Fort Loderdeil

Fort Loderdeil
Fort Lauderdale
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2020)	182,760 ristitud
Pind	94,01 km²
Pämez'	Din Trantalis; (keväz'ku 2018—,; Dean Trantalis)
Telefonkod	+1−754, +1−954
Aigvö	tal'vel UTC−5,; kezal UTC−4

Fort Loderdeil (angl.: Fort Lauderdale [ˌfɔrt ˈlɔːdərdeɪl]) om AÜV:oiden kurortlidn Florid-štatan suvipäivnouzmas. Se om Brauard-ümbrikon administrativine keskuz da kaikiš suremb lidn.

Istorii

Eländpunktan aluz om pandud koumeks lidnuseks (fortaks) vl 1838 Kahtenden Seminolan sodan aigan (1835−1842) sijaližid indejalaižid vaste. Fortad oliba nimitadud Uil'jam Loderdeil-majoran kanzannimen mödhe (William Lauderdale, 1782–1838). Sodan jäl'ghe ned oliba okaidud pol'voz'sadaks. Eländpunkt sai lidnan statusad oficialižešti vn 1911 27. päiväl keväz'kud.

Fort Loderdeil šingotase lebuturizmal vodes läbi (kül'bendrandan üks'toštkümne kilometrad, 13 mln tulijoid vl 2018 i enamba mi nell' tuhad restoranoid ümbrikon ezilidnoidenke), jahtansauvomižen, «Maxim Integrated»-kompanijan järedal palakundal (mikroshemad), fil'miden i TV-oigendusiden tehmižel. Kaik 50 tuhad jahtoid om registriruidud lidnas.

Geografijan andmused

Lidn sijadase Atlantižen valdmeren randal, 2,75 m ü.m.t. keskmäižel korktusel. Veziteiden severz'-se sadoid kilometrid om lidnas. Matkad Majamihesai om nell'kümne kilometrad suvhe.

Lidnan pind om 94,01 km², niišpäi kuivma otab 89,58 km², vezi kattab 4,44 nellikkilometrad.

Klimat om tropine vihmmecoiden. Voden keskmäine lämuz om +25,1 C°, kezakun-sügüz'kun +28,1..+28,9 C°, tal'vkun-uhokun +20,2..+21,8 C°. Absolütine minimum oleskeli –2 C° (tal'vku-uhoku), maksimum +38 C° (kezaku, eloku). Voib panda halad tal'vkus-keväz'kus vaiše. Il'man lämuz ei voi olda madalamb mi +18 C° heinkus-elokus. Paneb sadegid 1548 mm vodes, vähemba tal'vkus-sulakus (60..77 mm kus), enamba kezakus (243 mm) i elokus-redukus (187..204 mm kus).

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 165 521 ristitud, vn 2020 — 182 760 ristitud (ümbrikon kümnendez). Kaikiš suremb lidnan ristitišt om nügüd'. Lidn mülüb Majamin aglomeracijha (6,1 mln eläjid vl 2017).

Kodikelen mödhe (2015): anglijan kel' — 71,4 %, ispanijan kel' vai ispanijan kreolan kel' — 15,9 %, francijan kel' vai haitin kreolan kel' — 6,9 %, toižed keled — 5,8 %.

Augotižlibundan mödhe (2020): evropalaižed — 47,5 % (ispanijalaižita), afroamerikalaižed — 27,1 %, latinamerikalaižed i ispanijalaižed — 19,2 %, azijalaižed — 2,0 %, indejalaižed — 0,2 %, segoitadud augotižlibundanke — 3,3 %, toiženke augotižlibundanke — 0,7 %.

Irdkosketused

Lidnan oficialine sait (fortlauderdale.gov). (angl.)
Suren Fort Loderdeilan turizman sait (sunny.org). (angl.)

Fort Loderdeil Vikiaitas