Priozerskan rajon

Priozerskan rajon
Приозерский район

Znam	Flag
Valdkund	Venäma
Administrativine keskuz	Priozersk
Eläjiden lugu (2022)	59,496 ristitud
Pind	3,597,03 km²

Priozerskan rajon (ven.: Приозерский район) om Venäman municipaline ühtnik Leningradan agjas.

Administrativine keskuz om Priozersk, se sijadase rajonan pohjoižpäivnouzmas i mülüb rajonha vspäi 2006.

Istorii

Rajonan aluz om pandud vn 1940 heinkun 9. päiväl Karjalaiž-Suomen NST:ha enččel Suomenman territorijal Tal'vsodan jäl'ghe kuti Kägisal'men rajon Kägisal'm-lidnan keskuseks. Vozil 1941−1944 rajonan territorii oli Suomenman tobmuden al sodavägiden tulendan tagut.

Vl 1944 kül'mkus alištihe rajonad Leningradan agjan tobmudele. Vl 1948 redukun 1. päiväl rajon om olmas nügüdläiženke nimenke, kut rajonan keskuz-ki. Vozil 1948−2006 Priozersk alištui agjan tobmudele oikti. Vl 1960 tal'vkun 9. päiväl rajonad ühtištuihe Sosnovon rajonan palanke. Rajon om olmas nügüdläižiš röunoiš vspäi 2006.

Geografijan andmused

Priozerskan rajon om Leningradan agjan lodehline taho. Pind — 3 597 nellikkilometrad. Mecad ottas territorijan kaks' koumadest, ned oma pedaimecad, pedaikanghad tobjimalaz.

Om röunoid Venäman koumenke rajonanke:

• suves Leningradan agjan Vsevoložskan rajonanke;
• päivlaskmas Leningradan agjan Viipurin rajonanke;
• pohjoižes Karjalan Tazovaldkundan Lahdenpohjan rajonanke.

Ladoganjärven randan pala om pohjoižpäivnouzmas da päivnouzmas. Znamasine jogi om Vuoks, lankteb Lagoganjärvhe. Järved ottas 12 % rajonan territorijad, znamasižed oma Vuoks (108 km², sidä kesken sared 15 km²), Otradnoje (72 km²) da pit'k Suhodol'skoje järved. Joged da järved mülüdas Atlantižen valdmeren basseinha.

Londuseližed varad oma sauvondmaterialad (ozrikkivi, rugižkivi, letked, saved), mec, kala, reskvezi.

Vspäi 2006 rajonan territorii alajagase 14 municipaližeks ühtnikaks: kaks' lidnankundad i 12 küläkundad.

Tobmuz

Käskusenandai tobmuz om Ezitajiden Nevondkund (ven.: Совет депутатов) 28 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Vladimir Mil'nikov radab sen ezimehen da rajonan pämehen vs 2014 sügüz'kun 29. päiväspäi. Ezitajiden Nevondkund valičeb rajonan administracijan pämest.

Vspäi 2011 Svetlana Potapova om valitud i radab rajonan administracijan pämehen, se om hänen kahtenz' strok jäl'geten. Ezmäine varapämez' da viž muite varapämest oma hänele abhu. Nell' komitetad, 19 palakundad da laudkund alištudas rajonan administracijale.

Eläjad

Vn 2010 Venäman rahvahanlugemižen mödhe eläjiden lugu oli 62 193 ristitud. Vspäi 1959 kaikiš suremb rajonan ristitišt oli 63 157 eläjad vl 2013 i 63 041 eläjad vl 2015.

Kaik om 103 eländpunktad rajonas, sidä kesken üks' lidn, üks' lidnanvuitte Kuznečnoje-žilo, 73 žilod, viž raudtestancijan žilod, 23 küläd.

Toižed sured eländpunktad oma Sosnovo-žilo (7,2 tuh. rist. vl 2010), lidnanvuitte Kuznečnoje-žilo (4,3 tuh. rist. vl 2016) da Sapörnoje-žilo (3,6 tuh. rist. vl 2010).

Rahvahad (vn 2010 Venäman rahvahanlugemižen mödhe, enamba 0,4%): venälaižed — 84,1%, ukrainalaižed — 2,7%, vaugedvenälaižed — 1,4%, uzbekalaižed — 0,8%, totarlaižed — 0,6%, armenijalaižed — 0,4%, toižed — 2,6%, rahvahuden ozutandata — 7,4%.

Erased igähižed rahvahad: karjalaižed — 89 rist. (0,14%), suomalaižed — 50 rist. (0,08%), estilaižed — 24 rist. (0,04%), vepsläižed — 7 rist. (0,01%).

Ižanduz

Rajonan ižandusen päsarakod oma mecan varhapanend da ümbriradmine, ozrikkiven samine, meblän tehmine, plastiktegesiden pästand, sömtegimišt, maižanduz da kalankazvatuz, turizm.

Irdkosketused

• Priozerskan rajonan tobmuden sait (priozersk.lenobl.ru). (ven.)