Inčhon

Inčhon
인천 / 仁川 (Inch'ŏn)

Lidnanznam	Flag
Valdkund	Korejan Tazovaldkund
Eläjiden lugu (2026)	3,015,482 ristitud
Pind	1,062,63 km²
Pämez'	Pak Nam Čun (heinku 2018—, 박남춘, Park Nam-choon)
Telefonkod	+82−32
Aigvö	UTC+9

Inčhon (kor.: 인천 / 仁川 [intɕʰʌ̹n] Inch'ŏn «čoma jogi», vanh nimituz om Čemul'po kor.: 제물포 / 濟物浦) om lidn Korejan Tazovaldkundan lodehes. Se om valdkundan koumanz' lidn eläjiden lugun mödhe, Seulan avanport Pakuižen meren randal.

Istorii

Nügüdläižen eländpunktan aluz om pandud vl 1883 kuti rahvahidenkeskeine meriport. Vspäi 2003 lidnan territorii om joudai ekonomine zon vedatamha verazmaižid investicijoid.

Suvikorejan kahtenz' surtte port (Pusanan jäl'ghe) i kaikiš suremb Inčhon-lendimport (nellänz' mail'mas jüguiden mödhe) ratas lidnas, se om valdkundan znamasižeks transporttesol'meks. Lidnan metro om ühtenzoittud Seulan metropolitenanke.

Geografijan andmused

Lidnan sijaduz valdkundas vn 2023 kartal

Lidn sijadase Korejan pol'saren keskuzpalan päivlaskmas, Pakuižen meren Kanhvaman-lahten randal, Hangan-jogen lanktendan merhe sijas, seičeme metrad ü.m.t. keskmäižel korktusel.

Inčhon röunatab Seulan tertitorijanke päivnouzmas.

Klimat om pil'vekaz, subtropižen i venon kontinentaližen röunal. Voden keskmäine lämuz om +12,5 C°, heinkun-elokun +24,4..+25,6 C°, kezakun i sügüz'kun +21,3..+21,5 C°, tal'vkun-uhokun −1,5..+0,7 C°. Ekstremumad oma −21,0 C° (viluku) i +38,9 C° (heinku, eloku). Kezaaigan minimum om +8,7 C° (kezaku), tal'vaigan maksimum om +18,2 C° (uhoku). Ei voi panda halad semendkus-sügüz'kus (semendkun minimum om +3,4 C°). Paneb sadegid 1207 mm vodes, enamba heinkus-elokus (275..338 mm kus), vähemba tal'vkus-uhokus (16..25 mm kus). Paneb lunt tal'ven 22 päiväs. Kun keskmäine relätivine nepsuz vajehtase 80..84 % röunoiš heinkus-elokus, 61..67 % redukus-sulakus, 70..76 % toižiš kuiš.

Tobmuz

Lidnan administrativine jagand (2015)

Inčhon jagase kahesaks ümbrikoks i kahteks rajonaks.

Edeline lidnan pämez' om Ju Čžon Bok (Yoo Jeong-bok).

Eläjad

Vl 2009 lidnan eläjiden lugu oli 2,758,431 ristitud. Kaik 2,912,144 eläjad oli lidnas vl 2015. Kaikiš suremb lidnan ristitišt om nügüd'. Kactas lidnad Sur' Seul-aglomeracijan palaks.

Läz kaks'kümned universitetad da kolledžad opetas lidnas.

Irdkosketused

• Inčhon-lidnan ohjastusen informacine portal (english.incheon.go.kr). (kor.) (angl.) (jap.) (kit.)