Brašov

Brašov
Brașov
Lidnanznam;	Flag;
Valdkund	Romanii
Eläjiden lugu (2021)	237,589 ristitud
Pind	267,32 km²
Pämez'	Allen Koliban; (reduku 2020 — 2024,; Allen Coliban)
Telefonkod	+40-(0)268
Aigvö	tal'vel UTC+2,; kezal UTC+3

Brašov (rom.: Brașov [braˈʃov], mad'j.: Brassó, saks.: Kronstadt) om Romanijan lidn valdkundan keskuzpalas. Se om valdkundan seičemenz' lidn eläjiden lugun mödhe, Brašovan ümbrikon administrativine keskuz.

Istorii

Eländpunkt mainitase ezmäižen kerdan vl 1235 kuti Koron-fartal jumalanpertinno, lidnan latinan nimi om Corona tähäsai. Industrii radaškanzihe kahten mail'man sodan aigkeskustal, se vedi äi radnikoid valdkundan toižiš paloišpäi. Pästtihe toralendimid, sid' jüguavtoid, möhemba traktorid.

Brašov šingotase ROMAN-jüguavtoiden pästandal, mašinansauvomižen edheotandoil (avtopalad, gidravližed transmissijad, pörutüged, käziinstrument), sauvondmaterialiden tehmižel, tekstil'tegimištol, oluden keitandal.

Geografijan andmused

Lidn sijadase ümbrikon keskuzpalan päivnouzmas, 538 m ü.m.t. keskmäižel korktusel. Om ümbärtud Karpatoiden suvipalal. Matkad Buharesthasai om 166 km suvhe.

Klimat om ven kontinentaline. Voden keskmäine lämuz om +7,8 C°, kezakun-elokun +16,4..+18,1 C°, tal'vkun-uhokun −1,9..−4,3 C°. Paneb sadegid 637 mm vodes, enamba semendkus-elokus (73..97 mm kus), vähemba tal'vkus-keväz'kus (28..32 mm kus).

Eläjad

Vn 2011 Romanijan rahvahanlugemižen mödhe lidnan eläjiden lugu oli 253 200 ristitud, ezilidnoidenke — 382 896 ristitud 1368,5 km² pindal. Kaikiš suremb lidnan ristitišt oli 331 240 eläjad vl 1983.

Rahvahad (lidnalaižed, enamba 0,4 % vl 2011): romanijalaižed — 91,3 %, mad'jaralaižed — 7,1 %, Transil'vanijan saksalaižed — 0,5 %, čiganalaižed — 0,4 %, toižed rahvahad — 0,7 %.

Transport

Avtobusad i trolleibusad oma kundaližeks transportaks lidnas. Brašov-päraudtestancii radab vspäi 1873, se om kaikiš enamba jügutoittud valdkundas lidnan keskuzližen sijadusen tagut siš.

Rahvahidenkeskeine civiline Brašov-Gimbav-lendimport^[1] (GHV / LRBV) om avaitud vn 2023 kezakun 15. päiväl, sijadase Gimbav-ezilidnas kahesas kilometras päivlaskmha Brašovaspäi. Tehtas reisid Evropan surihe lidnoihe, om sezonižid čarterreisid Keskmeren lebutahoiže.

Homaičendad

↑ Rahvahidenkeskeižen Brašov-Gimbav-lendimportan sait (brasovairport.ro). (rom.) (angl.) (saks.) (mad'j.) (isp.) (ital.)

Irdkosketused

Lidnan oficialine sait (brasovcity.ro). (rom.)

Brašov Vikiaitas

[1] Rahvahidenkeskeižen Brašov-Gimbav-lendimportan sait (brasovairport.ro). (rom.) (angl.) (saks.) (mad'j.) (isp.) (ital.)

[1]