Ekseter

Ekseter
Exeter

Lidnanznam
Valdkund	Sur' Britanii
Eläjiden lugu (2019)	131,405 ristitud
Pind	47,04 km²
Pämez'	Triš Oliver (2021/2022, Trish Oliver)
Telefonkod	+44-(0)1392
Aigvö	tal'vel UTC+0, kezal UTC+1

Ekseter-lidnan shematine kart (2012)

Ekseter (angl.: Exeter [ˈɛksɨtə(r)], korn.: Karesk) om Suren Britanijan lidn Devon-grafkundas, sen administrativine keskuz. Sijadase Anglijan suvipäivlaskmas, Kornuoll-pol'sarel. Lidnan deviz om Semper fidelis («kaiken uskoline»).

Istorii

Eländpunktan aluz om pandud istorijanedeližel aigal. Eks-laivjogi (angl.: River Exe 96 km pitte) andoi nimen lidnale. Anglikanižen jumalankodikundan Ekseteran päjumalanpert' om saudud vozil 1112−1400. Lidn sai siti-statusad (angl. city) vl 1974.

Ekseteran ižandusen sarakod oma tekstil'edheotandad, maižanduzmašinoiden tehmine. Tervhudenkaičendan organizacii i sänendustusen Met Office oma znamasižed valdkundas.

Geografijan andmused

Lidnan sijaduz grafkundas i valdkundas vn 2011 kartal

Lidn seižub grafkundan keskuzpalan päivnouzmas. Sen keskuz sijadase vižtoštkümnes kilometras Eks-jogen lanktendaspäi La Manšha, 7 m ü.m.t. keskmäižel korktusel. Jogen ližaks, šlüzatoi kanal ühtenzoitab lidnad La Manš-sal'menke, kanal om nell' metrad süvütte.

Lähembaižed järedad lidnad oma Torki da Peinton 15 km suvhe, Plimut kuz'kümnes kilometras suvipäivlaskmha i Bristol' 110 km pohjoižpäivnouzmha.

Klimat om ven meren pehmdanke tal'venke, pil'vekaz vodes läbi, tal'vel eriližešti. Voden keskmäine lämuz om +10,9 C°, heinkun-elokun +16,9..+17,0 C°, tal'vkun-uhokun +5,9..+6,0 C°. Ekstremumad oma −16,5 C° (tal'vku) i +33,5 C° (kezaku). Kezaaigan minimum om +0,8 C° (kezaku), tal'vaigan maksimum om +16,5 C° (viluku). Ei voi panda halad kezakus-elokus. Paneb sadegid 829 mm vodes, enamba redukus-vilukus (86..95 mm kus), vähemba semendkus-heinkus (48..54 mm kus).

Eläjad

Vn 2011 Suren Britanijan rahvahanlugemižen mödhe lidnan eläjiden lugu oli 117,773 ristitud. Lidnaglomeracijan ristitišt oli 467,257 eläjad vl 2014.

Ekseteran universitet (angl.: University of Exeter, 23,6 tuhad üläopenikoid vl 2018) radab vspäi 1955, om sätud voziden 1838−1888 opendusen aluzkundoiden ühtištusel.

Galerei

• 
  Lidnan tobmuden üks' sauvusišpäi (Civic Centre, 2013)
• 
  Ph. Petr-apostolan kafedraline päjumalanpert' (anglikanine), vn 2006 nägu
• 
  Al'bert-princan kunigazline memorialine muzei i kuvagalerei (Viktorija-kunigaznaižen mužikan, 2014)
• 
  Ekseter-päraudtestancijan sauvuz vl 2009

Irdkosketused

• Lidnan tobmuden sait (exeter.gov.uk). (angl.)