Kadujan ümbrik

Kadujan ümbrik
Кадуйский округ

Znam	Flag
Valdkund	Venäma
Administrativine keskuz	Kadui
Eläjiden lugu (2023)	16,512 ristitud
Pind	3,262,62 km²

Kadujan ümbrik (ven.: Ка́дуйский о́круг) om ümbrik (edel vn 2022 kezakud — rajon) Venäman Vologdan agjas.

Administrativine keskuz om Kadui-žilo, otab ümbrikon ristitišton kaks' koumandest.

Istorii

Ümbrikon aluz om pandud kut rajon vn 1927 elokun 1. päiväl Leningradan agjan Čerepovecan ümbrikos. Vn 1930 heinkun 23. päiväl heittihe ümbrikod, i vhesai 1937 rajon mülüi Leningradan agjaha kut administrativine ühtnik. Vn 1937 sügüz'kun 23. päiväspäi mülüb Vologdan agjaha. Vozil 1962−1965 rajonan territorii mülüi Babajevon rajonha. Ümbrik om olmas nügüdläižiš röunoiš vspäi 1965.

Geografijan andmused

Kadujan ümbrik om Vologdan agjan suvipäivlaskmaine taho. Pind — 3 262,62 km². Mec otab territorijan nell' videndest.

Om röunoid nellänke Vologdan agjan ümbrikonke i rajonanke:

• päivnouzmas da suvipäivnouzmas Čerepovecan rajonanke;
• suvipäivlaskmas Ustüžnan ümbrikonke;
• päivlaskmas Babajevon ümbrikonke;
• pohjoižes Belozerskan ümbrikonke.

Znamasine jogi om Sud sen ližajogidenke (Andog, Kolp' da tž.). Se läbitab ümbrikod lodehespäi suvipäivnouzmha. Kaik joged mülüdas Sudanjogen (Kaspijan meren) basseinha.

Reljef om tazo süvidenke jogialangoidenke.

Londuseližed varad oma turbaz, sauvondmaterialad (mouckivi, sauvondkivi, letked, saved), mec, reskvezi.

Tobmuz

Vn 2015 keväz'kun 25. päiväspäi rajonan territorii jagoihe nelläks municipaližeks ühtnikaks: kaks' lidnankundad i kaks' küläkundad. Kaik ned oma kätud ümbrikon territorialižikš palakundoikš vn 2022 kezakuspäi.

Vspäi 1991 Nikolai Dekteröv radoi rajonan da sen administracijan pämehen kudenden strokun jäl'geten. Kaik rahvaz valiči rajonan pämest videks vodeks. Kaik nell' ohjandust da nell' komitetad alištuiba rajonan administracijale.

Käskusenandai tobmuz om ümbrikon parlament — Municipaline Suim (ven.: Муниципальное Собрание) 15 ühtnijanke. Heiden kesken niken ei rada Suimas kaikenaigašti. Kaik rahvaz valičeb heid nelläks vodeks. Sergei Lukjančenko radoi Suiman ezimehen vl 2015.

Järgvaličendad Municipaližhe Suimha oliba vn 2012 keväz'kun 4. päiväl. Valitihe rajonan pämest järgkerdan vn 2013 sügüz'kun 8. päiväl. Enččed valičendad oliba vozil 1996, 1999, 2003 da 2008.

Eläjad

Vn 2002 Venäman rahvahanlugemižen mödhe rajonan eläjiden lugu oli 18 653 ristitud, vn 2010 — 17 754 ristitud, vn 2021 — 16 549 ristitud. Kaik 16 961 eläjad oli rajonas vl 2017. Lidnalaižed ottas nell' videndest ristitištos.

Rahvahad (enamba 0,4 % vl 2021): venälaižed — 93,6 %, ukrainalaižed — 0,5 %, toižed rahvahad — 2,4 %, rahvahuden ozutandata — 3,5 %.

Kaik om 202 eländpunktad ümbrikos, niiden kesken kaks' lidnanvuittušt žilod, kuz' žilod, 191 küläd, kaks' raudtestancijad da üks' raudtesarak. Niišpäi 63 küläd seištas kaikenaigaižeta ristitištota.

Toine sur' eländpunkt om lidnanvuitte Hohlovo-žilo (2,4 tuh. rist. vl 2015).

Ižanduz

Ümbrikon kaikiš suremb edheotand om Čerepovecan GRES. Se om kaikiš suremb elektrostancii Vologdan agjas, londuseline gaz om sen poltuseks. Toižed ižandusen sarakod oma raudte- da gazanveimtransport, mecan varhapanend da süvä ümbriradmine, sömtegimišt da maižanduz, metallkonstrukcijoiden tehmine, turizm.

Irdkosketused

• Kadujan ümbrikon tobmuden sait (35kaduyskij.gosuslugi.ru). (ven.)
• Kadujan ümbrik agjan oficialižel vologda-oblast.ru-portalal. (ven.) (angl.)