Kinšas

Kinšas
Kinshasa

Lidnanznam	Flag
Valdkund	Kongon Demokratine Tazovaldkund
Eläjiden lugu (2017)	11,855,000 ristitud
Pind	600 km²
Pämez'	Andre Kimbuta Jango (keväz'ku 2007—)
Telefonkod	+243−9
Aigvö	UTC+1

Kinšas (franc.: (Ville de) Kinshasa [kinʃasa]; edel 1966. vot — Leopol'dvil' ), om Kongon Demokratižen Tazovaldkundan pälidn, se-žo agj om, KDT:n kaikiš suremb lidn, Afrikan koumanz' lidn eläjiden lugun mödhe (Lagosan da Kairan jäl'ghe, Johannesburganke tazomäras).

Kinšas om kahtenz' francijankel'hine lidn surtte mail'mas Parižan jäl'ghe.

Istorii

Eländpunktan aluz oli pandud Leopol'dvil'-torguindžiloks vl 1881, Afrikan Genri Morton Stenli-tedoidai ühtni sihe. Nimituz oli anttud Bel'gijan Leopol'd Toine-kunigahan mödhe. Jogiport sijazihe lidnas korktemb mi Livingstonan vezilanktendad, se laskeb toda ujuden tavaroid valdkundan tobmadme paladme. Vl 1898 raudte tuli lidnha, ühtenzoiti meriportanke. Vspäi 1920 Leopol'dvil' vajehti mererandališt Bom-lidnad Bel'gine Kongo-kolonijan administrativižeks keskuseks. Vspäi 1960 om valdkundan pälidnaks. Udesnimitihe lidnad vl 1966 enččen külän mödhe nügüdläižen lidnan territorijal.

Kaikenvuitte ümbriradai tegimišt šingotase lidnas, mugažo laivoiden sauvomine da kohenduz. Sen ližaks, metallurgine kompleks radab Maluku-rajonas.

Geografijan andmused

Kinšasan sijaduz valdkundas vn 2011 kartal

Kinšas seižub Kongo-jogen hural randal, alemba jogikändant, 240 m ü.m.t. keskmäižel korktusel. Brazzavil'-lidn, Kongon Tazovaldkundan pälidn, sijadase Kinšasan kohtha, jogen oiktal randal. Kaks' pälidnad seištas toine toižen kohtha — nece olend om üks'jäine mail'mas.

Klimat om subekvatorialine, pil'vekaz vodes läbi. Voden keskmäine lämuz om +25,5 C°, kun lämuz vajehtase +22,5 C° (heinku) .. +26,9 C° (sulaku) röunoiš. Ekstremumad oma +10 C° (heinku) i +38 C° (keväz'ku). Paneb sadegid 1482 mm vodes, enamba keväz'kus-sulakus (221..238 mm kus) i kül'mkus (247 mm), kuiv sezon oleskeleb kezakus-uhokus (16 mm pordos). Kun keskmäine relätivine nepsuz vajehtase 74..83 % röunoiš voden aigan.

Tobmuz

Lidnan ümbrikod, kommunad i fartaloiden röunad (2021)

Kinšas om lidn (franc.: ville) da üks' KDT:n 11 agjaspäi (franc.: province) ühtes.

Lidn-agj jagase nelläks administrativižeks ümbrikoks (franc.: district), ned — 24 kommun:aks (fr. commune).

Valdkundan parlamentan ühtnijad agjaspäi: kahesa ezitajad ratas-išttas Senatas, 59 — Nacionaližes Suimas.

Eläjad

Vl 2012 lidnan eläjiden lugu oli 9 546 000 ristitud. Vl 2017 kaik 11 855 000 ristitud elihe lidnas i 17 071 000 ristituid kaikes Kinšasan agjas 9 965 km² pindal. Kaikiš suremb lidnan ristitišt om nügüd'.

Edel ripmatomut (vn 1960) alaman kel' oli toižeks oficialižeks, sid' francijan kel' jäi üks'jäižeks. Kinšas om teravan kontrastan lidn elokahiden i golliden rajoniden keskes, ristitišt ližadub südäimmigracijan tagut.

Lidn sijadase lingala- (arealan suvipäivlaskmaine čoga) i kikongo-keliden levigandusen röunal, lingala om rahvahidenkeskeižen besedoičendan keleks. Toižed levitadud keled oma čiluba, suahili.

Openduzsijad

Kaik om 11 valdkundališt da 40 privatišt institutad da universitetad lidnas. Ned oma sijatud tazomäras kaikid ümbrikoidme.

Vl 1958 ezmäine afrikaine südäitukuine reaktor om saudud Lovanium-universitetas (Kinšasan universitetan pala). Nügüd' sigä om kaks' reaktorad tedoidusiden täht.

Transport

Kinšasan rahvahidenkeskeine Ndžili-lendimport (FIH / FZAA, 773 tuh. passažiroid vl 2014) om valdkundan kaikiš suremb. Se om soda- da civiliženke znamoičendanke ühtes, ühtenke lendahtamižsarganke.

Ehtatuz sidob lidnad Brazzavilinke, nell' kilometrad Kongo-joges iliči.

Sebruzlidnad

Kinšasal koume sebruzlidnad om olmas:

• Turkanma Ankar, Turkanma (vspäi 2005)
• Brazzavil', Kongon Tazovaldkund
• Bel'gii Brüssel', Bel'gii (vspäi 2002)

Irdkosketused

• Lidnan tobmuden oficialine sait (kinshasa.cd). (fr.)