Sterlitamak

Sterlitamak
Стерлитамак (ven.)
Стәрлетамаҡ (bašk.)
Lidnanznam;	Flag;
Valdkund	Venäma
Eläjiden lugu (2021)	277,410 ristitud
Pind	108,52 km²
Pämez'	Emil' Šaimardanov; (reduku 2024—)
Telefonkod	+7−3473-xxx-xxx
Avtokod	02, 102
Aigvö	UTC+5 (MSK+2)

Sterlitamak (ven.: Стерлитамак [stʲɪrlʲɪtɐˈmak], bašk.: Стәрлетамаҡ / Stärletamaq [stær.ˌlɪ̞.tɑ.ˈmɑq] «Sterlin jogensu», tot.: Стәрлетамак, čuv.: Çтерлĕ) om Venäman lidn da lidnümbrik Baškortostanan Tazovaldkundan keskuzpalan suves. Se om tazovaldkundan kahtenz' surtte lidn, mugažo Sterlitamakan rajonan administrativižeks keskuseks vspäi 1930 (ei mülü sihe).

Istorii

Eländpunktan aluz om pandud Savva Tetüšev-torgovanan taričendan mödhe vodel 1766 kuti Aškadaran valdmad i Sterlitamakan solvaldmad (ven.: Стерлитамакская солеводная пристань) tomha solad Ileckaspäi Keskuzvenämaha. Vl 1781 sai makundan lidnan statusad, mülüi Orenburgan gubernijha. Vozil 1920−1922 oli Baškiran avtonomijan pälidnaks.

Sterlitamakan ižandusen päsarakod oma himine, kivivoihimine, mašiništonsauvomine (tömašinoiden tegim, vagonoiden kohenduz), sauvond da sauvondmaterialiden tehmine (cement), sömtegimišt (spirtkombinat, oludtegim, leibkombinat, kaks' maidkombinatad, lihan edheotandad).

Geografijan andmused

Lidnan sijaduz tazovaldkundas vn 2020 kartal

Lidn sijadase Vaugedjogen hural randal, 150 m ü.m.t. keskmäižel korktusel.

Matkad Ufahasai om 120 km pohjoižhe orhal, avtotedme vai raudtedme. Lidn röunatab Išimbain rajonanke päivnouzmas, Sterlitamakan rajonanke toižiš čuradusiš. Sädab aglomeracijad lähižidenke Salavat- i Išimbai-lidnoidenke.

Klimat om ven kontinentaline. Voden keskmäine lämuz om +4,1 C°, kezakun-elokun +18..+20 C°, tal'vkun-uhokun −10..−12 C°. Paneb sadegid 553 mm vodes, enamba heinkus-elokus (59..60 mm kus), vähemba keväz'kus-sulakus (29..32 mm kus).

Tobmuz

Sterlitamak om lidnümbrikon üks'jäižeks eländpunktaks. Raudte jagab lidnad päivnouzmaižeks i päivlaskmaižeks palaks, om kahesa mikrorajonad kaikuččes palas, kaik niid om 16.

Lidnümbrikon tobmuden pämez' om sen Administracijan pämez'. Edeližed lidnümbrikon Administracijan pämehed oma Rustem Gazizov (kül'mku 2021 — sügüz'ku 2024), Vladimir Kulikov (eloku 2016 — reduku 2021). Lidnümbrikon Nevondkundan ezimez' om Igor' Sirov (Игорь Сыров) vn 2024 redukuspäi. Edeližed Nevondkundan ezimehed oma Sergei Boikov (tal'vku 2020 — sügüz'ku 2024), Andrei Širäjev (tal'vku 2016 — tal'vku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 273 486 ristitud, lidnaglomeracijan läz 600 tuhad ristituid. Kaikiš suremb lidnan ristitišt oli 280 233 eläjad vl 2017.

Rahvahad (enamba 1 % vl 2010, ozutadud rahvahudenke): venälaižed — 49,5 %, totarlaižed — 23,9 %, baškiralaižed — 15,8 %, čuvašalaižed — 5,3 %, ukrainalaižed — 1,9 %, mordvinalaižed — 1,5 %, toižed rahvahad — 2,1 %.

Lidnan professionaližen opendusen aluzkundad oma Sterlitamakan äiprofil'ne professionaline^[1], politehnine, sauvondan da proftehnologijoiden, fizkul'turan, ohjandusen da servisan^[2] kolledžad, Ufan tedon da tehnologijoiden universitet, sen Sterlitamakan filial^[3] i kolledž senno.

Transport

Trolleibusad, avtobusad, maršruttaksid da taksid oma kundaližeks transportaks lidnas. Avtobusad da rel'sobusad ühtenzoittas lähižidenke järedoidenke lidnoidenke.

«Uf — Orenburg»-avtote ümbärdab lidnad da Salavatad päivlaskmaspäi. Sterlitamak-raudtestancii om avaitud vspäi 1934.

Galerei

Lidnümbrikon Administracijan sauvuz (2004)
Ristitišton abun socialine keskuz (2003, makundan ohjandusen istorine sauvuz)
«Halid ibn al'-Valid»-mečet' i Tra-tau-mägi, vn 2009 nägu
«Kaustik»-tegim vl 2007 (nüg. «Baškiran sodankompanijan pala»)
Ufan valdkundaline kivivointehnine universitet — Sterlitamakan filial (2010)
Sterlitamakan dramteatr (2004)
Lidnan kul'turkeskuz (2017, ende «Kaučuk»-kompanijan kul'turkeskuz)
Fizkul'turine «Sterlitamak-Arena»-tervehtamižkompleks (2015)
«SitiMoll»-torguimižbobuštuzkeskuz (2021)
Sterlitamak-päraudtestancijan sauvuz da torg senno vl 2014

Homaičendad

↑ Sterlitamakan äiprofil'žen professionaližen kolledžan sait (mirsmpc.ru). (ven.)
↑ Sterlitamakan fizkul'turan, ohjandusen da servisan kolledžan sait (stfk-rb.ru). (ven.)
↑ Ufan tedon da tehnologijoiden universitet, Sterlitamakan filialan sait (strbsu.ru). (ven.) (angl.) (bašk.)

Irdkosketused

Sterlitamak Vikiaitas

	Baškortostanan Tazovaldkundan lidnad
	Agidel' \| Baimak \| Belebei \| Beloreck \| Birsk \| Blagoveščensk \| Davlekanovo \| Dürtüli \| Išimbai \| Janaul \| Kumertau \| Meleuz \| Mežgor'je \| Neftekamsk \| Oktäbr'skii \| Salavat \| Sibai \| Sterlitamak \| Tuimazi \| Učali \| Uf

[1] Sterlitamakan äiprofil'žen professionaližen kolledžan sait (mirsmpc.ru). (ven.)

[2] Sterlitamakan fizkul'turan, ohjandusen da servisan kolledžan sait (stfk-rb.ru). (ven.)

[3] Ufan tedon da tehnologijoiden universitet, Sterlitamakan filialan sait (strbsu.ru). (ven.) (angl.) (bašk.)

[1]

[2]

[3]