Hatang (žilo)

Hatang
Хатанга
Valdkund	Venäma
Eläjiden lugu (2010)	2,645 ristitud
Pämez'	Alevtin Skripkin; (sügüz'ku 2020—,; Алевтин Скрипкин)
Telefonkod	+7−39 176-xx-xxx
Aigvö	UTC+7

Sil sanal voib olda toižid znamoičendoid; miše nähta niid, tulgat tänna.

Hatang (ven.: Ха́танга) om Venäman žilo da port Krasnojarskan randan pohjoižes, sen Taimiran Dolganan Nenciden rajonas. Žilo om Hatangan küläkundan keskuz.

Istorii[vajehta | vajehtada tekst]

Eländpunktan aluz om pandud vl 1626 kuti tal'vdundsija. Kätihe žiloks vl 1971. Vll 1927−2005 eländpunkt oli Hatangan rajonan administrativižeks keskuseks. Šingotihe meriportaks i geologijan ekspedicijoiden keskuseks.

Hatangan ižandusen sarakod oma torguindmeriport^[1] Pohjoiženno meritenno i valdkundaližed aluzkundad. Küläkundas om äi tarbhaižiden kaivatusiden löudmižsijid (kivivoi, mujumetallad), no niiden otand kävutamižhe jäb tulijoile pol'vile.

Geografijan andmused[vajehta | vajehtada tekst]

Žilo sijadase rajonan päivnouzmas, ühtennimižen jogen randal (ven.: Ха́танга 227 km pitte, lankteb Laptevoiden merhe). Ühesa irdad. Lendimport ühtenzoitab Noril'skanke i Krasnojarskanke.

Klimat om subarktine, voib panda halad kezal mitte taht päiväl. Voden keskmäine lämuz om −12,4 C°, heinkun +12,5 C°, tal'vkun-uhokun −30..−32 C°. Absolütine minimum oleli −59 C°, maksimum +36 C°. Paneb sadegid 281 mm vodes, enamba heinkus-elokus (41..43 mm kus), vähemba tal'vkus-semendkus (11..18 mm kus). Lumikate venub 249 päiväd vai sen hätkemba, sen kaikiš suremb sanktuz oli 83 santimetrad. Polärine ö oleskeleb kül'mkun 17. päiväspäi vilukun 25. päivhäsai, polärine päiv om hätkemb (9. semendku — 4. eloku).

Kaik ühesa žilod mülüdas küläkundha Hatangan ližaks. Küläkundan pind om 336 405,42 km², kaikiš suremb rajonas.

Eläjad[vajehta | vajehtada tekst]

Vn 2010 Venäman rahvahanlugemižen mödhe žilon eläjiden lugu oli 2 645 ristitud, küläkundan — 5 653 ristitud. Kaikiš suremb žilon ristitišt oli 6 385 eläjad vl 1989. Kaik 4 684 ristitud elihe küläkundas vl 2017.

Ortodoksižen hristanuskondan Sündun Nägundan jumalanpert'^[2] om letud vll 1993−2001, se om kaikiš pohjoižemb pühäpert' valdkundas.

Edeližed küläkundan pämehed oma Sergei Baturin (sulaku-sügüz'ku 2020) i Aleksandr Kulešov (kezaku 2016 − uhoku 2020).