Bratislav

Bratislav
Bratislava

Lidnanznam	Flag
Valdkund	Slovakii
Eläjiden lugu (2022)	476,922 ristitud
Pind	367,58 km²
Pämez'	Matuš Vallo (tal'vku 2018—, Matúš Vallo)
Telefonkod	+421−2
Aigvö	tal'vel UTC+1, kezal UTC+2

Lidnan kart (2014)

Bratislav (slovak.: Bratislava [ˈbracislaʋa]) om Slovakijan pälidn da kaikiš suremb lidn. Se om Bratislavan randan administrativižeks keskuseks mugažo, mülüb sihe.

Istorii

Eländpunkt mainitase ezmäižen kerdan vl 907 Zal'cburgan aigkirjas toran Presburganno (Bratislavan saksalaine nimi vhesai 1919) ümbrikirjutandas — mad'jaralaižed toraziba Bavarijan armijad vaste i otiba vägestust. Vozil 1541−1684 lidn oli Mad'jaranman pordaigaližeks pälidnaks Budan turkaižen okkupacijan tagut.

Edel 1919. vot lidnan nimed oliba Prešporok, Prešporek, Presburg (saks.: Pressburg), Požon' (mad'j.: Pozsony), keskaigal latin.: Istropolis, Posonium. Vl 1919 udesnimitihe lidnad nügüdläižikš. Vozil 1919−1939 i 1945−1992 mülüi Čehoslovakijha. Vll 1939−1945 oli i vspäi 1993 om ripmatoman Slovakijan pälidnaks.

Bratislav šingotase Volkswagen-kompanijan avtotegimel, torguindal, bankoil, informacižtehnologijoiden sarakol. Läz üht millionad turistoid tuldas pälidnan regionha joga vodel (27 muzejad).

Geografijan andmused

Lidn sijadase Slovakijan suvipäivlaskmas, Dunain molembil randoil i Peniden Karpatiden ezimägištol, 126..514 m korktusil, 140 m ü.m.t. keskmäižel korktusel. Matkad toižhe pälidnhasai — Venhasai — om vaiše 60 km päivlaskmha. Bratislav om röunoiš kahtenke valdkundanke kerdalaz — Avstrijanke da Mad'jaranmanke, se om üks'jäine statj mail'mas.

Klimat om ven kontinentaline. Keza om päivoikaz, tal'vaig om pil'vekaz. Voden keskmäine lämuz om +11,1 C°, kezakun-elokun +20,2..+22,0 C°, tal'vkun-uhokun +0,3..+1,9 C°. Ekstremumad oma −24,6 C° (viluku, uhoku) i +39,4 C° (eloku). Paneb sadegid 574 mm vodes, enamba semendkus-sügüz'kus (59..62 mm kus), vähemba vilukus-sulakus (33..37 mm kus). Kezal kovad tulleid oleldas lidnas.

Tobmuz

Bratislavan administrativine jagand (2020)

Bratislav jagase videks nomeruidud rajonaks (I..V, slovak.: okres), V. rajon sijadase Dunain taga. Rajonad alajagasoiš 17 lidnanpalaks (slovak. Mestská časť). Kaik om kahesa rajonad Bratislavan randas, jättud koume rajonad oma Malacki, Pezinok, Senec.

Edeline lidnan pämez' (slovak.: Primátor Bratislavy) om Ivo Nesrovnal (tal'vku 2014 — tal'vku 2018).

Eläjad

Vl 1900 lidnan eläjiden lugu oli 61 500 ristitud, i 20. voz'sadan aigan se ližadui lujas. Vn 2001 Slovakijan rahvahanlugemižen mödhe lidnan eläjiden lugu oli 428 672 ristitud. Vl 2015 lidnan ristitišt oli 422 932 eläjad, vl 2019 — 437 725 eläjad. Kaikiš suremb lidnan ristitišt oli 442 197 eläjid vl 1991. Vl 2011 randan ristitišt oli 602 436 eläjad 2 052 km² pindal, vl 2022 — 728 370 eläjad, se sädab Bratislavan aglomeracijad.

Rahvahad (2001): slovakalaižed — 91,4 %, mad'jaralaižed — 3,8 %, čehalaižed — 1,9 %, saksalaižed — 0,3 %, toižed rahvahad — 2,6 %.

Religijan mödhe (2001): katolikad — 56,7 %, ateistad — 29,3 %, lüteranižen jumalankodikundan uskojad — 6,0 %, toižed uskojad — 4,7 %.

Transport

Tramvaid (vspäi 1895), avtobusad, trolleibusad da taksid oma kundaližeks transportaks lidnas. Jogiport om saudud lidnas.

Bratislav om järedaks raudtesol'meks, ühtenzoitab kuz' čuradust. Kaks' päraudtestancijad ratas lidnas Dunain erazvuiččil randoil: Bratislav-Päine om lidnan keskuzpalas (vspäi 1848), Bratislav-Petržalk sijadase Dunaintaguižes.

Rahvahidenkeskeine civiline Lendimport Štefanikan nimed (vai Bratislav-Ivank, slovak.: Bratislava-Ivanka / Letisko M. R. Štefánika, BTS / LZIB, 2,2 mln passažiroid vl 2019) om valdkundan kaikiš znamasižemb i sijadase ühesas kilometras pohjoižpäivnouzmha lidnan keskuzpalaspäi. Sišpäi tehtas reisid erasihe-se Evropan maihe, om äi čarterreisid Keskmeren lebutahoižesai.

Irdkosketused

• Lidnan tobmuden oficialine sait (bratislava.sk). (slovak.)
• Lidnan turistiž-informacine sait (visitbratislava.com). (angl.) (saks.) (slovak.) (mad'j.) (ital.)