Anuradhapur

Anuradhapur
අනුරාධපුරය (singal.)
அனுராதபுரம் (tamil.)
Valdkund	Šrilank
Eläjiden lugu (2012)	50,595 ristitud
Pind	36 km²
Telefonkod	+94−25
Aigvö	UTC+5:30

Anuradhapur (singal.: අනුරාධපුරය [ənuraːd̪əpurəjə], vepsän kirjamil Anurādhapuraja, tamil.: அனுராதபுரம் [ɐnuɾaːðɐβuɾɐm] Aṉurātapuram) om lidn Šrilankan pohjoižpalas. Se om Pohjoižkeskuzližen agjan i Anuradhapuran ümbrikon administrativižeks keskuseks da palaks.

Istorii

Amuine Anuradh-lidn mainitase 5. voz'sadaspäi EME. Singaline Pandukabhaja-car' käski sidä singaloiden ezmäižen valdkundan pälidnaks vl 377 EME. Vl 100 m.e. lidnan ristitišt oli 130 tuhad eläjid, i se oli tetab Amuižes Evropas. Buddizm leviganzi kaikedme saredme sišpäi. Anuradh oli muretud 11. voz'sadal tamiloiden Čol-valdkundan ohjandajiden käskön mödhe. Raudtestancii radaškanzi vl 1903.

Nügüd'aigan buddizman jumalankodid kattas territorijad 41 km² pindal lidnan ümbrištos. Anuradhapur šingotase sömtegimišton edheotandoil, punleiktandal i turizmal.

Geografijan andmused

Lidn sijadase ümbrikon keskuzpalan päivlaskmas, Aruvi-jogen randoil, 81 m ü.m.t. keskmäižel korktusel. Buddizman vanh pühälidn mülüb UNESCO:n Mail'man jäl'gusen nimikirjuteshe vspäi 1982^[1], uded lidnfartalad oma saudud jogen vastrandal 1950-nziš vozišpäi valdkundaližen ohjastusen iniciativan mödhe.

Anuradhapur om saren znamasižeks transporttesol'meks amussai. Matkad ekonomižhe Kolombo-pälidnhasai om 205 km suvhe.

Klimat om subekvatorialine. Kun keskmäine lämuz om +26,2..+29,6 C° voden aigan. Ekstremumad oma +16,6 C° (uhoku, tal'vku) i +39,8 C° (semendku). Il'man lämuz voib ületada +33 C° miččel taht kul, ei voi olda madalamb mi +20 C° sulakus-redukus. Paneb sadegid 1395 mm vodes, enamba sulakus (180 mm) i redukus-tal'vkus (225..281 mm kus), kuivahk sezon oleskeleb kezakus-heinkus (15..24 mm kus).

Eläjad

Vl 2012 lidnan eläjiden lugu oli 50,595 ristitud.

Rahvahad (2011): singalad — 91,4 %, larakallad — 6,8 %, tamilad — 1,5 %, toižed rahvahad — 0,3 %. Singaloiden tobj pala oma buddistad, larakalloiden — islamanuskojad, tamiloiden — induistad i katolikad.