Novoanninskii

Novoanninskii
Новоаннинский
Valdkund	Venäma
Eläjiden lugu (2021)	15,351 ristitud
Pind	24,08 km²
Pämez'	Sergei Jegorov; (sulaku 2021—)
Telefonkod	+7−84 447-xx-xxx
Avtokod	34, 134
Aigvö	UTC+3 (MSK+0)

Novoanninskii (ven.: Новоа́ннинский) om Venäman lidn da lidnankund Volgogradan agjan lodehes. Se om Novoanninskijan rajonan administrativižeks keskuseks da palaks.

Istorii

Eländpunktan aluz om pandud vl 1872 kuti Samsonovskii-futor läz Filonovo-raudtestancijad. Vl 1918 udesnimitihe futorad Novo-Annenskai-stanicaks. Vn 1936 elokun 1. päiväl kätihe sidä Novo-Annenskii-radnikžiloks. Vn 1956 14. päiväl kezakud radnikžilo sai lidnan statusad nügüdläiženke nimenke, vspäi 1960 sen kirjutandan toižend tegese nügüdläižikš.

Novoanninskijan ižandusen päsarakod oma sömtegimišt (pühävoin tegim, pühävoinümbriradai tegim, lihakombinat, leibtegim) da elektromedicinižladimišton pästand^[1]. Ende valamižmehanine tegim i savičun tegim radoiba mugažo.

Geografijan andmused

Lidn sijadase rajonan keskuzpalas, Buzuluk-jogen hural randal (ven.: Бузулук 314 km pitte, Hopran hura ližajogi, Donan bassein), 87 m ü.m.t. keskmäižel korktusel.

Filonovo-raudtestancii om «Volgograd — Povorino (Voronežan agj)»-keskustal vspäi 1870. Matkad Volgogradhasai om 254 km suvipäivnouzmha «Kaspii»-avtotedme (R22, edel 2018. vot M6), kudamb ümbärdab lidnad ani päivlaskmaspäi, vai raudtedme. Lähembaižed lidnad oma Mihailovk 75 km suvipäivnouzmha avtol i Urüpinsk vižkümnes vides kilometras lodeheze orhal.

Klimat om ven kontinentaline. Voden keskmäine lämuz om +6,9 C°, kezakun-elokun +19,9..+21,8 C°, tal'vkun-uhokun −5,4..−9 C°. Paneb sadegid 453 mm vodes, enamba kezakus-heinkus (46..51 mm kus), vähemba uhokus-keväz'kus (25 mm kus).

Tobmuz

Pen' Novoanninskijan maižanduztehnikuman učhozan žilo (kahesa ristitud vl 2017) mülüb lidnankundha Novoanninskijan ližaks. Lidnankundan pind — 63,31 km².

Lidnankundan tobmuden pämez' om sen Administracijan pämez', hänen valdatusiden strok om viž vot. Edeline lidnan Administracijan pämez' om Aleksandr Türin (reduku 2011 — sulaku 2021). Lidnan Dum kogoneb 15 deputataspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 17,912 ristitud, kaiken lidnankundan — 17,920 ristitud, rajonan pol', vn 2021 lidnan — 15,351 ristitud. Vl 2017 kaik 16,436 ristitud eliba lidnas. Kaikiš suremb lidnan ristitišt oli enamba 20 tuhad vozil 1967−2001 (20,932 rist. vl 1979).

Ortodoksižen hristanuskondan kaks' pühäpertid^[2] oma avaitud lidnas: ph. Feofan-eriželäjan jumalanpert' (om saudud vll 2000−2017) i Jumalanmaman Emäganpäivän časoun'.

Openduz

Lapsiden opendusen aluzkundad oma koume nomeruidud päivkodid (nomer 1, 4, 5), nell' keskškolad (nomer 1, 2, 4, 5), Novoanninskijan gimnazii, čomamahtoiden škol (koume palakundad: muzik, horeografii, kuvadamižčomamaht), lapsiden da norišton sportškol, radon lapsidenke da norištonke keskuz.

Novoanninskijan maižanduzkolledž^[3] om lidnan professionaližen opendusen aluzkundaks.

Galerei

Rahvahanikoiden sodan ühtnijoiden i pölištunuziden Stalingradan toras nevondkundaližiden sodamehiden velleskaum (2018)
Federaline R22 «Kaspii»-trass lidnas vl 2007
Filonovo-stancijan nägu raudteiden polespäi vn 2023 sulakus

Homaičendad

Irdkosketused

Novoanninskijan lidnankundan tobmuden sait (city-newanna.ru). (ven.)

Novoanninskii Vikiaitas

	Volgogradan agjan lidnad
	Dubovk \| Frolovo \| Kalač Donal \| Kamišin \| Kotel'nikovo \| Kotovo \| Krasnoslobodsk \| Leninsk \| Mihailovk \| Nikolajevsk \| Novoanninskii \| Pallasovk \| Petrov Val \| Serafimovič \| Surovikino \| Žirnovsk \| Urüpinsk \| Volgograd \| Volžskii

[1] Novoanninskan «EMA»-tegimen sait (nzema.ru). (ven.)

[2] Novoanninskijan pühäpertid sobory.ru-saital. (ven.)

[3] Novoanninskijan maižanduzkolledžan sait (novshk.ucoz.ru). (ven.)

[1]

[2]

[3]