Pirei

Pirei
Πειραιάς
Valdkund	Grekanma
Eläjiden lugu (2011)	163,688 ristitud
Pind	10,86 km²
Pämez'	Ioannis Moralis; (sügüz'ku 2014—,; Γιάννης Μώραλης)
Telefonkod	+30−210
Aigvö	tal'vel UTC+2,; kezal UTC+3

Pirei (grek.: Πειραιάς [piɾɛˈas], Pireas; amuižgrek.: Πειραιεύς, Pireefs) om Grekanman lidn, Afiniden suvipäivlaskmaine ezilidn, valdkundan kaikiš järedamb meriport (20 mln matknikoid vodes, 3,3 mln konteinerid vl 2015) i mail'man laivoidenlikundan registracijan znamasine keskuz. Mülüb Attik-periferijha.

Istorii

Eländpunkt om amuižgrekižen Afiniden polisan meriportaks völ. Lidnoidenkeskeine te oli kaitud seinil londoišpäi vll 460−86 EME, ned oliba pandud mantazole rimalaižil i kaičenus penil paloil. Ezmäine Grekanmas raudte ühtenzoiti lidnad Afinidenke vl 1869. Afiniden metron jono nomer üks' i ezilidnelektrojonusen jonod tuldas Pireihe.

Pirei šingotase metallurgijal, mašiništonsauvomižel i sömtegimištol meriportan ližaks.

Geografijan andmused

Lidn sijadase agjan i kaiken valdkundan keskuzpalas, Egeižen meren Saronikos-merikaran randal, 0..87 m korktusil, kaks' metrad ü.m.t. keskmäižel korktusel.

Matkad Afiniden keskuzpalhasai om kahesa kilometrad pohjoižpäivnouzmha. Pirei- i Lefk- (grek. Λεύκα) raudtestancijad ratas lidnas.

Tobmuz

Elänzoitmatoi Psitalei-sar' mülüb Pirein kundha lidnan ližaks. Kundan pind om 10,86 km², se jäb vajehtuseta vspäi 1968.

Edeližed lidnan pämehed oma Vasilis Mihaloliakos (2011–2014), Panagiotis Fasoulas (2007–2010), Kristos Agrapidis (1999–2006), Stelios Logotetis (1991–1998).

Eläjad

Vl 2001 lidnan eläjiden lugu oli 175,697 ristitud. Kaikiš suremb lidnan ristitišt oli 196,389 eläjad vl 1981. Vn 2011 Grekanman rahvahanlugemižen mödhe kaik 448,997 ristitud elädas lidnaglomeracijas (kahtenz' valdkundas), se mülüb Surihe Afinihe.