Hamar

**Hamar**
Lidnanznam;	Flag;
Valdkund	Norvegii
Eläjiden lugu (2021)	31,509 ristitud
Pind	350,94 km²
Pämez'	Einar Busterud; (1999−2011,; 2015—)
Telefonkod	+47−62
Aigvö	tal'vel UTC+1,; kezal UTC+2

Hamar (mugažo norvegijan kelel, virktas [ˈhɑ̂ːmɑr]) om Norvegijan lidn da kund (kommun) valdkundan suvipäivnouzmas. Se om Innlandet-agjan administrativine keskuz (edel 2020. vot — penemban Hedmark-agjan).

Istorii

Eländpunktan aluz om pandud vl 1152 kuti episkopkundan keskuz. Vll 1584−1864 oli žiloks. Vl 1862 raudte tuli sihe. Vl 1992 mülütihe Vang-kundad Hamaran kundha kacmata Vang-kundan eläjiden pätandha. Vl 1994 lidn vastsi Tal'veližiden Olimpižiden vändoiden erasid-se voibuižid (kiruh- i figurštargundad) Lillehammeran ühtes.

Hamar šingotase sömtegimištol (oludentegim, maidtegim) i valdkundaližil holitišil. Valdkundan znamasine raudtesol'm «Oslo — Tronheim»-keskustal. Vspäi 1975 valdkundaližen Norsk Tipping-loterejan päfater sijadase lidnas.

Geografijan andmused

Lidn sijadase kundan suvipäivlaskmaižes čogas, agjan suves, 150 m ü.m.t. keskmäižel korktusel. Matkad Oslohosai om 100 km suvhe orhal vai 127 km avtotedme.

Klimat om ven kontinentaline. Voden keskmäine lämuz om +5,1 C°, kezakun-elokun +14,6..+17,0 C°, tal'vkun-uhokun −4,5..−5,7 C°. Ekstremumad oma −29,8 C° (tal'vku, viluku, uhoku) i +33,0 C° (heinku). Paneb sadegid 500 mm vodes, enamba heinkus-elokus (68..72 mm kus), vähemba tal'vkus-sulakus (15..28 mm kus).

Eläjad

Vl 2013 kundan eläjiden lugu oli 29,331 ristitud. Lidnan ristitišt om 28,535 eläjad 13,95 km² pindal (vn 2021 andmused). Kaikiš suremb lidnan i municipalitetan ristitišt om nügüd'.

Südäinorvegijan sättutoitud tedoiden valdkundaližen kolledžan kampus om lidnas (norv.: Høgskolen i Innlandet, vspäi 2017), ende se palakund oli erižeks pedagogižeks kolledžaks.

Galerei

Lidnan tobmuden sauvuz (2014)
Hamaran kafedraline päjumalanpert' lidnan keskuzpalas, vn 2008 nägu (lüteranine, letihe vl 1866)
Kengiden fabrik vl 2006
Innlandet-agjan universitetan kampus Hamaras (keväz'ku 2006)
Äimetoine Vikingskipet-štargundlavut (2005, om saudud vll 1990−1992)
Hamar-päraudtestancijan sauvuz vl 2006 (om sätud vl 1896)

Irdkosketused

Lidnan da sen kundan oficialine sait (hamar.kommune.no). (norv.)

Hamar Vikiaitas