El'basan

El'basan
Elbasani
Lidnanznam;	Flag;
Valdkund	Albanii
Eläjiden lugu (2023)	66,834 ristitud
Pind	17,4 km²
Pämez'	Gledian Llatja; (eloku 2019—)
Telefonkod	+355-(0)54
Aigvö	tal'vel UTC+1,; kezal UTC+2

El'basan (alb.: Elbasani [ˈɛlbaˈsani], Elbasan [ˈɛlbaˈsan]) om lidn Albanijan keskuzpalan keskuses. Se om valdkundan koumanz' lidn eläjiden lugun mödhe. Om El'basanan agjan i sen El'basanan municipalitetan administrativižeks keskuseks da palaks.

Istorii

Amuižgrekine Skamp-kolonii (amuižgrek.: Σκαμπίς Skampis) oli lidnan sijas, sid' rimalaine Mansio Skampa-lager' (latin.: Mansio Scampa). Nügüdläine eländpunkt om sätud 15. voz'sadal kuti lidnuz (om kaičenus tähäsai), letihe vl 1466 turkan Mehmed II-sultanan ohjandusen aigan, hän nimiti lidnad El'basanaks. El'basan-raudtestancii radab vspäi 1950.

El'basan šingotase raudan metallurgijal (ferrohromühthesuladused) i metalloiden ümbriradmižel kommunistižen režiman aigaspäi, territorii alištui jügedan tegimišton redustoitandale. Pästtas tabaktegesid i alkogoližid jomid lidnankundas.

Geografijan andmused

Lidn sijadase agjan keskuzpalan lodehes, Škumbini-jogen oiktal randal (alb.: Shkumbini 181 km pitte, lankteb Adriatižhe merhe), 133 m ü.m.t. keskmäižel korktusel.

Matkad Tiran-pälidnhasai om vižkümne nell' kilometrad lodeheze, avtol vai raudtedme.

Klimat om Keskmeren. Keza om päivoikaz lujas, tal'vaig om pil'vekaz. Voden keskmäine lämuz om +14,7 C°, kezakun-sügüz'kun +20,3..+23,7 C°, tal'vkun-uhokun +5,9..+7,4 C°. Paneb sadegid 1083 mm vodes, vähemba kezakus-elokus (32..50 mm kus), enamba kül'mkus-vilukus (120..156 mm kus).

Eläjad

Vn 2011 Albanijan rahvahanlugemižen mödhe lidnfartaliden eläjiden lugu oli 78 703 ristitud, kaiken municipalitetan — 141 714 ristitud 872,03 km² pindal, agjan pol'.

El'basanan universitet Aleksandr Džuvanin nimed^[1] (alb.: Universiteti i Elbasanit "Aleksandër Xhuvani", kahesa tuhad üläopenikoid) radab lidnas vspäi 1991, om sätud pedagogižen institutan alusel. Kaik kuz' fakul'tetad, medkolledž, Albanijan da Balkanan tedoiduzkeskuz mülüdas universitetha.