Gold Kost

Gold Kost
Gold Coast

Valdkund	Avstralii
Eläjiden lugu (2021)	640,778 ristitud
Pind	414,3 km²
Pämez'	Tom Teit (sulaku 2012—, Tom Tate)
Telefonkod	+61-(0)7
Aigvö	UTC+10

Gold Kost (angl.: Gold Coast) om Avstralijan lidn da kurort Kvinslend-štatan suvipäivnouzmaižes čogas. Se om štatan kahtenz' lidn eläjiden lugun mödhe, valdkundan — kudenz'.

Istorii

Eländpunktan aluz om pandud 1930-nzil vozil kuti Serfers-Paradais-kurorttahond lebukodidenke. Udesnimitihe Saut Kost-lidnad (angl.: South Coast Town) nügüdläižikš vn 1958 redukus. Se sai suren lidnan (angl. city) statusad vl 1959.

Gold Kost šingotase lebuturizmal (läz 10 mln tulijoid vodes, sidä kesken 850 tuh. verazmalaižid: kül'bendrandad, sörfing, tematižed puištod), sidodud sihe sauvondal i sömtegimištol, informacižtehnologijoiden kompanijoil, mail'man kassižiden fil'miden tehmižel.

Geografijan andmused

Lidn sijadase Tünen valdmeren Koralloidenmeren randal, 12 m ü.m.t. keskmäižel korktusel. Matkad štatan administrativižhe Brisben-keskushesai om 66 km pohjoižhe-lodeheze. Vezi mererandanno kožub sörfinganke, korktad lainhed oma paksud.

Klimat om subtropine neps. Voden keskmäine lämuz om +21,3 C°, tal'vkun-keväz'kun +24,2..+25,4 C°, kezakun-elokun +16,7..+17,3 C°. Ekstremumad oma +2,5 C° (heinku) i +40,5 C° (uhoku). Paneb sadegid 1253 mm vodes, vähemba heinkus-sügüz'kus (44..55 mm kus).

Eläjad

Vl 2010 lidnan eläjiden lugu oli 591 473 ristitud, vl 2016 — 638 090 ristitud. Kaikiš suremb lidnan ristitišt om nügüde.

Transport

Avtobusad, tramvaid («G:link») i ezilidnjonused oma kundaližeks transportaks lidnas.

Rahvahidenkeskeine civiline Gold Kost-lendimport (OOL, ende Kulangatt, 6,4 mln passažiroid finansižel 2016/17 vodel) sijadase lidnan suviröunanno. Tehtas reisid Avstralijan i Uden Zelandijan järedoihe lidnoihe, Päivnouzmaižen Azijan nenihe pälidnoihe: Tokio, Seul, Kuala-Lumpur, Singapur.

Irdkosketused

• Lidnan tobmuden sait (goldcoast.qld.gov.au). (angl.)