Lim

Lim
Lima

Lidnanznam	Flag
Valdkund	Peru
Eläjiden lugu (2015)	8,852,000 ristitud
Pind	2,672,3 km²
Pämez'	Rafael' Lopes Aliaga (viluku 2013—, Rafael López Aliaga)
Telefonkod	+51-(0)1
Aigvö	UTC−5

Liman kart (2013)

Lim (isp., keč. i aimar.: Lima [ˈlima]) om Perun pälidn da kaikiš suremb lidn. Se om Lim-provincijan administrativine keskuz, nece provincii ei mülü nimiččehe regionha.

Istorii

Eländpunktan aluz om pandud vn 1535 vilukun 18. päiväl kuti Sjudad-de-los-Reies («Kunigahiden lidn» kätes ispanijan kelespäi). Sid' sijaližed eläjad nimitaškanzihe lidnad Rimak-jogen (isp.: Rímac) da sen ümbriolijan tahondan mödhe.

Lidnan industrijan päsarakod oma kivivoin ümbriradmine, himine, tekstiline, sömtegimišt, turizm. Perun KSP:n kaht koumandest tehtas Limas ezilidnoidenke.

Geografijan andmused

Lidn sijadase valdkundan keskuzpalan suves, Tünen valdmeren suvipäivnouzmaižel randal, Andiden ezimägištol, 0..500 m ü.m.t. korktusil.

Liman keskuzpala sijadase vižtoštkümnes kilometras valdmerespäi. Lujad manrehkaidused oleldas (oliba vozil 1687, 1746, 1940).

Klimat om tropine neps, pil'vekaz, kezakus-redukus eriližešti. Päivesen keskmäine lämuz om +16..+22 C° vodes läbi. Minimaline enzne lämuz om +8,0 C° (semendku), maksimaline +33,4 C° (keväz'ku). Il'man lämuz voib ületada +27 C° miččel taht kul. Paneb sadegid seičeme millimetrad vodes, vähäižin kuidme (0,1..1,5 mm), necen tagut voib nimitada klimatad pehmdaks-ki letetazangišton. Kun keskmäine relätivine nepsuz vajehtase 81..85 % röunoiš vodes läbi. Nepsuz om luja, sikš miše vilu valdmerine Gumbol'dtan joksmuz tuleb Antarktikan randoidennopäi räkile tahondoile, i se kucub paksuid sumegid da pil'vištod.

Tobmuz

Liman rajonad (oli 49 vl 2007)

Lim jagase seičemeks administrativižeks ümbrikoks. Ümbrikod alajagasoiš 43 rajonaks.

Lidnan tobmuden pämez' om sen alkal'd (isp.: Alcalde Metropolitano de Lima), valičese nelläks vodeks. Edeližed lidnan pämehed oma Migel' Romero Sotelo (Miguel Romero Sotelo, vn 2022 semendku-tal'vku, velgusentäutai), Horhe Munjos Uells (Jorge Muñoz Wells, viluku 2019 — eloku 2022), Luis Kastanjeda Lossio (Luis Castañeda, viluku 2015 — tal'vku 2018).

Eläjad

Vl 2015 lidnan eläjiden lugu om 8,852,000 ristitud. Perun kaikutte koumanz' ristit eläb Liman lidnaglomeracijas (9,7 mln vl 2015).

Ristitišton enambuz oma vaugedverižed (kaks' videndest), mestizo (vaugedverižiden da indejalaižiden jäl'gelaižed, kaks' videndest) da azijalaižed (kümnendez').

Om enamba katoližen jumalankodikundan uskojid.

Transport

Avtobusad da kiruhavtobusad (El Metropolitano) oma kundaližeks transportaks. Vodespäi 2001 metropoliten radab lidnas (vspäi 2012 üks'jäine jono radab 26 stancijanke, 34 km raudted).

Kal'jao-port lugese erižeks eländpunktaks, hot' se om ümbärtud Lim-lidnal koumes polespäi. Se om Suviamerikan järedaks kalatezportaks. Raudte 535 km pitte oigendase randaspäi kaivuzidennoks, mugažo kävutadas sidä ozutamha turistoile.

Rahvahidenkeskeine civiline lendimport Horhe Čavesan nimed (LIM / SPJC, 23,7 mln passažiroid i 370 tuh. jügutonnoid vl 2018) sijadase üks'toštkümnes kilometras lodeheze lidnan istorižes keskusespäi Kal'jao-ezilidnas. Sišpäi tehtas reisid Suviamerikan äjihe maihe da AÜV:oiden surihe lidnoihe, Madridha i Londonha, mugažo Perudme.

Galerei

• 
  Lidnan tobmuden sauvuz (2019)
• 
  Liman kafedraline bazilikjumalanpert', vn 2019 nägu (riman katoline, om saudud vll 1535−1649)
• 
  Finansine keskuz San Isidro-rajonas vl 2023
• 
  Desamparados-päraudtestancii vl 2018

Irdkosketused

• Lim-lidnan oficialine sait (munlima.gob.pe). (isp.)