Baotou

Baotou
包头 *(Bāotóu)* (kit.)
/ Бугат (mong.)
Valdkund	Kitai
Eläjiden lugu (2020)	2,709,400 ristitud
Pind	27,768 km²
Telefonkod	+86−472
Aigvö	UTC+8

Baotou (kit.: 包头 Bāotóu, mong.: Бугат) om lidn da lidnümbrik Kitain pohjoižes. Mülüb Südäimongolijan avtonomižhe agjaha.

Istorii

Eländpunktan aluz om pandud vl 1809 kuti Baotou-žilo. Vl 1923 raudte tuli žilho. Kätihe lidnaks vl 1932.

Baotou om harvmametalloiden samižen keskuz. Metallurgine i himine tehmižed ratas lidnümbrikos.

Geografijan andmused

Lidnümbrik sijadase läz Mongolijan suviröunad. Lidn om saudud lidnümbrikon suvipäivlaskmas, Huanhen keskjoksmusen hural randal, 1050..1100 ü.m.t. korktusil. Avtonomižen agjan administrativižen Huh-Hoto-keskusen lidnümbrik levigandeb ani päivnouzmha Baotouspäi.

Klimat om kontinentaline kuiv, päivoikaz vodes läbi. Voden keskmäine lämuz om +8,0 C°, kezakun-elokun +21,8..+24,0 C°, tal'vkun-vilukun −8,5..−10,6 C°. Ekstremumad oma −31,4 C° (viluku) i +40,4 C° (kezaku, heinku). Kezaaigan minimum om +3,2 C° (kezaku), tal'vaigan maksimum om +16,3 C° (uhoku). Ei voi panda halad kezakus-elokus vaiše. Paneb sadegid 307 mm vodes, enamba heinkus-elokus (70..79 mm kus), vähemba kül'mkus-keväz'kus (2..7 mm kus). Paneb lunt tal'ven 17 päiväs. Kun keskmäine relätivine nepsuz vajehtase 35..45 % röunoiš keväz'kus-kezakus, 57..62 % toižiš kuiš.

Eläjad

Vl 2010 lidnümbrikon eläjiden lugu oli 2,650,364 ristitud, nellänz' surtte avtonomižes agjas. Vl 2020 lidnan ristitišt oli 2,261,089 eläjad 2662 km² pindal.

Rahvahad (2020): han' — 93,2 %, mongolad — 4,2 %, toižed rahvahad — 2,6 %.

Südäimongolijan Tedon da tehnologijan universitet^[1] radab lidnas vspäi 2003 (kit.: 内蒙古科技大学 Nèiménggǔ kējì dàxué, angl.: IMUST, 23..25 tuhad üläopenikoid), sen aluz om pandud vl 1958 kuti Baotoun tehnologine institut.

Galerei

Lidnümbrikon tobmuden sauvuz (sügüz'ku 2004)
Buddizman Badekar-jumalankodi (vai Udan, Guanczüe, om saudud 18. voz'sadan ezmäižes poles), vn 2005 heinkun nägu
Lidnümbrikon kundaližen varuitomuden büro (uhoku 2008)
Keskškol nomer 8 (heinku 2011)
Baotou-päraudtestancijan sauvuz vl 2015