Holon (lidn)

Holon
חוֹלוֹן
Lidnanznam;	Flag;
Valdkund	Izrail'
Eläjiden lugu (2024)	191,829 ristitud
Pind	18,93 km²
Pämez'	Šai Keinan; (keväz'ku 2024—,; שי קינן)
Telefonkod	+972-
Aigvö	tal'vel UTC+2,; kezal UTC+3

Holon (evr.: חוֹלוֹן [χoˈlon]) om lidn Izrailin keskuzpalas. Se om Tel' Avivan suvine ezilidn, mülüb sen ümbrikho i Guš-Dan-aglomeracijha, valdkundan kümnenz' lidn eläjiden lugun mödhe.

Istorii

Istorijanedeližel aigal madal järv oli olmas lidnan sijas. Izrailin car'kundas eländpunkt oli sen sijas, ottihe mad maižandushe. Arabialaižiden vägitungendan jäl'ghe okaitud ma katoi letkil. Tämbäi-ki düniden kaks' kilometrad erigoittas suves lähižes Rišon Le Cion-lidnaspäi.

Eländpunktan aluz om pandud viden žilon ühtištusel vn 1940 keväz'kus. Nimitihe ut žilod nügüdläižikš, Holon-nimituz mainitase Tora-pühäkirjas paksus i libub evr.: ‏חול‏‎ hol'-sanaspäi «lete». Žilo sai lidnan statusad vl 1950.

Holon šingotase kahtendel surtte tegimišton zonal valdkundas, Haifan jäl'ghe. Om äi lapsenturizman aluzkundoid.

Geografijan andmused

Lidn sijadase kahtes kilometras Keskmeren randaspäi, 20 m ü.m.t. keskmäižel korktusel.

Röunatab Tel' Avivanke pohjoižes, Rišon Le Cion-lidnanke suves.

Eläjad

Vl 2011 lidnan eläjiden lugu oli 182,575 ristitud. Kaik 192,624 eläjad oli lidnas vl 2017. Kaikiš suremb lidnan ristitišt oli 196,282 eläjad vl 2020.

Lidnalaižiden keskes 93 % oma evrejalaižed i judaizman uskojad, toižed rahvahad — 7 % (arabijalaižed 0,2 %). Kaikiš suremb valdkundas uskojiden-samaritalaižiden kund (600 rist.) eläb lidnas.

Valdkundan maižanduzakademii om avaitud lidnas. Holonan tehnologine institut radab vspäi 1969 (evr.: מכון טכנולוגי חולון, kaik 4,3 tuhad üläopenikoid vl 2018).

Edeline lidnan pämez' om Moti Sason (kül'mku 1993 — keväz'ku 2024, מוטי ששון).