Portsmut (Anglii)

Portsmut
Portsmouth
Lidnanznam;	Flag;
Valdkund	Sur' Britanii
Eläjiden lugu (2021)	208,100 ristitud
Pind	40,25 km²
Telefonkod	+44−23
Aigvö	tal'vel UTC+0,; kezal UTC+1

Sil sanal voib olda toižid znamoičendoid; miše nähta niid, tulgat tänna.

Portsmut (angl.: Portsmouth [ˈpɔːrtsməθ]) om lidn da järed meriport Suren Britanijan suves. Se om Anglijan unitarine ühtnik, mülüb Hemp-grafkundha, no ičeohjastusenke.

Istorii

Eländpunkt sai lidnan oiktusid vl 1194. Lidn om laivansauvomižen keskuz amussai. Alištui lujile bombardiruindoile Toižen mail'man sodan aigan.

Britanižen sodamerilaivišton baz i järed läžundkodi sijadasoiš täs. Kalanpüdandan laivišt baziruiše lidnas mugažo. IBM-korporacijan evropine päfater radab Portsmutas.

Geografijan andmused

Lidnan sijaduz Anglijas i grafkundas (2006)

Lidnan tobj pala sijadase Portsi-sarel Te Solent-sal'mes (La Manšan pohjoižpala). Portsmut ühtenzoitase ehtatimel Uait-sarenke. Matkad Londonhasai om 110 km pohjoižpäivnouzmha. Järed Sautgempton-lidn om 31 kilometras lodeheze.

Klimat om ven valdmeren, paneb lunt tal'vel harvoin lujas. Keza om päivoikaz, tal'vaig om pil'vekaz lujas. Voden päiväline keskmäine lämuz om +11,3 C°, kezakun-sügüz'kun +15,5..+17,8 C°, tal'vkun-uhokun +5,6..+6,2 C°. Ekstremumad oma −9,2 C° (tal'vku, viluku) i +34,1 C° (kezaku, heinku). Ei voi panda halad kezakus-sügüz'kus (kezakun minimum om +1,4 C°). Paneb sadegid 768 mm vodes, enamba redukus-vilukus (85..93 mm kus), vähemba keväz'kus-heinkus (43..50 mm kus). Meriveden lämuz vajehtase +9..+10 C° röunoiš vilukus-sulakus i ližadub +17 Cel'sijan gradushasai sügüz'kus.

Eläjad

Vn 2011 Suren Britanijan rahvahanlugemižen mödhe lidnan eläjiden lugu oli 205 400 ristitud. Kaikiš suremb lidnan ristitišt oli 233 545 eläjad vl 1951, vodele 1981 se poleni i oli 175 382 eläjad. Lidn mülüb Suvižen Hempširan konurbacijha pol'tošt millionad ristitištonke.

Portsmut om ühtennimižen futbolkluban päsijaduz.

Transport

Avtobusad oma kundaližeks transportaks lidnas. Ned i raudtejonused ühtenzoittas ezilidnoidenke. Kaik viž raudtestancijad jätktas radod Portlendas. Lidnan rahvahidenkeskeine meriport om kahtenz' surtte valdkundas ehtatimiden lugun mödhe. Vl 2022 meriport vastsi 6,9 mln passažiroid i ümbriradoi läz 1 mln tonnoid jüguid.

Lähembaine rahvahidenkeskeine civiline Sautgempton-lendimport sijadase koumekümnes kahtes kilometras lodeheze läz Sautgempton-lidnad, siš-žo aglomeracijas.

Galerei

Lidnan tobmuden sauvused (Portsmouth Civic Offices, 2022)
Ph. Ioann Evangelistan kafedraline päjumalanpert' (katoline, om saudud vll 1879−1882), vn 2007 nägu
Portsmutan universitetan kirjišt (vn 2007 olend)
Istorižen «Meri Rouz»-meriastjan (1512−1545) muzei (uz' sauvuz, 2018)
Portsmutan merikar vl 2008
Portsmut i Sautsi-päraudtestancii vn 2021 tal'vkus

Irdkosketused

Portsmut-lidnan tobmuden sait (portsmouth.gov.uk). (angl.)

Portsmut (Anglii) Vikiaitas