Konakri

Konakri
Conakry (fr. i angl.)

Lidnanznam
Valdkund	Gvinei
Eläjiden lugu (2014)	1,667,864 ristitud
Pind	450 km²
Pämez'	Mmahava Silla (sügüz'ku 2021—, M'Mahawa Sylla)
Telefonkod	+224−4
Aigvö	UTC+0

Lidnan kart (2011)

Konakri (francijan i anglijan kelil: Conakry, francijan virkand [kɔnakʁi], anglijan [ˈkɒnəkri], sus.: Kɔnakiri) om Gvinejan pälidn da kaikiš suremb lidn.

Lidn om valdkundan ižandusen päkeskuseks da kaikiš järedambaks portaks.

Istorii

Eländpunktan aluz om pandud vl 1887 francijalaižil.

Vl 1891 Konakri kändihe Francižen Gvinejan pälidnaks.

Konakri šingotase jomiden tegimil (Coca-Cola, mineralveded), sauvondmaterialiden edheotandoil (cement, mujud), plastiktegesiden pästandal, telekommunikacijoiden kompanijoil i bankoil.

Geografijan andmused

Lidn sijadase ühtenzoittud dambal kontinentha Tombo (Tolebo)-sarel da Kalum-nemakol. Kaid nem' andase Atlantižele valdmerele edahaks, se om 36 km pitte. Kaik korktused oma 100 metrad penembad.

Klimat om subekvatorialine mussonine räk. Kun päiväline keskmäine lämuz vajehtase +25..+27 C° röunoiš voden aigan. Paneb sadegid 3780 mm, sidä kesken kuivan sezonan aigan (kül'mku−sulaku) — 105 mm vaiše. Kuival sezonal harmattan-tullei puhub Saharaspäi.

Tobmuz

Konakri om tazostadud Gvinejan agjaha, jagase videks kommunaks (lidnankundaks). Kommunad alajagasoiš 97 fartalaks.

Lidnan tobmuden pämez' om gubernator (angl.: governor of the city of Conakry). Edeližed lidnan-agjan pämehed om Matüren Bangora (Mathurin Bangoura, 2016 — sügüz'ku 2021), oli Soriba Sorel Kamara (2014−2016, koli).

Eläjad

Vl 1958 lidnan eläjiden lugu oli 58 tuhad ristituid. Vn 2014 rahvahanlugemižen mödhe pälidnan eläjiden lugu oli 1,667,864 ristitud, valdkundan seičemendez.

Vl 2014 pälidnan 85,7 % 15-voččid da sen vanhemb el'genziba i pagižiba francijan kelel, 42,1 % mahtoiba kirjutada i lugeda sil kelel.

Transport

Taksid oma kundaližeks transportaks. Raudted ühtenzoittas pälidnad valdkundan maidenke, vedadas jüguid rahvahidenkeskeižen torguindan täht Konakrin meriportan kal't.

Rahvahidenkeskeine civiline Konakri (Gbessii)-lendimport (angl.: Gbessia, CKY, vspäi 1945, 527 tuh. passažiroid vl 2018) sijadase koumetoštkümnes kilometras pohjoižpäivnouzmha lidnan keskuzpalapäi (Tombo-sarespäi), Kalum-nemakon suvirandal. Se tegeb reisid Afrikan päivlaskman da Evropan verhiže maihe.

Galerei

• 
  Stadion Lansana Konte-jenaralan nimed (2022)
• 
  Konakrin rahvahidenkeskeine lendimport vl 2021
• 
  Jüguiden privatine vend Diksinn-ezilidnas (2020)

Sebruzlidnad

• AÜV Klivlend, Ogajo, AÜV