Kalač Donal

Kalač Donal
Калач-на-Дону

Lidnanznam
Valdkund	Venäma
Eläjiden lugu (2017)	24,237 ristitud
Pämez'	Vladimir Krištal' (kezaku 2010—)
Telefonkod	+7−84 472-xx-xxx
Avtokod	34, 134
Aigvö	UTC+3 (MSK+0)

Kalač Donal (ven.: Калач-на-Дону) om Venäman lidn Volgogradan agjan suvipäivlaskmas. Se om Kalačun rajonan i lidnankundan administrativine keskuz. Om sodahoštusen lidnan arvnimenke vspäi 2010.

Istorii

Eländpunktan aluz om pandud vl 1708 kuti kozakoiden Kalač-futor. Vl 1862 sauvoihe raudted Caricinaspäi (Venäman kahtenz' raudte), i Kalač šingotaškanzihe torguindžiloks. Vl 1951 se sai lidnan statusad nügüdläiženke nimenke erištamha Voronežan agjan Kalač-lidnaspäi.

Kalačun Donal ižandusen päsarakod oma laivansauvoimne da laivoiden kohenduz, turizm da sömtegimišt. Metalližkonstrukcijoiden tegim i mebel'fabrik oma olmas mugažo.

Geografijan andmused

Lidn sijadase Don-jogen kändman hural randal läz Cimlänskan vezivaradint (ani suvipäivlaskmha), 40 m keskmäižel korktusel valdmeren pindan päl. Matkad Volgogradan röunhasai om 62 km päivnouzmha orhal, 72 km avtotedme.

Pen' Lebupert'-žilo (104 rist. vl 2017) mülüb lidnankundha Kalačun Donal ližaks. Lidnankundan pind — 74,2 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 26 910 ristitud (kaikiš suremb ristitišt), rajonan nell' ühesandest. Vozil 2002−2013 lidnan ristitišt oli enamba 26 tuhad.

Professionaližen opendusen aluzkundad: tehnikum-internat ristituiden röunatud voimusidenke täht i profškol.

Transport

Donskai-raudtestancii om lopstancii Volgograd — Kalač Donal raudtel. Volgan da Donan kanalan agj om ani suvhe lidnaspäi. Jogiport om lidnas. Vspäi 1976 avtotesild ühtenzoitab Donan randoid.

Irdkosketused

• Lidnan tobmuden aluzkundoiden oficialine sait (калачгорадмин.рф). (ven.)