Kütahj

Kütahj
Kütahya
Valdkund	Turkanma
Eläjiden lugu (2022)	263,863 ristitud
Pind	2,470 km²
Pämez'	Ejüp Kahvedži; (sulaku 2024—,; Eyüp Kahveci)
Telefonkod	+90-(0)274
Aigvö	UTC+3

Kütahj (turk.: Kütahya [cyˈtahja]) om lidn Turkanman päivlaskmas. Se om Kütahjan agjan administrativižeks keskuseks da palaks.

Istorii

Vl 334 EME Aleksandr Makedonijalaine anasti lidnad i nimiti sidä Koteon:aks (grek.: Κοτυάειον). Turkad saiba lidnad vägel 12. voz'sadal. Amuine lidnuz mägenpäl i äiluguižed muštnikad vedadas turistoid lidnha.

Kütahj šingotase keramikan tehmižel amussai (astjad, dekorativine apakut), nahkoiden, sepiolitan i lignitan ümbriradmižel, nitratantegimel, sömtegimištol (sahar, fruktproduktad).

Geografijan andmused

Lidn otab agjan pohjoižpäivnouzmad palad, sijadase 969 m ü.m.t. keskmäižel korktusel.

Matkad Ankarhasai om 300 km päivnouzmha. Lähembaine järed lidn om Eskišehir seičemekümnes kilometras pohjoižpäivnouzmha.

Klimat om läm' kontinentaline Keskmeren klimatan röunanno. Keza om kuiv, läm' i päivoikaz lujas. Tal'vaig om pehmed, vihmoikaz i pil'vekaz lujas. Voden keskmäine lämuz om +11,2 C°, heinkun-elokun +21,6 C°, tal'vkun-uhokun +0,6..+2,4 C°. Ekstremumad oma −28,1 C° (tal'vku, uhoku) i +41,4 C° (eloku). Kezaaigan minimum om −0,2 C° (eloku), tal'vaigan maksimum om +24,2 C° (uhoku). Ei voi panda halad kezakus-heinkus. Paneb sadegid 551 mm vodes, enamba tal'vkus-semendkus (53..67 mm kus), vähemba heinkus-sügüz'kus (19..27 mm kus). Paneb lunt tal'ven 24 päiväs keskmäras.

Eläjad

Vn 2011 Turkanman rahvahanlugemižen mödhe lidnan eläjiden lugu oli 237,804 ristitud i oti agjan pol't. Kaik 266,784 eläjad oli lidnas vl 2018, se ristitišt oli kaikiš suremb.

Vspäi 1992 Kütahjan Dumlupinaran universitet^[1] radab lähižes ezilidnas (turk.: Kütahya Dumlupınar Üniversitesi, ende Anatolijan universitetan filial, alusenpanend 1974), läz 44 tuhad üläopenikoid (2018).