Ostrogožsk

Ostrogožsk
Острогожск

Lidnanznam	Flag
Valdkund	Venäma
Eläjiden lugu (2021)	31,699 ristitud
Pind	22 km²
Pämez'	Irina Mahrova (reduku 2023—)
Telefonkod	+7−47 375-xx-xxx
Avtokod	36, 136
Aigvö	UTC+3 (MSK+0)

Ostrogožsk (ven.: Острого́жск) om Venäman lidn da lidnankund Voronežan agjan päivlaskmas. Se om Ostrogožskan rajonan administrativine keskuz, mülüb sihe. Kozakišton Ostrogožskan Slabadoiden sodapolkan keskuz.

Istorii

Eländpunktan aluz om pandud vl 1652 kuti lidnuz Venäman röunal. Žilo sai makundan lidnan statusad vl 1765. «Liski — Valuikad»-raudtekeskust läbiti lidnad vl 1895. Ukrainalaižed otiba pol't ristitištos vl 1897. Toižen mail'man sodan aigan lidn oli okkupiruidud nacistoil (5. heinku 1942 — 20. viluku 1943).

Ostrogožsk šingotase mašinansauvomižen «Agregat»-tegimel (mašiništ sömtegimišton täht), sömtegimištol (leibtegim, lihakombinat, idüjauhon-suloimen edheotand) i nahkan ümbriradmižen tegimel. Ende savičuntegim, argvointegim, laudsepan tegesiden edheotand i kengiden omblendceh radoiba mugažo. Venäman avtosodavägiden palakund nomer 20115 seižub lidnas.

Geografijan andmused

Lidn sijadase rajonan keskuzpalan suves, Tün' Sosn-jogen hural randal (ven.: Ти́хая Сосна́ 161 km pitte, Don-jogen oiged ližajogi), 110 m ü.m.t. keskmäižel korktusel.

Matkad Donhasai om vižtoštkümne kilometrad pohjoižpäivnouzmha, Belgorodan agjhasai om 13 km päivlaskmha orhal. Matkad Voronežhasai om 88 km pohjoižhe orhal, 113 km avtotel vai 120 raudtel. Lähembaine lidn om Liski 32 km päivnouzmha-pohjoižpäivnouzmha orhal, 57 km avtotedme vai 40 km raudtedme. Ostrogožsk-raudtestancii radab lidnan suvipäivnouzmaižel röunal.

Tobmuz

Kaik koume žilod i koume futorad mülüdas lidnankundha Ostrogožskan ližaks: Vološino-žilo (582 rist. vl 2010), Uz' Mellic-žilo (ven.: Новая Мельница, 316 eläjad sil-žo vodel), Trud-žilo (61 rist.), Samopomošč-futor (47 rist.), Lobkin- i Ušakov-futorad (üksin eläjin). Lidnankundan pind — 192,76 km².

Lidnankundan tobmuden pämez' om Rahvahandeputatoiden nevondkundan ezimez'. Edeližed nevondkundan ezimehed oma Svetlana Podlesnaja (vn 2023 sulaku-reduku), Jevgenii Švecov (keväz'ku 2017 — keväz'ku 2023). Lidnan Administracijan pämez' om Aleksandr Kolesnikov vspäi 2012.

Eläjad

Vl 1913 lidnan ristitišt oli 23 900 eläjad. Vn 2010 Venäman rahvahanlugemižen mödhe lidnan eläjiden lugu oli 33 842 ristitud, lidnankundan — 34 851 ristitud, rajonan viž ühesandest, vn 2021 lidnan — 31 699 ristitud. Kaik 32 714 ristitud elihe lidnas i 33 637 ristitud kaikes lidnankundas vl 2017. Kaikiš suremb lidnan ristitišt oli enamba 33 tuhad eläjid vl 1967 i 32..34 tuhad eläjid vll 1979−2018 (34 900 rist. vl 1992).

Rahvahad (2010): venälaižed — 97,5 %, ukrainalaižed — 1,2 %, toižed rahvahad — 1,3 %.

Rahvahad (enamba 0,4 % vl 2021): venälaižed — 93,4 %, toižed rahvahad — 2,3 %, rahvahuden ozutandata — 4,3 %.

Ortodoksižen hristanuskondan seičeme pühäpertid oma kaičenus i saudud lidnas: ph. Tihon Donantagaižen päjumalanpert' (om saudud vl 1868), viž jumalanpertid i časoun'. Niiden ližaks Eläban Eziauguižen Stroican päjumalanpert' i kuz' jumalanpertid ei ole kaičenus.

Lapsiden opendusen aluzkundad oma viž nomeruidud päivkodid (nomer 1, 2, 8, 11, 15), viž keskškolad (nomer 1, 2, 4, 6, 8), lapsiden sädamižen keskuz, čomamahtoiden škol, sportškol. Ortodoksižen hristanuskondan hengeližvauktustuzkeskuz om avaitud vspäi 2022. Ostrogožskan medicinine kolledž i Ostrogožskan äiprofil'ne tehnikum oma lidnan professionaližen opendusen aluzkundoikš.

Galerei

• 
  Tün' Sosn-jogi lidnas (2011)
• 
  Ph. Tihon Donantagaižen päjumalanpert', vn 2011 nägu
• 
  Medicinine kolledž vl 2010
• 
  Lidnansadun verajad (2011)
• 
  Kodirandantedištandmuzei i lämoipalonvastaine palakund vl 2011

Irdkosketused

• Lidnankundan tobmuden aluzkundoiden sait (ostrogozhsk-r20.gosweb.gosuslugi.ru). (ven.)