Majami

Majami
Miami

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2016)	453,579 ristitud
Pind	93,2 km²
Pämez'	Frensis Suares (kül'mku 2017—)
Telefonkod	+1−305, −768
Aigvö	tal'vel UTC−5, kezal UTC−4

Majamin lidnanlaptad (angl. neighborhoods).

Majami (angl.: Miami [maɪˈæmi], ispanine virkand: [miˈami]) om AÜV:oiden lidn da port Atlantižen valdmeren randal. Se sijadase Florid-štatan da pol'saren suvipäivnouzmas.

Istorii

Eländpunktan aluz om pandud vl 1825. Se sai lidnan statusad vl 1896. Om nimitadud majaimi-indejalaižiden mödhe (kätas «sur' vezi») da lähižen reskveden järven mödhe (nüg. Okičobi).

Vozil 2009−2017 Tomas Regalado radoi lidnan pämehen.

Eläjad

Vl 2009 eläjiden lugu oli 433 146 ristitud. Majami om kahtenz' surtte lidn Floridas (Džeksonvillan jäl'ghe) da AÜV:oiden nelländen surtte lidnaglomeracijan keskuz — läz 5,4 millionad ristituid. Toižen mail'man sodan jäl'ghe sodamehed sirdiba tänna, sid' immigrantad Kubaspäi i heiden jäl'ghe Haitišpäi sirdiba elämhä lidnas da sen ümbrištos erazvuiččil vozil.

Lidn om opendusen järed keskuz (80 tuhad radsijid).

Ižanduz

Majami om kaikiš suremb rahvahidenkeskeižiden bankoiden keskuz Amerikas. Äjad AÜV:oiden i mail'man kompanijad ohjatas Latinižen Amerikan torgusil Majamišpäi. AÜV:oiden televizijan ispanijankel'žen kontentan znamasine pala fil'mdase neciš lidnas. Toižed sarakod oma turizm i kivisuguiden ümbriradmine. Valdkundan Azekhiden vägiden suvibaz sijadase lidnas.

Transport

Avtobusad, velosipedad, ezilidnjonused, metro da monorel's oma kundaližtransportaks lidnas. Vspäi 1984 metro radab lidnas (angl.: Metrorail, vl 2017 om 2 jonod, 23 stancijad, 39 km raudteid). Vspäi 1986 maksutoi monorel's om lidnas (angl.: Metromover, vl 2017 om 3 jonod, 21 stancijad, 7 km raudteid). Kaik 175 tuhad radnikoid om meriportas (2011).

Rahvahidenkeskeine civiline Majami-lendimport (MIA) sijadase 13 km lodeheze lidnan keskusespäi. Tehtas reisid AÜV:oidme i Kariban meren basseinan maihe, mugažo Suviamerikan da Evropan järedoihe lidnoihe.

Irdkosketused

• Majami-lidnan tobmuden oficialine sait (miamigov.com). (angl.)