Jelizovo

Jelizovo
Елизово
	Lidnanznam;
Valdkund	Venäma
Eläjiden lugu (2023)	36,199 ristitud
Pind	70 km²
Pämez'	Aleksandra Dikunova; (semendku 2025—)
Telefonkod	+7−41 531-xx-xxx
Avtokod	41, 82
Aigvö	UTC+12 (MSK+9)

Jelizovo (ven.: Е́лизово) om Venäman lidn da lidnankund Kamčatkan randan suves, Petropavlovskan Kamčatkal lodehline ezilidn. Se om Jelizovon rajonan administrativižeks keskuseks, mülüb rajonha vspäi 2007.

Istorii

Eländpunktan aluz om pandud vl 1848 kuti Vanh Ostrog (ven.: Старый Острог). Vl 1897 udesnimitihe sidä Zavoiko:ks (ven.: Заво́йко) sijaližen gubernatoran kanzannimen mödhe. Vspäi 1924 eländpunkt om nügüdläiženke nimenke, kolnuden Kamčatkal partizanjoukun Georgii Jelizov-käsknikan oiktastuseks. Vl 1975 Jelizovo-žilo sai lidnan statusad.

Jelizovon ižandusen päsarakod oma kalan ümbriradmine, lendimportan holitez. Kalanpüdon kompanijad baziruišoiš täs. Lidn om maižanduzrajonan da turizmmaršrutoiden keskuz.

Geografijan andmused

Lidn sijadase rajonan keskuzpalas, Avač-jogen randoil, 20 m ü.m.t. keskmäižel korktusel.

Matkad Petropavlovskan Kamčatkal röunhasai om kümne kilometrad suvipäivnouzmha avtotedme, keskuzpalhasai — 30 km.

Tobmuz

Jelizovo om lidnankundan üks'jäižeks eländpunktaks. Lidnankundan pind — 127,77 km².

Lidnankundan tobmuden pämez' om sen Deputatoiden suiman ezimez'. Edeližed lidnan suiman ezimehed oma Viktor Läšenko (uhoku-semendku 2025), Artöm Gaglošvili (tal'vku 2023 — uhoku 2025), Grigorii Dubrovin (sügüz'ku-tal'vku 2023), Oleg Martinük (kül'mku 2021 — sügüz'ku 2023), Jelena Räbceva (kül'mku 2016 — kül'mku 2021), Andrei Šergal'din (oli radnikusel vn 2016 kül'mkuhusai). Lidnankundan Administracijan pämez' om Aleksei Jegorov, tegeb velgusidme vn 2025 redukuspäi. Edeližed lidnan Administracijan pämehed oma Anton Pročko (kül'mku 2024 — reduku 2025), Vladislav Maslo (keväz'ku 2021 — reduku 2024), Dmitrii Ščipicin (kül'mku 2015 — keväz'ku 2021), Lübov' Šemetova (radoi vn 2015 kül'mkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 39 569 ristitud, rajonan koume videndest, vn 2021 — 36 240 ristitud. Kaik 38 771 eläjad oli lidnas vl 2017. Kaikiš suremb lidnan ristitišt oli 46 929 eläjad vl 1989.

Ortodoksižen hristanuskondan nell' pühäpertid^[1] oma saudud lidnas: kaks' jumalanpertid i kaks' časounäd.

Openduz

Lapsiden opendusen aluzkundad oma üks'toštkümne nimitadud i nomeruidud päivkodid (nomer 1, 4, 5, 8..12, 14, 22, 23), augotižškol nomer 5, aluzškol nomer 4, kuz' keskškolad (nomer 1..3, 7..9), rajonan ehtal'ne škol, muzikškol, čomamahtoine škol M. A. Luzinan nimed, kaks' sportškolad («Lider» i olimpižen varan hihtandsportas).

Kamčatkan tegimištoline tehnikum^[2] i Kamčatkan tehnologijan da servisan kolledžan filial oma lidnan professionaližen opendusen aluzkundoikš.

Transport

Avtobusad oma kundaližeks transportaks lidnas.

Rahvahidenkeskeine soda- da civiline Jelizovo-lendimport^[3] (PKC / UHPP / ПРЛ, 832 tuh. passažiroid vl 2022) otab lidnan keskuzpalad. Sišpäi tehtas reisid Venämadme, mugažo čarterreisid Suvipäivnouzmaižen Azijan maihe, Tokioho i Ankoridžha.