Tot'man rajon

Tot'man rajon
Тотемский район

Znam	Flag
Valdkund	Venäma
Administrativine keskuz	Tot'm
Eläjiden lugu (2015)	23,083 ristitud
Pind	8,393,44 km²

Tot'man rajon (ven.: Тотемский район) om rajon Vologdan agjas.

Administrativine keskuz om Tot'm-lidn. Rajonan ristitišton pol' eläb siš da läz sidä.

Istorii

Rajonan aluz om pandud vl 1929 heinkun 15. päiväl Pohjoižen randan Vologdan ümbrikho. Vl 1930 heinkun 30. päiväl heitihe ümbrikod, i vhesai 1936 rajon mülüi Pohjoižhe randha kuti administrativine ühtnik, sid' vozil 1936−1937 — Pohjoižhe agjaha. Vs 1937 sügüz'kun 23. päiväspäi mülüb Vologdan agjaha. Rajon om olmas nügüdläižiš röunoiš vspäi 2006.

Geografijan andmused

Tot'man rajon om Vologdan agjan päivnouzmaine taho. Pind — 8 393 nellikkilometrad (koumanz' surtte agjas). Mecad ottas territorijan ühesa kümnendest (7361 km²), se om kaikiš suremb mülü agjas. Koivikod da kavag'mec oma enambuses. Soiden pind om seičeme procentad.

Om röunoid kahesanke Venäman rajonanke:

• pohjoižpäivnouzmas Vologdan agjan Nüksenican rajonanke;
• päivnouzmas Vologdan agjan Babuškinan rajonanke;
• suves Kostroman agjan Soligaličun rajonanke;
• suvipäivlaskmas Vologdan agjan Jogidenkeskeižen rajonanke;
• päivlaskmas Vologdan agjan Sokolan da Sämžan rajonidenke;
• lodehes Vologdan agjan Verhovažjen rajonanke;
• pohjoižes Vologdan agjan Tarnogan rajonanke.

Znamasižed joged oma Suhon sen Carev- (hura) da Tolšm- (oiged) ližajogidenke. Jogiden tobj pala mülüb Pohjoižen Dvinan (Jävaldmeren) basseinha, pen' pala suves — Volgan (Kaspijan meren) basseinha. Kaik om kuz' järved rajonas.

Londuseližed varad oma turbaz, sauvondmaterialad (letked, saved, gravii), keitandsol, mec, reskvezi.

Vs 2015 kezakun 1. päiväspäi rajonan territorii alajagase 7 municipaližhe ühtnikha: 1 lidnankundha da 6 küläkundha.

Tobmuz

Vs 2012 keväz'kun 14. päiväspäi Sergei Selänin om valitud i radab rajonan da sen administracijan pämehen. Kaks' rajonan varapämest oma hänele abhu. Viž ohjandust, kaks' komitetad, 11 palakundad da 5 laudkundad alištudas rajonan administracijale.

Käskusenandai tobmuz om Municipaline Suim (ven. Муниципальное собрание) 18 ühtnijanke. Kaik rahvaz valičeb heid nelläks vodeks. Järgvaličendad sihe oliba vl 2012 keväz'kun 4. päiväl. Valentin Novosölov radab sen ezimehen vl 2015.

Eläjad

Vn 2010 Venäman rahvahanlugemižen mödhe eläjiden lugu oli 23 315 ristitud.

Kaik om 226 eländpunktad rajonas, sidä kesken üks' lidn, 16 žilod, 207 küläd da 2 futorad.

Toižed järedad eländpunktad oma Jubileinii-žilo (1,6 tuh. rist. vl 2002) da Sovetskii-žilo (1,4 tuh. rist. vl 2002).

Ižanduz

Rajonan ižandusen päsarakod oma jogi- da tor'vikveimtransport, turizm, maižanduz da sömtegimišt, mecan varhapanend da ümbriradmine (pilindmaterialad, strubad).

Irdkosketused

• Tot'man rajonan oficialine portal (totma-region.ru). (ven.)
• Tot'man rajon agjan ohjastusen oficialižel vologda-oblast.ru-portalal. (ven.) (angl.)