Antananarivu

Antananarivu
Antananarivo

Lidnanznam
Valdkund	Madagaskar
Eläjiden lugu (2014)	2,200,000 ristitud
Pind	88 km²
Pämez'	Lalao Ravalomanana (reduku 2015—)
Telefonkod	+261−023
Aigvö	UTC+3

Antananarivu (malagas.: Antananarivo «tuhiden külä») om Madagaskaran pälidn da kaikiš suremb lidn. Se om Antananarivun agjan administrativine keskuz mugažo.

Istorii

Eländpunktan aluz om pandud 17. voz'sadan augotišes Andrianzaka-kunigahal. 19. voz'sadaspäi om ühtenzoittud Madagaskar-saren pälidnaks. Vl 1896 Tananarive kändihe francižen Madagaskar-kolonijan pälidnaks. Se oli francine saren ripmatomuden sandhasai vl 1960.

Geografijan andmused

Lidn sijadase Ikop-jogen (franc.: Ikopa) kukhikahil randoil, 1276 m ü.m.t. keskmäižel korktusel, Madagaskar-saren keskuzpalan päivnouzmas. Pen' ratud Anusi-järv (franc. Lac Anosy) om lidnan suvipalas. Avtoted ühtenzoittas kaikiden agjoiden pälidnoidenke. Raudte 368 km pitte mäneb Tuamasin-merenporthasai pohjoižpäivnouzmas.

Klimat om subtropine mussonine korktoiden mägiden, 15..21 C° keskmäiženke lämudenke vodes läbi (voden — +18,3 C°). Paneb sadegid 1437 mm vodes, kuivsezon oleskeleb semendkus-sügüz'kus (47 mm kaikes pordos).

Eläjad

Vl 2005 eläjiden lugu oli 1 613 375 ristitud. Läz 3 mln ristituid elädas ezilidnoidenke (2013), valdkundan kahesandez. Äjad ristitud oma ezmäižen pol'ven lidnalaižed, heiden jured oma küliš kaikedme saredme.

Ižanduz

Saren tegimišton i kommertižiden sauvusiden tobj pala om keskitadud Antananarivus. Industrialižed sarakod oma tekstilin da nahkoiden tehmine, muilan pästand, sömtegimišt, tabakan ümbriradmine i oluden tehmine.

Rahvahidenkeskeine soda- da civiline Ivato-lendimport (TNR, 600 tuh. passažiroid vl 2009) sijadase 15 km lodeheze lidnan keskusespäi, tehtas reisid Parižha, Reün'jonha i Afrikan lähižihe maihe, Stambulha, mugažo Madagaskaradme.

Sebruzlidnad

• Francii Fontene-o-Roz, Francii (vspäi 2003)
• Armenii Jerevan, Armenii (1981)

Irdkosketused

• Lidnan ohjastusen oficialine sait (mairie-antananarivo.mg). (malagas.)