Elankur

Elankur
Élancourt
	Lidnanznam;
Valdkund	Francii
Eläjiden lugu (2019)	25,624 ristitud
Pind	9,79 km²
Pämez'	Žan-Mišel' Furgus; (sulaku 1996—,; mandat 2020−2026,; Jean-Michel Fourgous)
Telefonkod	+33-
Aigvö	tal'vel UTC+1,; kezal UTC+2

Elankur (franc.: Élancourt [elɑ̃kuʁ]) om Francijan lidn da kund (kommun) Il'-de-Frans-regionas, sen Ivelin-departamentas. Mülüb Parižan lidnaglomeracijha.

Etimologii

Ezmäine Elan-element sel'gitase saksan Agilenus-antroponiman (fr. Aglin) suližel toižetamižel, voib jäl'gestada sidä dokumentoiš 11. voz'sadaspäi. Lopuline -court (latin.: cōrtem) znamoiči «tanaz», «aidoitud ižanduz», «küläusadib».

Kogonaine nimituz kändase «Aglinan aidoitud futor», «Aglinan maižanduz». Fermeruz oli Elankuran eläjiden radmižen 20. voz'sadahasai.

Istorii

Voz'sadoiš Elankur oli küläks i žiloks vähemb mi tuha eläjiden lugunke. Privatižed sauvondkompanijad zavodiba leta pertid 1970-nzil vozil Parižan «uden lidnan» koncepcijan ramuziš, i ristitišt ližadui kümenikoid kerdoid. Ei jänd erigoittud külid lidnankundas.

Lidnan znamasine Klef-de-Sen-Pjer-tegimištzon mülütab 5400 radinsijid koumekümnes kontoras i tehmižlavudes. Dominirui industrii om aeronaftik i korktoiden tehnologijoiden, sidä kesken nened kompanijad: Airbus, Thales, Fenwick.

Geografijan andmused

Lidn sijadase valdkundan pohjoižes, 100..175 m ü.m.t. keskmäižel korktusel. Elankur-kukkaz om Il'-de-Frans-regionan kaikiš korktemb čokkoim, 231 m ü.m.t.. Tehtas voibištelendoid sen pautkil: mägivelosiped, paraplanerizm, planeroiden radiomodelid.

Kaks' znamasišt raudtestancijad ratas läz lidnad lähižiš kundoiš. Matkad Parižan keskuzpalhasai om koumekümne kilometrad päivnouzmha, Versalihesai om 16 km päivnouzmha.