Klivlend

Klivlend
Cleveland
Lidnanznam;	Flag;
Valdkund	Amerikan Ühtenzoittud Valdkundad
Eläjiden lugu (2023)	362,656 ristitud
Pind	213,62 km²
Pämez'	Džastin Bibb; (viluku 2022—,; Justin Bibb)
Telefonkod	+1−216-xxx-xxxx
Aigvö	tal'vel UTC−5,; kezal UTC−4

Sil sanal voib olda toižid znamoičendoid; miše nähta niid, tulgat tänna.

Klivlend (angl.: Cleveland [ˈkliːvlənd]) om AÜV:oiden lidn pohjoižpäivnouzmaiženno röunanno. Se om Ogajo-štatan kahtenz' surtte lidn, Kajahogan ümbrikon (1180 km² kuivmad) administrativine keskuz.

Istorii

Eländpunktan aluz om pandud Mozes Klivlendal (angl.: Moses Cleaveland, jenaral da politikanmez', eli 1754−1806) vl 1796, om nimitadud alusenpanijan kanzannimen mödhe. Klivlend-külä sai oficiališt lidnan statusad vl 1836.

Klivlend šingotase tervhudenkaičendal. Nened kompanijad Fortune 500-nimikirjutesespäi baziruišoiš lidnas i Kajahogan ümbrikos: Cleveland-Cliffs (terasen tehmine), Progressive Corporation (avtoiden varmituz), Sherwin-Williams (sauvondmujud i krepindad), Parker-Hannifin (azotimed, klimatkontrol', fil'truind i toižed ladimed ohjandusen likundal täht), KeyCorp (banking) i Travel Centers of America (jüguavtoiden seižundtahoiden verk).

Geografijan andmused

Lidn sijadase Erinjärven suvirandal i langenijan sihe Kajahog-jogen randoil (angl.: Cuyahoga), valdkundröunanno, 199 m ü.m.t. keskmäižel korktusel. Kanad levitase järven vastrandal.

Klimat om ven kontinentaline subtropižen röunal. Keza om päivoikaz, tal'vaig om pil'vekaz. Voden keskmäine lämuz om +11,3 C°, kezakun-elokun +21,3..+23,6 C°, tal'vkun-uhokun −1,6..+1,3 C°. Ekstremumad oma −29 C° (viluku) i +40 C° (kezaku). Kezaaigan minimum om −1 C° (kezaku), tal'vaigan maksimum om +25 C° (tal'vku, uhoku). Ei voi panda halad heinkus-elokus, sügüz'kun minimum om 0 C°. Paneb sadegid 1042 mm vodes, enamba sulakus-redukus (90..100 mm kus), vähemba uhokus (63 mm). Paneb lunt 162 sm 46 päiväd tal'ves, lumikatken keskmäine korktuz sase 19 santimetrhasai vilukus-uhokus. Kun keskmäine relätivine nepsuz vajehtase 66..74 % röunoiš voden aigan. Järven veden keskmäine lämuz kuidme om +0,6 (uhoku) ..+24,6 C° (eloku).

Tobmuz

Lidnan tobmuden pämez' om mer (angl.: mayor of Cleveland). Edeline mer om Frenk Džordž Džekson (Frank George Jackson, viluku 2006 — viluku 2022).

Eläjad

Vn 2010 rahvahanlugemižen mödhe lidnan eläjiden lugu oli 396 815 ristitud, vn 2020 — 372 624 ristitud. Kaikiš suremb lidnan ristitišt oli enamba 750 tuhad eläjid vll 1920−1970 (914 808 rist. vl 1950). Läz 2,2 mln elädas lidnaglomeracijas (2020).

Augotižlibundan mödhe (lidnan eläjad vl 2020): afroamerikalaižed — 47,5 %, evropalaižed — 32,1 % (ispanijalaižita), latinamerikalaižed i ispanijalaižed — 13,1 %, azijalaižed — 2,8 %, indejalaižed — 0,2 %, segoitadud augotižlibundanke — 3,8 %, toiženke augotižlibundanke — 0,5 %.

Transport

Avtobusad i metro oma kundaližeks transportaks lidnas. Metropoliten radab vspäi 1955 (om koume jonod 50 stancijanke, 54 km raudted). Konteinerport radab Kajahogan jogensun randal.

Rahvahidenkeskeine civiline Klivlend Hopkins-lendimport^[1] (CLE / KCLE, 10 mln passažiroid vl 2019) sijadase nell'toštkümnes kilometras suvipäivlaskmha lidnan keskuzpalaspäi.

Galerei

Lidnan tobmuden sauvuz (2023)
Pühän Joann-evangelistan kafedraline päjumalanpert', vn 2018 nägu (riman katoline, om saudud vll 1848−1852)
Azjaline rajon vl 2024
Tower City Center-ofisbobuštuzkeskuz vl 2017, vll 1930−1977 manalaižen päraudtestancijan terminal
Klivlendan čomamahton muzei (2018)
Klivlendan kundaližen kirjišton päsauvuz (2018)
Rahvahidenkeskeižen Klivlend Hopkins-lendimportan nägu kaimdajaspäi vl 2004