Hatang (žilo)

Hatang
Хатанга
Valdkund	Venäma
Eläjiden lugu (2010)	2,645 ristitud
Pämez'	Andrei Gašev; (keväz'ku 2025—)
Telefonkod	+7−39 176-xx-xxx
Aigvö	UTC+7

Sil sanal voib olda toižid znamoičendoid; miše nähta niid, tulgat tänna.

Hatang (ven.: Ха́танга) om Venäman žilo da port Krasnojarskan randan pohjoižes, sen Taimiran Dolganan Nenciden rajonas. Žilo om Hatangan küläkundan administrativine keskuz da pala.

Istorii

Eländpunktan aluz om pandud vl 1626 kuti tal'vdundsija. Kätihe žiloks vl 1971. Vll 1927−2005 eländpunkt oli Hatangan rajonan administrativižeks keskuseks Taimiran ümbrikos. Šingotihe meriportaks i geologijan ekspedicijoiden keskuseks.

Hatangan ižandusen sarakod oma torguindmeriport^[1] Pohjoiženno meritenno i valdkundaližed aluzkundad. Küläkundas om äi tarbhaižiden kaivatusiden löudmižsijid (kivivoi, mujumetallad), no niiden otand kävutamižhe jäb tulijoile pol'vile.

Geografijan andmused

Žilo sijadase rajonan päivnouzmas, ühtennimižen jogen randal (ven.: Ха́танга 227 km pitte, lankteb Laptevoiden merhe). Kaik ühesa irdad om saudud. Hatangan lendimport (27 m ü.m.t.) ühtenzoitab Noril'skanke i Krasnojarskanke.

Klimat om subarktine. Sä om tulleikaz vodes läbi. Tal'v om hätkeline i vilu lujas, lämuden znamasižidenke köläidusidenke. Voib panda halad kezan miččel taht päiväl (heinkun minimum om −0,7 C°). Voden keskmäine lämuz om −11,6 C°, heinkun +12,7 C°, tal'vkun-uhokun −29,3..−31,3 C°. Absolütine minimum oleli −59 C° (tal'vku, viluku), maksimum +36,7 C° (heinku). Kezaaigan minimum om −14,3 C° (kezaku), tal'vaigan maksimum om −0,2 C° (tal'vku). Ei voi olda sulasäd tal'vkus-uhokus. Paneb sadegid 283 mm vodes, kaks' päiväd koumespäi, enamba heinkus-elokus (42..43 mm kus), vähemba tal'vkus-semendkus (13..18 mm kus). Lumikate venub 249 päiväd vai sen hätkemba, sen kaikiš suremb sanktuz oli 83 santimetrad. Polärine ö oleskeleb kül'mkun 17. päiväspäi vilukun 25. päivhäsai, polärine päiv om hätkemb (9. semendku — 4. eloku). Kun keskmäine relätivine nepsuz vajehtase 70..73 % röunoiš kezakus-heinkus, 77..84 % toižiš kuiš.

Tobmuz

Kaik ühesa žilod mülüdas küläkundha Hatangan ližaks. Küläkundan pind om 336 405,42 km², kaikiš suremb rajonas.

Küläkundan tobmuden pämehed oma sen Administracijan pämehed. Edeližed Administracijan pämehed oma Aleksandra Fedosejeva (eloku 2024 — keväz'ku 2025), Andrei Doronin (uhoku 2023 — eloku 2024), Alevtin Skripkin (Алевтин Скрипкин, sügüz'ku 2020 — viluku 2023), Sergei Baturin (sulaku-sügüz'ku 2020), Aleksandr Kulešov (kezaku 2016 — uhoku 2020). Küläkundan Deputatoiden nevondkundan ezimez' om Irina Laptukova vn 2024 sulakuspäi, Aleksandr Beläjev (reduku 2021 — sulaku 2024), Marija Čardu (reduku 2016 — reduku 2021).

Eläjad

Vn 2010 Venäman rahvahanlugemižen mödhe žilon eläjiden lugu oli 2 645 ristitud, küläkundan — 5 653 ristitud. Kaikiš suremb žilon ristitišt oli 6 385 eläjad vl 1989. Kaik 4 684 ristitud elihe küläkundas vl 2017, 5 378 ristitud vl 2021.

Edahaižen Pohjoižen igähižed rahvahad ottas koume nelländest kaiken küläkundan ristitištos (2016): dolganad — 3884 rist., nganasanad — 84 rist., nencad — 16 rist..

Ortodoksižen hristanuskondan Jumalannägundan jumalanpert'^[2] om letud vll 1993−2001, se om kaikiš pohjoižemb pühäpert' valdkundas.

Lapsiden opendusen aluzkundad oma koume päivkodid, kaks' keskškolad (nomer 1 i škol-internat), lapsiden sädamižen keskuz, čomamahtoiden škol, lapsiden da norišton sportškolan rahvahiden sportansuguiš A.G. Kiziman nimed (Dudink) filial. Professionaližen opendusen aluzkundad ratas lähembaižiš lidnoiš (Noril'sk).