Džafn (lidn)

Džafn
யாழ்ப்பாணம் (tamil.)
යාපනය (singal.)
Valdkund	Šrilank
Eläjiden lugu (2012)	88,138 ristitud
Pind	20,2 km²
Pämez'	Vivekanandaraja Madivadani; (kezaku 2025—)
Telefonkod	+94-(0)21
Aigvö	UTC+5:30

Sil sanal voib olda toižid znamoičendoid; miše nähta niid, tulgat tänna.

Džafn (tamil.: யாழ்ப்பாணம் [jaːɻpːaːɳɐm], vepsän kirjamil Jāḻppāṇam, singal.: යාපනය [jaːpənəjə], vepsän kirjamil Jāpanaja) om lidn Šrilankan pohjoižes. Se om Pohjoižen agjan administrativižeks keskuseks da palaks.

Istorii

Amuine Kadiramalai-eländpunkt (nüg. Kandarodai) mainitase saren «Mahavams»-aigkirjas (5. voz'sada EME — 4. voz'sada m.e.). Oli tamilan kunigahusiden pälidnaks, sen jändused oma löutud 10 kilometras Džafnaspäi. Nallur (nüg. koumes kilometras suvhe Džafnan keskusespäi) oli Džafnan kunigahusen (1215–1624) pälidnaks.

Nügüdläine eländpunkt om kirjutadud 15. voz'sadan aigkirjas Jalpaanajanpaddinam-nimitusenke, möhemba Jalpanapattinam. Evropižed torgovanad otiba kävutamižhe sen kalanpüdandan portad, i žilo šingotaškanzihe torguindan sijaks. Vhesai 1981 Azijan järed kirjišt oli Džafnas, polttihe sidä, se azj toižiden keskes vei verevannoks rahvahanikoiden sodannoks valdkundan pohjoižes (1983−2009), lidn oli muretud sen aigan.

Geografijan andmused

Lidn sijadase agjan i Šrilank-saren pohjoižes, Džafnan pol'sarel, Džafnan lagunan randal, viž metrad ü.m.t. keskmäižel korktusel.

Matkad ekonomižhe Kolombo-pälidnhasai om 396 km suvhe, lidnad ühtenzoitasoiš avtotel, raudten, lendimportan i meriehtatimen reisil.

Klimat om tropižen savannan kaks'sezonine. Voden keskmäine lämuz om +28,3 C°, kun keskmäine lämuz vajehtase +25,5..+30,3 C° röunoiš voden aigan. Ekstremumad oma +16,2 C° (tal'vku-keväz'ku) i +38,7 C° (sulaku). Il'man lämuz voib ületada +35 C° miččel taht kul päiči tal'vkus (maksimum +32,2 C°), ei voi olda madalamb mi +20 C° sulakus-redukus. Paneb sadegid 1369 mm vodes, vihmsezon tuleb redukus-tal'vkus (235..437 mm kus) pohjoižpäivnouzmaižen mussonanke, kuivahk sezon oleskeleb vilukus-elokus (26 mm uhokus i 19..23 mm kezakus-heinkus).

Eläjad

Vl 2007 lidnan eläjiden lugu oli 83,563 ristitud (12. sija), vl 2012 — 88,138 ristitud. Edel rahvahanikoiden sodad Džafn oli saren nellänz' lidn eläjiden lugun mödhe (118,224 rist. vl 1981). Kaikiš suremb lidnan ristitišt oli 149 tuhad eläjid vl 1994.

Tamilad oma enambuses lidnas sodan jäl'ghe, heiden viž kudendest oma induizman uskojad. Murad oliba islamanuskojad-sunnitad. Om buddizman uskojid i hristanuskojid mugažo (singaloiden tobj pala), katoline diocez baziruiše lidnas. Om sijaližiden religijoiden jumaloid lähižiš küliš.

Irdkosketused

Municipalitetan oficialine sait (jaffna.mc.gov.lk). (tamil.) (singal.) (angl.)

Džafn (lidn) Vikiaitas