Uaithors

Uaithors
Whitehorse
	Lidnanznam;
Valdkund	Kanad
Eläjiden lugu (2021)	28,201 ristitud
Pind	416,54 km²
Pämez'	Kirk Kemeron; (reduku 2024—,; Kirk Cameron)
Telefonkod	+1−867
Aigvö	tal'vel UTC−8,; kezal UTC−7

Uaithors (angl.: Whitehorse [ˈwaɪt.hɔrs], francine virkand: [wajtɔʁs]) om lidn Kanadan lodehes. Se om Jukon-territorijan administrativine keskuz i kaikiš suremb lidn.

Istorii

Eländpunktan aluz om pandud vl 1898 Klondaikan kuldsäruläžundan aigan. Löutihe vas'ken kivendoid i sadas niid tähäsai. Ende territorii oli elänzoittud harvas, indejalaižed tuleškeliba sihe mecadamha. Vl 1900 raudte ühtenzoiti Uaithorsad Aläskan Skaguei-portanke. Sai lidnan statusad (city) vl 1950 2 594 eläjad ristitištonke.

Vn 1953 1. päiväl elokud panihe lidnad Jukon-territorijan administrativižeks keskuseks, ende Douson oli. Vspäi 1957 nimitusen oficialine kirjutamine om nügüdläine, ende oli White Horse.

Geografijan andmused

Lidn sijadase territorijan suves, Jukon-jogen molembil randoil läz sen vezilanktendoid, 680 m ü.m.t. keskmäižel korktusel. Om mägid lidnan ümbrištos. Lidn om nimitadud vezilanktendoiden mödhe, nimi znamoičeb «vauged hebo» anglijan kelespäi.

Klimat om subarktine, alangištoline sijaduz pehmdab sidä. Heinkun lämuz om +14,3 C°, vilukun — −15,2 C°, voden keskmäine lämuz om −0,1 C°. Paneb sadegid läz tazomäras vodes läbi, 160 mm vihmaks i 142 sm lumeks, vähemba kaiked sulakus.

Tobmuz

Kaik kuz' ühtnijad i mer mülüdas Uaithors-lidnan nevondkundha (angl.: Whitehorse City Council). Kaik lidnalaižed valitas heid nelläks vodeks (edel vn 2024 redukud strok oli koume vot).

Mer om nevondkundan ezimeheks, valičese vspäi 1950. Edeližed merad oma Laura Kebott (Laura Cabott, 2021−2024), Den Körtis (Dan Curtis, 2012−2021).

Eläjad

Vn 2011 Kanadan rahvahanlugemižen mödhe Uaithorsan eläjiden lugu oli 23 276 ristitud, territorijan kaks' koumandest, i 40 heišpäi oliba venänikad; vn 2021 — 28 201 ristitud. Kaik 25 085 eläjad oli lidnas vl 2016.

Kodikel' (2011): anglijan kel' — 84,3 %, francijan kel' — 4,6 %, toine kel' — 9,7 % (saksan, tagalog, ispanijan, kitajan i alaman keled). Augotižlibund (2011): evropalaižed — 75,5 %, igähižed rahvahad — 16,5 %, toižed rahvahad — 8,0 %.

Uskondan mödhe (2011): hristanuskojad — 45,3 %, toine uskond — 3,3 %, religijatomad — 51,4 %.

Irdkosketused

Lidnan municipalitetan oficialine sait (whitehorse.ca). (angl.) (fr.)

Uaithors Vikiaitas

	Kanadan provincijad da territorijad i niiden administrativižed keskused
	Provincijad	Al'bert (Edmonton) \| Britanine Kolumbii (Viktorii) \| Eduard-princan Sar' (Šarlottaun) \| Kvebek (Kvebek-lidn) \| Manitob (Vinnipeg) \| Nju Bransujik (Frederikton) \| Saskačevan (Redžain) \| Njufaundlend da Labrador (Sent Džons) \| Ontario (Toronto) \| Uz' Šotlandii (Galifaks)
	Territorijad	Jukon (Uaithors) \| Lodehližed territorijad (Jellounaif) \| Nunavut (Ikaluit)