Afinad

Afinad
Αθήνα

Valdkund	Grekanma
Eläjiden lugu (2012)	3 089 698 ristitud
Pind	412 km²
Pämez'	Giorgos Kaminis (viluku 2 011—)
Telefonkod	+30-21
Aigvö	tal'vel UTC+2  kezal UTC+3

Afinad (grek.: Αθήνα) om Grekanman pälidn da kaikiš suremb lidn. Se om Attik-agjan pälidn mugažo.

Lidn sen ezilidnoidenke om grekan ižandusen südäin. Grekanman kogosüdäiproduktan pol' tehtas Afiniš, elektrusen nell' videndest kulutase siš.

Istorii

Eländpunkt mainitase ezmäižen kerdan 15. voz'sadal edel m.e. Lidn oli Amuižen Grekanman znamasižeks keskuseks.

Vl 1834 Afinad tegihe uden Grekanman pälidnaks Nafplionan jäl'ghe. Sil aigal Afiniden ristitišt oli 5 tuh. ristituid.

Geografijan andmused

Afiniden nägu Man kaimdajaspäi.

Afinad sijadasoiš valdkundan keskuses, 20 metrad valdmeren pindan päl keskmäižel korktusel. Reljef om erazvuitte lidnan röunoiš: tazangišt om ümbärtud mägil. Pirei-ezilidn om meriportaks 12 km suvipäivlaskmha keskusespäi.

Klimat om subtropine kuiv. Paneb sadegid 400 mm vodes (kezal 18 mm koumes kus).

Tobmuz

Attik-agj jagase 35 municipalitetha (kaikutte om ičeze pämehenke). Afinad-municipalitet om üks' niišpäi. Se alajagase 7 lidnrajonha, niiden ühthine pind om 39 nellikkilometrad, ristitišt 655 780 eläjad (vl 2011). Giorgos Kaminis om Afinad-municipalitetan pämez' vspäi 2011. Todesižikš Afinad ülitadas Attik-agjan territorijad.

Eläjad

Lidnaglomeracijan ristitišt om 4 mln (Pirei-portanke da toižidenke ezilidnoidenke), se om valdkundan eläjiden koumandez.

Transport

Metro, lidnelektrojonused, tramvai, avtobusad da trolleibusad, taksid da libutimed (funikulörad) oma kundaližeks transportaks lidnan südäimes. Vspäi 1869 metro radab lidnas da sen kaimdailidnoiš (vl 2016 3 jonod, 65 stancijad, 84,5 km raudted).

Afiniden rahvahidenkeskeine civiline Elefterios Venizelos-lendimport (ATH) seižub 94 metrad ülemba valdmeren tazopindad, sijadase 20 km päivnouzmha lidnan keskusespäi (metrol, 30 km avtotedme). Sišpäi tehtas reisid Evropan da Lähižen Päivnouzmman äjihe maihe.

Irdkosketused

• Afinad-municipalitetan oficialine sait (cityofathens.gr). (grek.) (angl.)