Volžskii

Volžskii
Волжский

Lidnanznam	Flag
Valdkund	Venäma
Eläjiden lugu (2025)	313,034 ristitud
Pind	229,12 km²
Pämez'	Igor' Voronin (2000−2009, sügüz'ku 2013—)
Telefonkod	+7−8443-xxx-xxx
Avtokod	34, 134
Aigvö	UTC+3 (MSK+0)

Volžskii (ven.: Во́лжский) om Venäman lidn da lidnümbrik Volgogradan agjan suves. Se om agjan kahtenz' surtte lidn, om konurbacijas Volgogradanke, mülüb Volgogradan lidnaglomeracijha (1,4 mln rist.).

Istorii

Nügüd'aigaižen eländpunktan aluz om pandud vl 1951 Bezrodnoje-žilon sijas (se-žo Üläahtub i Üläahtuban lidnut) kuti Volžskii-žilo sauvomha Volgan GES:ad (sil aigal Stalingradan GES, sauvomine jätksihe vozil 1950−1961). Vn 1954 heinkun 22. päiväl žilo koumekümnetuhiženke ristitištonke sai lidnan statusad Venäman NFST:n Ülembaižen Nevondkundan Prezidiuman käskön mödhe.

Volžskijan ižandusen päsarakod oma gidro- da lämuzenergetik, himine tegimišt, transportmašinoidensauvomine, sömtegimišt, mugažo pörutügidentegim i teraztor'viden tegim oma saudud.

Geografijan andmused

Keskmäižen Ahtuban rajonan sijaduz agjas vn 2010 kartal. Volžskii om vauktaks läipäks päivlaskmha rajonan keskuzpalaspäi

Lidn sijadase Ahtub-jogen hural randal (ven.: А́хтуба 537 km pitte, Volgan hijam), Volgogradad vaste, 20 m ü.m.t. keskmäižel korktusel.

Röunatab Volgogradanke päivlaskmas Volgan vastrandal. Matkad Volgogradan keskuzpalhasai om kaks'kümne kilometrad suvipäivlaskmha. Lidn om ümbärtud Keskmäižen Ahtuban rajonan territorijal ičeze randal.

Tobmuz

Volžskii om lidnümbrikon üks'jäižeks eländpunktaks. Se jagase 38 lidnanlaptaks, 45 fartalaks da ühesaks žiloks.

Eläjad

Vn 2010 Venäman rahvahanlugemižen mödhe lidnan eläjiden lugu oli 314,255 ristitud, vn 2021 — 321,479 ristitud. Vl 2017 kaik 326,055 ristitud eliba lidnas. Kaikiš suremb lidnan ristitišt oli 327,356 ristitud vl 2013, Krasnooktäbr'skii- i Ural'skii-žiloiden ühtištusen lidnanke jäl'ghe.

Rahvahad (enamba 0,4 % vl 2010): venälaižed — 90,8 %, ukrainalaižed — 1,4 %, kazahlaižed — 0,8 %, armenijalaižed — 0,8 %, totarlaižed — 0,8 %, uzbekalaižed — 0,5 %, azerbaidžanlaižed — 0,5 %, toižed rahvahad — 2,4 %, rahvahuden ozutandata — 2,0 %.

Ortodoksižen hristanuskondan phh. Sergii i German Valaamalaižiden mez'jumalankodi i üks'toštkümne pühäpertid oma olmas lidnas: ühesa jumalanpertid, časoun' i valatusiden pühäpert'. Severz'-se protestantizman pühäpertid ratas. Islaman uz' pühäpert' (pämečet') om avaitud Vihand sar'-lidnanlaptas vspäi 2020.

Openduz

Lapsiden opendusen aluzkundad oma 48 päivkodid, 28 keskškolad.

Professionaližen opendusen aluzkundad oma Volžskijan medkolledž, Volžskijan politehnine tehnikum, Volžskijan mašinansauvomižen tehnikum. Volgogradan i Moskvan üläopendusen aluzkundoiden seičeme filialad oma avaitud.

Transport

Avtobusad da tramvaid oma kundaližeks transportaks lidnas. Elektrojonused ühtenzoittas lidnad Volgogradanke.

Ühtennimine Volžskii-raudtestancii om saudud «Volgograd — Alabaskunčak»-jonol. Järed jogiport radab lidnas. Raudte- da avtotesild ühtenzoitab jogen randoid, se mäneb Volgan GES:an padoseinän ülähädme.

Galerei

• 
  Lidnümbrikon Administracijan sauvuz (2021)
• 
  Leninan prospekt om kaikiš pidemb ird lidnas
• 
  Ph. Serafim Sarovalaižen pühäpert', vn 2011 nägu (ortodoksine hristanuskond)
• 
  Baptizman pühäpert', vn 2021 nägu
• 
  Volgan GES vl 2005
• 
  Volžskan tor'vtegimen pätulend vl 2011
• 
  «Volgabas-Volžskii»-avtobustegim vl 2021
• 
  Gidrosauvojiden kul'turkeskuz puištonke (2020)
• 
  Klinine läžundkodi nomer 1 (2021)
• 
  Volžskii-päraudtestancijan sauvuz da torg senno vl 2022

Irdkosketused

• Volžskii-lidnan Duman oficialine sait (dumavlz.ru). (ven.)
• Volžskii-lidnan Administracijan oficialine sait (admvol.ru). (ven.)