Guajakil'

Guajakil'
Guayaquil

Lidnanznam	Flag
Valdkund	Ekvador
Eläjiden lugu (2019)	2,698,077 ristitud
Pind	347 km²
Pämez'	Haime Nebot (eloku 2000—)
Telefonkod	+593−4
Aigvö	UTC−5

Lidnan transportine kart, 2010

Guajakil' (isp.: Guayaquil [ɡwaʝaˈkil]), oficialine nimituz Santjago de Guajakil' (isp.: Santiago de Guayaquil), om Ekvadoran kaikiš suremb lidn (kuti Kito-pälidn-ki) da meriport. Se om Guajasan agjan administrativine keskuz.

Istorii

Enččel indejalaižiden torguindlidnad sijazisoiš Guajakilin territorijal. Nügüdläižen eländpunktan aluz om pandud vl 1536 ispanijalaižil kuti Kaikiš hüväsuguine da kaikiš uskoline Santjago de Guajakil'-lidn (isp.: Muy Noble y Muy Leal Ciudad de Santiago de Guayaquil). Vl 1687 lidn eli varghudes läbi angližiden da francižiden merirazbainikoiden jäl'ghe.

Guajakil' šingotase järedal meriportal (valdkundan merijüguiden kaks' koumandest), kivivoin ümbriradmižel, kalanpüdusel, sauvondan edheotandoil i turizmal.

Geografijan andmused

Lidn sijadase valdkundan päivlaskmas, Guajas-jogen oiktal randal (isp.: Guayas) da Tünen valdmeren Guajakilin lahten randal. Istorine keskuz seižub 40 kilometras jogensuspäi, 4 m ü.m.t. keskmäižel korktusel. Matkad Kito-pälidnhasai om 250 km pohjoižpäivnouzmha orhal.

Klimat om tropine räk savannoiden. Lämuz om +25..+27 C° vodes läbi, absolütine minimum +15 C°. Paneb sadegid 1263 mm, kaks' sezonad om olmas. Vihmsezon oleleb El' Ninjo-pordon aigan vilukus-sulakus, paneb 200..332 mm kus. Kuivsezon oleskeleb vilun Gumbol'dtan joksmusen valatoitusen aigan, paneb 87 mm kezakus-kül'mkus kaikes pordos (1..6 mm elokus-redukus). Pened manrehkaidused oma kaikenaigaižed, lidn alištub torokaldoihe. Jäl'gmäine järed manrehkaiduz oli vn 2016 16. päiväl sulakud (7,8 ballad, 2 mest pölištui).

Guajakil' jagase 72 nimitadud territorialižeks sektoraks.

Eläjad

Vl 1950 eläjiden lugu oli 258 966 ristitud, sabustihe millionad läz 1980-nt vot. Kaikiš suremb lidnan ristitišt om nügüd'. Vl 2019 3,1 mln ristituid elädas ezilidnoidenke, se om videndez valdkundan ristitištos. Hristanuskond om levitadud, kaikiš amuižeb — katoline jumalankodikund.

Transport

Avtobusad, «Metrovía»-kiruhavtobusad (3 maršrutad), maršruttaksid da taksid oma kundaližeks transportaks lidnas.

Rahvahidenkeskeine civiline lendimport Hose Hoakin de Ol'medo-runokirjutajan nimed (GYE, 6 mln passažiroid vl 2011) sijadase 5 km pohjoižhe lidnan keskusespäi. Tehtas reisid Suviamerikan i Keskuzamerikan lähižihe maihe, Nju Jorkha, Majamihe, Madridha i Amsterdamha, mugažo Ekvadoradme (passažiroiden pol').

Irdkosketused

• Lidnan tobmuden aluzkundoiden oficialine sait (guayaquil.gob.ec). (isp.)