkosketused

Davlekanovo Vikiaitas

	Baškortostanan Tazovaldkundan lidnad
	Agidel' \| Baimak \| Belebei \| Beloreck \| Birsk \| Blagoveščensk \| Davlekanovo \| Dürtüli \| Išimbai \| Janaul \| Kumertau \| Meleuz \| Mežgor'je \| Neftekamsk \| Oktäbr'skii \| Salavat \| Sibai \| Sterlitamak \| Tuimazi \| Učali \| Uf

[1] Davlekanovon kivivoimašiništonsauvomižen «Neftemaš»-tegimen sait (dznm.ru). (ven.) (angl.)

[2] Davlekanovon pühäpertid sobory.ru-saital. (ven.)

[3] Davlekanovon filialan lehtpol' Baškiran sauvondkolledžan bask-rb.ru-saital. (ven.)

[1]

[2]

[3]