Jalaim'

Rusked jalaim' (Ulmus rubra)

Valdkund:	Kazmused
Palakund:	Änikkazmused (Magnoliophyta)
Klass:	Kaksidülehtesižed (Magnoliopsida)
Kund:	Rozänikoižed (Rosales)
Sugukund:	Jalaimižed (Ulmaceae)
Heim:	Jalaim'

Latinankel'ne nimi

Úlmus L.

Sistematik
Vikierikoiš

Kuvad
Vikiaitas

ITIS 19048

NCBI 24735

Jalaim' vai Jalam (latin.: Ulmus) om lehtpuiden heim Jalaimižed-sugukundas. Mülütab 30..40 erikod.

Levigandmižavaruz

Heim erištui toižiš kazmusišpäi 20..40 mln vozid tagaz. Kazdas levedlehtesižiden mecoiden palaks päpaloin, mugažo kuššiden mecoiden zonan suves i keskuzpalas. Järghižed sarikod jalaimespäi oma harvad.

Pud küzudas väghišt mahust, navettäs allüviališt lujas. Erased-se erikod oma seižujad solačuil i kuivahkoil mahusil.

Venämas jalaim' kazvab evropižes palas tobjimalaz. Kazdas Kavkazan pautkil i Keskuzazijas mugažo. Jalaimed alištudas senüzile i travijoile gavedile, sikš Evropan i Amerikan äjad erikod oma kadomižen röunal.

Ümbrikirjutand

Heimon erikoiden taksonomii jügenzoitase gibridizacijan i mikroerikoiden olendan tagut märitud tahondoiš.

Kaik erikod oma pil'vesenvastaižed, enamba kaiked alaigäižed kazmused, sid' kazdas hüvin täudel vauktusel i sädas varmdad kronad. Pu kazvab nell'kümnehe metrhasai kortte, tüvi oleleb kahthe metrhasai sankte. Erasiden-se erikoiden elonform om penzaz.

Äikerdoitas jur'vezoil i semnil. Pun igä om 80..120 vot, elädas 400 vodhesai.

Kävutand

Ištutadas jalaimid puištoiš, ottas kävutamižhe landšaftan čomiteseks. Amuižes Rimas kazvatadihe jalaimid koumhe metrhasai vinmarjžomiš, nored pud abutadas kazda vinmarjoile. Anttas norid vezoid kabjživatoile sötkeks. Kor' mäneb dubindsubstancijaks i mujutimikš. Haugoiden lämbitai mahtuz om korged.

Pumaterial seižub vet vaste, no vaiše kontaktata mahusenke. Tehtihe vedenveimid jalaimespäi keskaigaižes Evropas. Pumaterial om kova, notked i vahv, andase ümbriradmižele hüvin. Ottihe i ottas meblin (ištmed), venehiden i pukezroiden tehmižhe.

Kävutihe jalaimen ragoid tehmaha taugoid istorižešti, tehtas nügüd'-ki.

Valitud erikod

Ulmus americana — Amerikaine jalaim'
Ulmus davidiana — Davidan jalaim'
Ulmus densa — Tihed jalaim' vai Paks jalaim'
Ulmus elliptica — Elliptine jalaim'
Ulmus glabra — Mägijalaim'
Ulmus laciniata — Labidoikaz jalaim'
Ulmus laevis — Siled jalaim'
Ulmus macrocarpa — Järedploduine jalaim'
Ulmus minor — Pen' jalaim'
Ulmus pumila — Henlehtesine jalaim'
Ulmus rubra — Rusked jalaim'
Ulmus thomasii — Tomasan jalaim'

Homaičendad

Jalaim' Vikiaitas