Bandung

Bandung
Kota Bandung
Lidnanznam;	Flag;
Valdkund	Indonezii
Eläjiden lugu (2021)	2,452,943 ristitud
Pind	167,31 km²
Pämez'	Muhammad Farhan; (uhoku 2025—)
Telefonkod	+62−22
Aigvö	UTC+7

Bandung (indonez.: Kota Bandung [ˈbɑːndʊŋ], alam.: Bandoeng) om lidn Indonezijan suvipäivlaskmas. Se om valdkundan nellänz' lidn eläjiden lugun mödhe, om Päivlaskmaine Jav-agjan administrativižeks keskuseks da palaks.

Istorii

Eländpunkt mainitase vspäi 1488. Ezmäine Indonezijan raudte ühtenzoiti Batavijanke (nüg. Džakart) vl 1880, sil aigalpäi regionan tekstiline tegimišt šingotaškanzihe. Vl 1906 Bandung sai erištadud municipalitetan statusad. Oli kurortaks kolonialižen aigan.

Bandung šingotase lebuturizmal, dizaintavaroiden penil edheotandoil, farmaceftižel sarakol, sömtegimištol. Läz 50 üläopendusen aluzkundad ratas lidnas.

Geografijan andmused

Lidn sijadase agjan keskuzpalas, 665..1050 metrad korktusil, 708 m ü.m.t. keskmäižel korktusel, om ümbärtud vulkanoil 2400 metrhasai ü.m.t. kortte. Matkad Džakarthasai om 140 km lodeheze.

Klimat om tropine mussonine päivoikaz, subtropižen mägiden röunal. Kun keskmäine lämuz om +23,8..+24,9 C° vodes läbi. Ekstremumad oma +11,1 C° (kezaku-sügüz'ku) i +34,4 C° (reduku). Paneb sadegid 2316 mm vodes, enamba keväz'kus-sulakus (276..343 mm kus) i kül'mkus-tal'vkus (274..330 mm kus), vähemba heinkus-sügüz'kus (60..85 mm kus). Kun keskmäine relätivine nepsuz vajehtase 73..76 % röunoiš heinkus-redukus, 80..83 % kül'mkus-semendkus, 78 % kezakus.

Tobmuz

Bandung jagase koumekümneks nimitadud ümbrikoks (indonez.: kecamatan), 153 küläd (kelurahan) alištudas lidnan tobmudele.

Lidnan tobmuden pämez' om vali (indonez.: walikota, Wali Kota Bandung), kaik lidnalaižed (vspäi 2008) valitas händast radnikusele videks vodeks. Vali om Administracijan pämehen. Edeližed lidnan pämehed om Jana Muljana (Yana Mulyana, tal'vku 2021 — sulaku 2023), oli Oded Muhammad Danial (sügüz'ku 2018 — tal'vku 2021, koli sil-žo kul). Lidnan suim (DPRD Kota Bandung, Bandung-lidnan regionaline Edestajiden Kodi) kogoneb 50 ühtnijaspäi. Enamba mi 20 tuhad radnikoid om lidnan tobmuden aluzkundoiš (vn 2003 andmused).

Eläjad

Vn 2010 Indonezijan rahvahanlugemižen mödhe lidnan eläjiden lugu oli 2,394,873 ristitud, vn 2021 — 2,452,943 ristitud. Kaikiš suremb lidnan ristitišt om nügüd'. Kaik 8,3 mln eläjid om ezilidnoidenke 487 km² pindal, kaik om 11,8 mln ristituid lidnaglomeracijas 1876 km² pindal (2021, kahtenz' surtte valdkundas).

Religijan mödhe (2021): islamanuskojad — 92 %, protestantizman polenpidajad — 5 %, katolikad — 2 %, toižed uskojad — 1 %.

Irdkosketused

Lidnan oficialine sait (bandung.go.id). (indonez.)

Bandung Vikiaitas