Kastamonu

**Kastamonu**
	Lidnanznam;
Valdkund	Turkanma
Eläjiden lugu (2021)	125,622 ristitud
Pämez'	Hasan Baltači; (sulaku 2024—,; Hasan Baltacı)
Telefonkod	+90-(0)366
Aigvö	UTC+3

Kastamonu (mugažo turkan kelel; grek.: Κασταμόνου Kastamonou) om lidn Turkanman pohjoižes. Se om Kastamonun agjan administrativine keskuz.

Istorii

Eländpunktan aluz om pandud 18. voz'sadal edel m.e.. Sen nimi oli Timonion (grek. Τιμόνιον) 10. voz'sadahasai m.e., konz Vizantijan tulijan Isaak I Komnenos-imperatoran tat, Manuel Erotikos Komnenos, sai mad siš da sauvoi lidnusen. Lidnuz sai Kastra Komnenon-nimen (grek. Κάστρα Κομνηνών). Aigan mändes nece nimi oli lühetud Kastamone-nimehesai, sid' kätihe nügüdläižikš, turkan kartte. Turkanman «sobiden revolücii» zavodihe Atatürkan paginan jäl'ghe neciš lidnas vn 1925 23. päiväl elokud.

Geografijan andmused

Lidn sijadase agjan suves. Se seižub Karasomak-jogen alangištos (Mustmeren bassein), 774 m korktusel valdmeren pindan päl.

Matkad Mustmeren randhasai om kuz'kümne viž kilometrad pohjoižhe orhal, Ankar-pälidnhasai om 180 km suvhe-suvipäivlaskmha orhal vai 240 km avtotedme.

Klimat om ven kontinentaline. Keza om päivoikaz lujas, tal'vaig om pil'vekaz lujas. Voden keskmäine lämuz om +10,1 C°, kezakun-sügüz'kun +16,2..+20,5 C°, tal'vkun-uhokun −0,6..+1,1 C°. Absolütine minimum oleskeli −26,9 C° (viluku), maksimum +42,2 C° (heinku). Paneb sadegid 525 mm vodes, enamba semendkus-kezakus (78..90 mm kus), vähemba vilukus-uhokus (28..29 mm kus) i kül'mkus (27 mm). Kun keskmäine relätivine nepsuz vajehtase 61..62 % röunoiš heinkus-elokus, 78..82 % kül'mkus-vilukus, 66..74 % toižiš kuiš.

Tobmuz

Lidnan tobmuden pämez' om sen municipalitetan pämez' (turk.: Kastamonu Belediye Başkanı). Edeližed lidnan pämehed oma Rahmi Galip Vidinlioglu (Rahmi Galip Vidinlioğlu, sulaku 2019 — sulaku 2024), Tahsin Babaš (Tahsin Babaş, sulaku 2014 — sulaku 2019), Turhan Topčuoglu (Turhan Topçuoğlu, sulaku 1999 — sulaku 2014).

Eläjad

Vn 2011 Turkanman rahvahanlugemižen mödhe lidnan municipalitetan eläjiden lugu oli 93,347 ristitud, vn 2021 — 125,622 ristitud, agjan viž kudendest. Kaik 110,908 eläjad oli lidnas vl 2015. Kaikiš suremb lidnan ristitišt om nügüd'.

Kastamonun universitet radab lidnas vspäi 2006.

Transport

Avtote ühtenzoitab lidnad Mustmeren randištonke.

Ühtennimine civiline Kastamonu-lendimport^[1] (KFS / LTAL, 90 tuhad passažiroid vl 2017, 59 tuh. vl 2025) om olmas vspäi 1990, nügüdläine vspäi 2013, se sijadase kümnes kilometras suvipäivnouzmha lidnan keskuzpalaspäi, jogavozne päzutandmahtuz 1,5 mln passažiroid. Tehtas reisid Stambulha.