Uagadugu

Uagadugu
Ouagadougou
Valdkund	Burkina Faso
Eläjiden lugu (2019)	2,453,496 ristitud
Pind	520 km²
Pämez'	Arman Beunde; (2016—,; Armand Béouindé)
Telefonkod	+226−50
Aigvö	UTC+1

Uagadugu (franc.: Ouagadougou [waɡaduɡu], lühüdas Ouaga) om Burkina Fason pälidn da kaikiš suremb lidn.

Istorii

Eländpunkt mainitase 15. voz'sadaspäi. Se oli Mosi-imperijan pälidnaks vspäi 1441, om sen imperatoriden kaikenaigaižeks pälidnaks vspäi 1681. Francijalaižed kändiba Uagadugud Francine Ülävol't-kolonijan administrativižeks keskuseks vl 1919. Raudte tuli lidnha Kot d'Ivuaraspäi vl 1954.

Uagadugu šingotase tekstiližel (puvillan puhtastand) i sömtegimištol (risan puhtastandan, arahis-, karite-pähkmiden i lihan ümbriradmižen edheotandad). Kengiden fabrik, šintegim, cementan tegim, velosipedoiden i motocikloiden ühthekeradamine. Järed LEK radab lidnas.

Geografijan andmused

Lidn sijadase platol valdkundan keskuzpalas, 305 m ü.m.t. keskmäižel korktusel. Raudte jagab lidnad pohjoižeks i suveks.

Klimat om räk pol'kuiv, tropižen kaks'sezonižen röunal. Voden keskmäine lämuz om +28,4 C°, kaikiš räkembad kud oma keväz'ku-semendku i reduku (+29..+33 C° keskmäras), vilumbad tal'vku i viluku (+25 C°). Ekstremumad oma +9 C° i +46 C°. Paneb sadegid 744 mm vodes, kuiv sezon oleskeleb kül'mkus-keväz'kus (8 mm pordos).

Lidn jagase videks rajonaks (franc.: arrondissement). Rajonad alajagasoiš 30 sektoraks, sektorad — ümbrikoikš.

Eläjad

Vl 2012 lidnan eläjiden lugu oli 1 626 950 ristitud 219 km² pindal. Kaikiš suremb lidnan ristitišt om nügüd'. Kaik koume millionad eläjid om ezilidnoidenke 2805 km² pindal (2019), valdkundan seičemendez.

Universitet Džozef Ki-Zerbon nimed^[1] radab lidnas (franc.: Université Joseph Ki-Zerbo, edel 2015. vot Uagadugun universitet, alusenpanend 1974, 40 tuh. üläopenikoid vl 2010), mugažo kaks' tošt universitetad oma avaitud.

Transport

Uagadugun rahvahidenkeskeine lendimport^[2] Toma Sankaran nimed (OUA / DFFD, 600 tuh. passažiroid vl 2019) sijadase lidnan keskuzpalas, sišpäi om pol'tošt kilometrad bizneskeskushepäi. Mugažo AÜV:oiden sodaväged kävutadas lendimportan pol't lendamha susedvaldkundoihe. Uden lendimportan (Uagadugu-Donsin) sauvondan ezmäine jono mäni vozil 2013−2018 35 km pohjoižpäivnouzmpolehe lidnaspäi heitmaha lendimiden mahalaskendad lidnan keskusespäi, planiruihe vaumita sauvondad voden 2021 lopule, sid' sirtihe sauvomižen lopindad vodele 2025.

Homaičendad

↑ Universitetan Džozef Ki-Zerbon nimed sait (ujkz.bf). (fr.)
↑ Uagadugun lendimportan sait (ouagadougou-aeroport.bf). (fr.) (angl.)

Irdkosketused

Uagadugu-lidnan kommunan sait (mairie-ouaga.bf). (fr.)

	Afrikan pälidnad
	Abudž \| Addis-Abeb \| Akkr \| Alžir-lidn \| Antananarivu \| Asmar \| Bamako \| Bangi \| Banžul \| Bisau \| Brazzavil' \| Dakar \| Dodom \| Džibuti-lidn \| Džub \| Fritaun \| Gaborone \| Giteg \| Harare \| Hartum \| Jamusukro \| Jaunde \| Kair \| Kampal \| Kigali \| Kinšas \| Konakri \| Librevil' \| Lilongve \| Lome \| Luand \| Lusak \| Malabo \| Maputu \| Maseru \| Mbabane \| Mogadišo \| Monrovii \| Moroni \| Nairobi \| Ndžamen \| Niamei \| Nuakšot \| Port Lui \| Porto Novo \| Prai \| Pretorii \| Rabat \| San Tome \| Tripoli \| Tunis-lidn \| Uagadugu \| Viktorii \| Vindhuk

[1] Universitetan Džozef Ki-Zerbon nimed sait (ujkz.bf). (fr.)

[2] Uagadugun lendimportan sait (ouagadougou-aeroport.bf). (fr.) (angl.)

[1]

[2]