Gümri

Gümri
Գյումրի
Lidnanznam;	Flag;
Valdkund	Armenii
Eläjiden lugu (2015)	118,600 ristitud
Pind	36,26 km²
Pämez'	sija om vakantine
Telefonkod	+374−312
Aigvö	UTC+4

Gümri (armen.: Գյումրի [ɡjumˈɾi] Gümri, ven.: Гюмри́, turk.: Gümrü) om lidn da raudtesol'm Armenijan lodehes. Se om valdkundan kahtenz' lidn eläjiden lugun mödhe, Širakan agjan administrativine keskuz (vn 1995 kül'mkuspäi).

Istorii

Eländpunktan aluz om pandud 5. voz'sadal EME, oli tetab Kumairi-nimitusenke. Anttihe oficiališt lidnan statusad vl 1840 da udesnimitihe venäks Aleksandropol:ikš (ven.: Александрополь) Venäman Aleksandra Födorovna-imperatornaižen oiktastuseks. Vl 1898 raudte ühtenzoiti Tiflisanke. Vll 1924−1990 oficialine nimituz oli Leninakan Leninan muštho, vl 1991 Kumairi.

Gümri šingotase mašinansauvomižel i sömtegimištol (saharantegim). Venäman 102. sodabaz radnikoičeb lidnas.

Geografijan andmused

Lidnan sijaduz agjas i valdkundas vn 2006 kartal

Lidn sijadase agjan keskuzpalan päivlaskmas, Širakan katl'usen keskuzpalas, 1550 m ü.m.t. keskmäižel korktusel. Om ümbärtud mägisel'gil, ristikoičese Čerkez- i Džadžur-uril. Lujad manrehkaidused oleldas (1926, 1988). Mahuz om mustma.

Klimat om terav kontinentaline mägiden. Voden keskmäine lämuz om +6,2 C°, kezakun +15,6 C°, heinkun i elokun +19,5 C°, sügüz'kun +15,0 C°, tal'vkun-uhokun −5,3..−9,5 C°. Absolütine minimum oleli −41,0 C° (viluku), maksimum +38,0 C° (heinku). Kezaaigan minimum om −3,6 C° (kezaku), tal'vaigan maksimum om +14,0 C° (tal'vku, uhoku). Ei voi panda halad heinkus vaiše (minimum +1,4 C°). Paneb sadegid 486 mm vodes, enamba semendkus-kezakus (73..84 mm kus), vähemba sügüz'kus (26 mm) i kül'mkus-keväz'kus (22..28 mm kus).

Tobmuz

Gümri jagase kaks'kümneks ühteks lidnfartalaks.

Edeližed lidnan pämehed oma Vardan Gukasän (Վարդան Ղուկասյան, 2000−2012, vn 2025 sulaku-reduku), Vardges Samsonän (kül'mku 2021 — reduku 2024), Samvel Balasanän (Սամվել Բալասանյան, sügüz'ku 2012 — 2021).

Eläjad

Vl 2011 lidnan eläjiden lugu oli 121,976 ristitud. Kaikiš suremb lidnan ristitišt oli 238 tuhad eläjid vl 1988, sid' 122,587 eläjad vl 1989 Spitakan manrehkaidusen jäl'ghe.

Galerei

Lidnan tobmuden sauvuz (2014)
Pühän Jumalanmaman kafedraline päjumalanpert' (Surb Astvacacin, 1884) Joudjuden torgul lidnan keskuses, vn 2019 sügüz'kun nägu
Tsagikän-oludentegim vl 2024
Lidnan dramteatr (vn 2018 semendkun olend)
Širak-lendimportan terminalad vl 2021
Gümri-päraudtestancijan sauvuz vl 2024

Homaičendad

Irdkosketused

Lidnan oficialine sait (gyumricity.am). (arm.) (angl.)

Gümri Vikiaitas