Keblavik

Keblavik
Keflavík
Valdkund	Islandii
Eläjiden lugu (2018)	15,930 ristitud
Telefonkod	+354−20
Aigvö	UTC+0

Keblavik (isl.: Keflavík [ˈcʰɛplaˌviːk] «hagoiden (kokoroiden) merikar») om lidn Islandijan suvipäivlaskmas. Se om Südürnes-agjan administrativižeks keskuseks da palaks.

Istorii

Eländpunkt mainitaškanzihe 16. voz'sadaspäi. Toižen mail'man sodan jäl'ghe sen ristitišt ližadui lendimportan sauvomižen tagut, i Keblavik sai lidnan oiktusid vn 1949 22. päiväl keväz'kud. Vn 1994 kezakun 11. päiväspäi lidn mülüb Reikjanesbair-kundha i om sen administrativižeks keskuseks, ende sädi erigoittud kundad.

Valdkundan kaikiš suremb rahvahidenkeskeine Keblavik-lendimport^[1] (KEF / BIKF, 8,7 mln passažiroid vl 2017) om saudud koumes kilometras päivlaskmha lidnaspäi. Vll 1942−2006 AÜV:oiden armijan il'mbaz radoi täs, nügüd' Islandijan randkaičendvägiden sijaduz, üks'-se PAKO:n baz.

Geografijan andmused

Lidn sijadase kundan pohjoižes, agjan i Reikjanes-pol'saren lodehes, viž metrad ü.m.t. keskmäižel korktusel. Merikar om lidnan randanno. Bazal'tpöudod harvoidenke änikkazmusidenke i samloidenke oma ümbrištos.

Matkad Reikjavik-pälidnhasai om koumekümne kilometrad päivnouzmha-pohjoižpäivnouzmha orhal vai 50 km avtotedme. Lähembaine lidn om Gardür kümnes kilometras pohjoižhe.

Klimat om subarktine neps valdmeren. Voden keskmäine lämuz om +5,1 C°, heinkun-elokun +10,8..+11,2 C°, tal'vkun-keväz'kun +0,8..+1,3 C°. Ekstremumad oma −17,5 C° (viluku, uhoku) i +25,0 C° (eloku). Kezaaigan minimum om −0,3 C° (kezaku), tal'vaigan maksimum om +12,4 C° (tal'vku). Ei voi panda halad heinkus-elokus (elokun minimum om +0,4 C°). Paneb sadegid 1104 mm vodes, kuidme läz tazomäras, enamba sügüz'kus-uhokus (105..121 mm kus), vähemba semendkus-heinkus (53..67 mm kus). Paneb lunt tal'ven 37 päiväs keskmäras, ei voi panda lunt semendkus-sügüz'kus.