Iraklion

Iraklion
Ηράκλειο
Valdkund	Grekanma
Eläjiden lugu (2022)	157,452 ristitud
Pind	109,03 km²
Pämez'	Aleksis Kalokairinos; (2024—,; Αλέξης Καλοκαιρινός)
Telefonkod	+30−2810-xx-xxx
Aigvö	tal'vel UTC+2,; kezal UTC+3

Iraklion (grek.: Ηράκλειο [iˈraklio]) om lidn Grekanman suves. Se om valdkundan nellänz' lidn eläjiden lugun mödhe, om Krit-agjan administrativižeks keskuseks (vspäi 1971) da kaikiš surembaks lidnaks.

Istorii

Eländpunkt om nimitadud Gerakl-vägimehen oiktastuseks. Vll 1204−1669 se oli Venecijan Tazovaldkundan palaks Kandii-nimitusenke (Candia), Kules-lidnuz (Castello a Mare) om kaičenus tähäsai. Vll 1669−1878 lidn mülüi Ottomanan imperijha Handakas-nimenke. Lidn oli muretud lujas manrehkaidusel vn 1856 redukus. Amuine i nügüdlaine nimituz tuli portan nimespäi, kävutase 19. voz'sadaspäi.

Iraklion šingotase turizmal (3,2 mln tulijoid vl 2017, kahtenz' sija valdkundas). Saren opendusen, kul'turan i transportan keskuz.

Geografijan andmused

Lidn sijadase Krit-saren i agjan keskuzpalan pohjoižes, Egeižen meren suvipalan (Kritan meri) penen merikaran randal, 0..33 m ü.m.t. korktusil.

Matkad Afinad-pälidnhasai om 330 km pohjoižhe-lodeheze ehtatimel vai lendimel.

Klimat om Keskmeren kuivahk. Keza om räk, kuiv da päivoikaz lujas, tal'vaig om neps pil'vekaz. Voden keskmäine lämuz om +18,9 C°, kezakun-sügüz'kun +23,7..+26,4 C°, tal'vkun-keväz'kun +12,1..+13,8 C°. Ekstremumad oma −0,8 C° (uhoku) i +44,5 C° (eloku). Voib panda halad harvoin lujas, uhokus vaiše. Paneb sadegid 481 mm vodes, enamba tal'vkus-vilukus (86..91 mm kus), vähemba kezakus-elokus (viž millimetrad pordos). Kun keskmäine relätivine nepsuz vajehtase 57..62 % röunoiš sulakus-sügüz'kus, 66..69 % redukus-keväz'kus.

Tobmuz

Iraklionan nügüdläine municipalitet (dimos) om sätud vl 2011, mülütab vit ühtnikad (ende erigoittud municipalitetad) 245,12 km² pindal: Gorgolainis, Iraklion, Nea Alikarnassos, Paliani, Temenos. Päiči lidnas, municipalitet jagase kaks'kümneks nimitadud kundaks.

Municipalitetan tobmuden pämez' om dimarh (grek.: Δήμαρχος). Edeline pämez' om Vasilios-Eorjos Lambrinos (Βασίλειος-Γεώργιος Λαμπρινός), radoi vspäi 2014.

Eläjad

Vn 2011 Grekanman rahvahanlugemižen mödhe lidnan eläjiden lugu oli 140,730 ristitud, vl 2001 — 135,761 ristitud. Kaikiš suremb lidnan ristitišt om nügüd'. Kaiken municipalitetan ristitišt om 179,302 eläjad (2021), vl 2011 oli 173,993 eläjad.

Galerei

Krit-agjan tobmuden sauvuz (2015)
Ph. Minan kafedraline päjumalanpert' (1862−1895, ortodoksine hristanuskond), vn 2011 nägu
Ph. Tit-apostolan päjumalanpert' (ortodoksine hristanuskond), vn 2016 tal'vkun nägu
Kritan akvarium (2011)
Kritan londuseližen istorijan muzei (2011)
Lidnan kirjišt (2013)
Iraklionan rahvahidenkeskeine lendimport vl 2009
Iraklionan meriport vl 2004

Irdkosketused

Lidnan da sen municipalitetan oficialine sait (heraklion.gr). (grek.) (angl.)

Iraklion Vikiaitas