Bobrov (lidn)

Bobrov
Бобров

Lidnanznam	Flag
Valdkund	Venäma
Eläjiden lugu (2025)	20,413 ristitud
Pind	22 km²
Pämez'	Natal'ja Gaivoronskaja (reduku 2015—)
Telefonkod	+7−47 350-xx-xxx
Avtokod	36, 136
Aigvö	UTC+3 (MSK+0)

Bobrov (ven.: Бобро́в) om Venäman lidn da lidnankund Voronežan agjan keskuzpalan päivlaskmas. Se om Bobrovan rajonan administrativine keskuz, mülüb sihe.

Istorii

Vspäi 1685 valdkundmaksoiden Bobrovskii-jurt oli olmas lidnan sijas majagan (ven.: бобр) pramozlan tagut. Eländpunktan aluz om pandud vl 1698 kuti Bobrovskai-slabad (ven.: Бобровская слобода). Slabad sai makundan lidnan statusad vl 1779. «Liski — Povorino»-raudtekeskust läbiti lidnad vl 1895. Toižen mail'man sodan aigan lidn ei olend okkupiruidud nacistoil, no frontan pird oli läz i lidn oli alištunu bombardiruindale, tegimed oliba evakuiruidud. Koume pen't eländpunktad oma mülütadud Bobrov-lidnha vl 2008.

Bobrov šingotase sauvondmaterialiden pästandal (kaks' asfal'ttegint), soitoiden fabrikal, sömtegimištol (lihakombinat, saguden tegim, argvoitegim, leibtegim), villän varažomal.

Geografijan andmused

Bobrovan rajonan sijaduz agjas vn 2010 kartal

Lidn sijadase rajonan keskuzpalan päivlaskmas, Bitüg-jogen oiktal randal (ven.: Битю́г 379 km pitte, Don-jogen hura ližajogi), 150 m ü.m.t. keskmäižel korktusel.

Matkad Voronežhasai om kahesakümne nell' kilometrad lodeheze-pohjoižhe orhal, 104 km avtotel vai 100 km raudtel. Lähembaine lidn om Liski 39 km päivlaskmha-suvipäivlaskmha orhal, 49 km avtotedme vai raudtedme.

Kaks' raudtestancijad ratas lidnas: Bobrov-raudtestancii pohjoižes i Bitüg-raudtestancii suvipäivlaskmas, sen ližaks «210. km»-seižutespunkt om olmas niiden keskes lidnan päivnouzmas. «Don»-avtote (M4-trass) mäneb kümne kilometras päivlaskmha lidnaspäi.

Tobmuz

Kaik koume žilod mülüdas lidnankundha Bobrovan ližaks, niišpäi kaks' oma kaikenaigaiženke ristitištonke: Lušnikovk (ven.: Лушниковка, 543 rist. vl 2010) i Dugink (Дугинка, 64 rist. vl 2010). Lidnankundan pind — 322,89 km².

Eläjad

Vl 1939 lidnan ristitišt oli 7 000 eläjid. Vn 2010 Venäman rahvahanlugemižen mödhe lidnan eläjiden lugu oli 19 738 ristitud, lidnankundan — 20 345 ristitud, rajonan kaks' videndest, vn 2021 lidnan — 20 871 ristitud. Vl 2017 kaik 20 605 ristitud elihe lidnas i 21 269 ristitud kaikes lidnankundas. Kaikiš suremb lidnan ristitišt oli 19 tuhad eläjid vl 1931 i 21..22 tuhad eläjid vll 1979−2001 (22 100 rist. vl 1998).

Rahvahad (2010): venälaižed — 98,2 %, toižed rahvahad — 1,8 %.

Ortodoksižen hristanuskondan kaks' jumalanpertid oma saudud lidnas, koumanz' suremb ph. Stroican om sauvomižes vspäi 2020.

Lapsiden opendusen aluzkundad oma päivkodid, keskškolad. Voronežan agjan kul'turan profškol i Bobrovan agrariž-industrialine kolledž oma lidnan professionaližen opendusen aluzkundoikš.

Galerei

• 
  Jumalanmaman Emäganpäivän pühäpert' (om saudud vll 1857−1863), vn 2011 nägu
• 
  MiG-23 MLD — muštnik sodalendajiden oiktastuseks (2008)
• 
  Vägimehiden allei lidnan puištos (2014)
• 
  Bobrov-päraudtestancii vl 2015

Irdkosketused

• Lidnankundan Administracijan sait (bobrov-r20.gosweb.gosuslugi.ru). (ven.)
• Lidnan informacine portal (bobrov24.ru). (ven.)